দিল্লী বিস্ফোৰণৰ সৈতে নাম সাঙোৰ খোৱা ফৰিদাবাদৰ আল-ফলাহ বিশ্ববিদ্যালয় বৰ্তমান সংবাদ শিৰোনামত। সন্ত্ৰাসবাদী কাৰ্যকলাপৰ সৈতে জড়িত থকাৰ অভিযোগত তদন্তকাৰী সংস্থা আৰু ‘নাকে’ (NAC) ইতিমধ্যে বিশ্ববিদ্যালয়খনৰ ওপৰত দৃষ্টি ৰাখিছে। দিল্লী বিস্ফোৰণৰ আত্মঘাতী বোমাৰু উমৰ আৰু গ্ৰেপ্তাৰ হোৱা মুজাম্মিল-শ্বাহিনৰ সৈতে এই শিক্ষানুষ্ঠানৰ সম্পৰ্ক থকাৰ তথ্য পোহৰলৈ অহাৰ পাছতে জনমানসত ই এক ‘উগ্ৰপন্থীৰ ঘাটি’ হিচাপে চৰ্চিত হৈছে।
ইয়াৰ মাজতে, মধ্যপ্ৰদেশ প্ৰশাসনে বিশ্ববিদ্যালয়খনৰ প্ৰতিষ্ঠাপক জৱাদ আহমেদ ছিদ্দিকীৰ পূৰ্বপুৰুষৰ বাসগৃহ ভাঙি পেলোৱাৰ নিৰ্দেশ দিছিল। কিন্তু এইক্ষেত্ৰত প্ৰশাসনক বাধা প্ৰদান কৰিছে মধ্যপ্ৰদেশ উচ্চ ন্যায়ালয়ে।
উচ্চ ন্যায়ালয়ৰ স্থগিতাদেশ আৰু ঘটনাৰ বিৱৰণ:
বুলডজাৰত বাধা: মধ্যপ্ৰদেশ উচ্চ ন্যায়ালয়ে প্ৰশাসনৰ উচ্ছেদ অভিযানত সাময়িক স্থগিতাদেশ জাৰি কৰিছে। আদালতে স্পষ্ট নিৰ্দেশ দিছে যে ছিদ্দিকীৰ পূৰ্বপুৰুষৰ সম্পত্তিৰ বিৰুদ্ধে বৰ্তমান কোনো ব্যৱস্থা গ্ৰহণ কৰিব নোৱাৰিব।
বিতৰ্কৰ কাৰণ: মধ্যপ্ৰদেশৰ মাহুৰ মুকেৰী মহলত থকা এই ঘৰটোৰ এটা অংশ অবৈধভাৱে নিৰ্মাণ কৰা বুলি অভিযোগ কৰি মহাউ কেণ্টনমেণ্ট ব’ৰ্ডে সেয়া ভাঙি পেলোৱাৰ সিদ্ধান্ত লৈছিল। মন কৰিবলগীয়া যে, এই একেটা অংশ ভাঙিবলৈ ব’ৰ্ডে ১৯৯৬-৯৭ চনতো জাননী জাৰি কৰিছিল, যিটো প্ৰায় ৩০ বছৰ পুৰণি বিষয়।
আদালতৰ দ্বাৰস্থ: বৰ্তমান সেই ঘৰত বাস কৰা জৱাদ ছিদ্দিকিৰ আত্মীয় আব্দুল মজীদে ব’ৰ্ডৰ জাননীক প্ৰত্যাহ্বান জনাই আদালতৰ কাষ চাপে।
শুনানিৰ তথ্য: ন্যায়াধীশ প্ৰণয় বাৰ্মাৰ বিচাৰপীঠে এই গোচৰৰ শুনানি গ্ৰহণ কৰে। আবেদনকাৰীয়ে আদালতক জনায় যে ঘৰটো ভাঙিবলৈ মাত্ৰ তিনিদিনৰ সময় দিয়া হৈছে, যিটো উচ্চতম ন্যায়ালয়ৰ নিৰ্দেশনাৰ উলংঘন।
এই যুক্তিৰ আধাৰতে আদালতে আব্দুল মজীদক সকাহ প্ৰদান কৰে। আদালতে তেওঁক আত্মপক্ষ সমৰ্থনৰ বাবে নথিপত্ৰ দাখিল কৰিবলৈ ১৫ দিনৰ সময় দিছে। লগতে, এই প্ৰক্ৰিয়া সম্পূৰ্ণ হোৱাৰ পৰৱৰ্তী ১০ দিনলৈকে ব’ৰ্ডে ঘৰটোৰ বিৰুদ্ধে কোনো ধৰণৰ শাস্তিমূলক বা উচ্ছেদৰ ব্যৱস্থা ল’ব নোৱাৰিব বুলি অন্তৱৰ্তীকালীন আদেশত উল্লেখ কৰিছে।
