মাদ্ৰাজ উচ্চ ন্যায়ালয়ে মঙলবাৰে লটাৰী সম্ৰাট ছাণ্টিয়াগো মাৰ্টিন আৰু তেওঁৰ পৰিয়ালৰ সদস্যৰ এখন আৱেদনৰ ভিত্তিত বলৱৎকৰণ সঞ্চালকালয় বা ইডিলৈ জাননী জাৰি কৰিছে। ধন সৰবৰাহৰ এক গোচৰত ইডিয়ে তেওঁলোকৰ সম্পত্তি অস্থায়ীভাৱে বাজেয়াপ্ত কৰাৰ নিৰ্দেশ দিছিল আৰু ন্যায়াধিকৰণে এই নিৰ্দেশ বাহাল ৰাখিছিল। এই নিৰ্দেশক প্ৰত্যাহ্বান জনাই মাৰ্টিন, তেওঁৰ পত্নী তথা এ আই এ ডি এম কে দলৰ বিধায়িকা লিমা ৰোজ মাৰ্টিন আৰু কন্যা ডেইজী আধাভ অৰ্জুনাই উচ্চ ন্যায়ালয়ৰ কাষ চাপিছিল। মুখ্য ন্যায়াধীশ এছ এ ধৰ্মাধিকাৰী আৰু ন্যায়াধীশ জি অৰুল মুৰুগানৰ বিচাৰপীঠে মাৰ্টিন আৰু তেওঁৰ সৈতে জড়িত কোম্পানীবোৰে দাখিল কৰা ৩৯খন আৱেদনৰ ভিত্তিত বিভাগটোলৈ এই জাননী জাৰি কৰিছে আৰু ছসপ্তাহৰ ভিতৰত উত্তৰ বিচাৰিছে।
ছিকিম লটাৰীৰ পৰিচালন সঞ্চালক ছাণ্টিয়াগো মাৰ্টিনৰ বিৰুদ্ধে ২০০৯ আৰু ২০১০ চনত কেৰালাত ভুৱা লটাৰী টিকট বিক্ৰী কৰি ছিকিম চৰকাৰৰ ৯১০.২৯ কোটি টকাৰ লোকচান কৰোৱাৰ অভিযোগ উত্থাপন হৈছিল। এই সন্দৰ্ভত চিবিআইয়ে ৰুজু কৰা গোচৰৰ ভিত্তিত ইডিয়ে ধন সৰবৰাহ প্ৰতিৰোধ আইনৰ অধীনত এটা গোচৰ পঞ্জীয়ন কৰিছিল আৰু ইয়াৰ ভিত্তিতে পাঁচবাৰকৈ সম্পত্তি বাজেয়াপ্ত কৰিছিল। ২০২৩ চনৰ ৯ জুনত ইডিয়ে দিয়া সম্পত্তি বাজেয়াপ্ত কৰাৰ নিৰ্দেশক কেন্দ্ৰ কৰিয়েই এই নতুন আৱেদনখন দাখিল কৰা হৈছে আৰু বাজেয়াপ্ত কৰা সম্পত্তি মুকলি কৰি দিবলৈ দাবী জনোৱা হৈছে।
ইয়াৰ পূৰ্বে মাৰ্টিনে কেৰালা উচ্চ ন্যায়ালয়তো এই নিৰ্দেশক প্ৰত্যাহ্বান জনাইছিল। তেওঁ যুক্তি দৰ্শাইছিল যে এই গোচৰত তেওঁৰ মাত্ৰ ৫১ শতাংশ অৰ্থাৎ প্ৰায় ৪৬৪.২৫ কোটি টকাহে জড়িত আছে, কিন্তু ইডিয়ে সীমা অতিক্ৰম কৰি প্ৰায় ৮৯৪ কোটি টকাৰ সম্পত্তি বাজেয়াপ্ত কৰিছে। অৱশ্যে কেৰালা উচ্চ ন্যায়ালয়ে তেওঁৰ আৱেদন খাৰিজ কৰি কৈছিল যে এনে গোচৰৰ বাবে আইনত ইতিমধ্যে তিনিখলপীয়া সুকীয়া আইনী ব্যৱস্থা আছে, সেয়েহে বিশেষ পৰিস্থিতিৰ বাহিৰে পোনে পোনে উচ্চ ন্যায়ালয়ৰ কাষ চপা উচিত নহয়। পৰৱৰ্তী সময়ত কেৰালা উচ্চ ন্যায়ালয়ৰ আন এখন বিচাৰপীঠেও এই ৰায় বাহাল ৰাখিছিল।
