শিক্ষাৰ্থীসকলৰ সামগ্ৰিক কল্যাণ সুনিশ্চিত কৰাৰ উদ্দেশ্যে মধ্যপ্ৰদেশৰ উচ্চ শিক্ষা বিভাগে ৰাজ্যখনৰ মহাবিদ্যালয়সমূহত নতুনকৈ নামভৰ্তি কৰা ছাত্ৰ-ছাত্ৰীৰ বাবে মানসিক স্বাস্থ্য সজাগতা এক বাধ্যতামূলক বিষয় হিচাপে অন্তৰ্ভুক্ত কৰিছে। বুধবাৰে জাৰি কৰা এক চৰকাৰী নিৰ্দেশনা মৰ্মে, অহা ১ জুলাইৰ পৰা আৰম্ভ হ‘বলগীয়া নতুন শৈক্ষিক বৰ্ষৰ পৰিচয়মূলক কাৰ্যসূচীৰ অংশ হিচাপে সকলো চৰকাৰী আৰু বেচৰকাৰী মহাবিদ্যালয়ক মানসিক স্বাস্থ্য আৰু সুস্থতাৰ বিশেষ কাৰ্যসূচী আয়োজন কৰিবলৈ কঠোৰ নিৰ্দেশ দিয়া হৈছে।
বিভাগীয় বিবৃতি অনুসৰি, মহাবিদ্যালয়ৰ দিনবোৰত উদ্ভৱ হ‘ব পৰা মানসিক চাপ, উৎকণ্ঠা, হতাশা আৰু আনুষংগিক আৱেগিক সমস্যাসমূহ ফলপ্ৰসূভাৱে পৰিচালনা কৰাত শিক্ষাৰ্থীসকলক সহায় কৰাই হৈছে এই পদক্ষেপৰ প্ৰধান লক্ষ্য। নিৰ্দেশনাটোত উল্লেখ কৰা কৰা অনুসৰি এই কাৰ্যসূচীৰ উদ্দেশ্য হৈছে ছাত্ৰ-ছাত্ৰীসকলক মানসিক স্বাস্থ্যৰ বিষয়ে সজাগ কৰা আৰু তেওঁলোকক মানসিক চাপ, হতাশা আৰু অন্যান্য মনস্তাত্ত্বিক প্ৰত্যাহ্বানসমূহৰ সৈতে মোকাবিলা কৰিবলৈ প্ৰয়োজনীয় নিৰ্দেশনা প্ৰদান কৰা।
এই কাৰ্যসূচীৰ অধীনত মহাবিদ্যালয়সমূহে মানসিক চাপ নিয়ন্ত্ৰণ, সময় ব্যৱস্থাপনা, আৱেগিক ভাৰসাম্য, ইতিবাচক চিন্তা, ধ্যান আৰু জীৱনশৈলীৰ দক্ষতাৰ ওপৰত বিশেষ অধিৱেশন অনুষ্ঠিত কৰিব। শিক্ষাৰ্থীসকলৰ সৈতে মত বিনিময় কৰিবলৈ আৰু তেওঁলোকক আৱেগিক সুস্থতা বজাই ৰখাৰ ক্ষেত্ৰত পথ প্ৰদৰ্শন কৰিবলৈ স্থানীয় মানসিক স্বাস্থ্য বিশেষজ্ঞ, মনোবিজ্ঞানী আৰু পৰামৰ্শদাতাসকলক আমন্ত্ৰণ জনাবলৈ বিভাগটোৱে প্ৰতিষ্ঠানসমূহক নিৰ্দেশ দিছে। মানসিক স্বাস্থ্যৰ লগতে এই কাৰ্যসূচীত ৰেগিং বিৰোধী নীতি, অভিযোগ নিষ্পত্তি ব্যৱস্থা, মেণ্টৰ-মেণ্টি ব্যৱস্থা, চাইবাৰ বুলিং আৰু দায়িত্বশীল ডিজিটেল আচৰণৰ দৰে গুৰুত্বপূৰ্ণ বিষয়সমূহো সামৰি লোৱা হ‘ব। ইয়াৰ উপৰি, চৌহদত উপলব্ধ পৰামৰ্শদাতা, ৰেগিং বিৰোধী সমিতি আৰু আভ্যন্তৰীণ অভিযোগ সমিতিৰ দৰে সহায়ক ব্যৱস্থাসমূহৰ বিষয়েও শিক্ষাৰ্থীসকলক অৱগত কৰা হ‘ব।
চৰকাৰী নিৰ্দেশনাটোত স্পষ্টকৈ কোৱা হৈছে যে শিক্ষাৰ্থীসকলৰ শৈক্ষিক পাৰদৰ্শিতা, ব্যক্তিত্ব বিকাশ আৰু সামগ্ৰিক সুস্থতাৰ বাবে তেওঁলোকৰ মানসিক স্বাস্থ্য অত্যন্ত গুৰুত্বপূৰ্ণ আৰু সেয়েহে শৈক্ষিক বৰ্ষৰ আৰম্ভণিৰ পৰাই মহাবিদ্যালয়সমূহত এক সুৰক্ষিত, সৰ্বসাঁমৰি আৰু সহায়ক শৈক্ষিক পৰিৱেশ সৃষ্টি কৰা উচিত। চৰকাৰী বিষয়াগৰাকীয়ে প্ৰকাশ কৰা মতে, উচ্চতম ন্যায়ালয়ৰ দ্বাৰা গঠিত ৰাষ্ট্ৰীয় কৰ্মবাহিনীৰ পৰামৰ্শৰ ভিত্তিত এই গুৰুত্বপূৰ্ণ পদক্ষেপ গ্ৰহণ কৰা হৈছে। উক্ত কৰ্মবাহিনীয়ে শিক্ষানুষ্ঠানসমূহত মানসিক স্বাস্থ্যৰ সহায়ক ব্যৱস্থা অধিক শক্তিশালী কৰাৰ ওপৰত বিশেষ গুৰুত্ব আৰোপ কৰিছিল।
বৰ্তমান ৰাজ্যখনৰ সকলো মহাবিদ্যালয় কৰ্তৃপক্ষক এই কাৰ্যসূচীত নৱাগত ছাত্ৰ-ছাত্ৰীৰ সৰ্বাধিক অংশগ্ৰহণ সুনিশ্চিত কৰিবলৈ আৰু পৰৱৰ্তী সময়ত ইয়াৰ প্ৰতিবেদন, আলোকচিত্ৰ তথা অন্যান্য সবিশেষ বিভাগীয় কাৰ্যালয়ত নিৰ্ধাৰিত সময়ৰ ভিতৰত দাখিল কৰিবলৈ নিৰ্দেশ দিয়া হৈছে। নতুন শৈক্ষিক বৰ্ষত মধ্যপ্ৰদেশৰ মহাবিদ্যালয়সমূহত নামভৰ্তি কৰা সহস্ৰাধিক শিক্ষাৰ্থীয়ে এই পদক্ষেপৰ জৰিয়তে চৌহদৰ নতুন পৰিৱেশৰ সৈতে সহজে খাপ খোৱাত সুবিধা পাব আৰু প্ৰয়োজন অনুসৰি যথোপযুক্ত মানসিক সাহায্য লাভ কৰিবলৈ সক্ষম হ‘ব বুলি আশা প্ৰকাশ কৰা হৈছে।
