ল’কডাউনৰ ফলত ৰাজ্যৰ বিভিন্ন প্ৰান্তত দৰিদ্ৰ মানুহৰ অৰ্থনৈতিকভাৱে অৱস্থা বেয়া হৈছে।
তেওঁলোকে প্ৰয়োজনীয় খাদ্য সামগ্ৰীৰ অভাৱত পৰা পৰিলক্ষিত হৈছে। এনে সময়তে বিভিন্ন দল সংগঠন তথা বেচৰকাৰী সংগঠনে এইসকল দৰিদ্ৰ লোকৰ কাষত থিয় দিছেহি।
তেনে এক মহানুভাৱতাৰ পৰিচয় দি আজি মধ্য গুৱাহাটী ছাত্ৰ সন্থাই মহানগৰীৰ শিলপুখুৰী, পূৱ শৰণীয়া, গান্ধীবস্তি, ৰাজগড় আদি অঞ্চলৰ ৭০ টা দৰিদ্ৰ পৰিয়ালক খাদ্য সামগ্ৰী প্ৰদান কৰে।
খাদ্য সামগ্ৰী বিতৰণৰ সময়ত লোকসকলে সামাজিক দুৰত্ব মানি চলি খাদ্য সংগ্ৰহ কৰা পৰিলক্ষিত হয়।
মধ্য গুৱাহাটী ছাত্ৰ সন্থাৰ সাধাৰণ সম্পাদক সুকুমাৰ বৰ্মণৰ নেতৃত্বত চাৰিজনীয়া এটা দলে সামগ্ৰীখিনি দৰিদ্ৰ জনসাধাৰণৰ মাজত বিতৰণ কৰে।
সামগ্ৰী বিতৰণৰ পাছতে নৰ্থ ইষ্ট নাওৰ সাংবাদিকৰ আগত সুকুমাৰ বৰ্মণে কয় ‘ক’ৰ’ণা মহামাৰীৰ ফলত বিশ্বৰ শিক্ষা ব্যৱস্থা, অৰ্থ ব্যৱস্থাকে ধৰি বিভিন্ন স্তৰ আজি স্তব্ধ হৈ পৰিছে। ল’কডাউনৰ ফলত আৰ্থিকভাৱে দুৰ্বল লোকসকলক সহায়ৰ বাবে আগবাঢ়ি আহিছো। প্ৰত্যেকজন মানুহে প্ৰত্যেকজনৰ বাবে ভাবিব লাগিব। কথাৰ দ্বাৰা জীৱশ্ৰেষ্ঠ নহয় আমি কামৰ দ্বাৰা জীৱশ্ৰেষ্ঠ বুলি প্ৰতিপন্ন কৰিব লাগিব।‘
বৰ্মণে লগতে ছাত্ৰ সন্থাৰ প্ৰতিগৰাকী কাৰ্যকৰ্তাক দৰিদ্ৰ জনতাৰ কাষত থিয় হৈ সহায়ৰ হাত আগবঢ়াবৰ বাবে অনুৰোধ জনায়।
উল্লেখযোগ্য যে, যোৱা ১৪ এপ্ৰিলৰ দিনা মধ্য গুৱাহাটী ছাত্ৰ সন্থাই ৬০ ঘৰ মানুহক খাদ্য সামগ্ৰী বিতৰণ কৰিছিল।
