মহাৰাষ্ট্ৰৰ উপ-মুখ্যমন্ত্ৰী অজিত পাৱাৰৰ এক শোকাৱহ বিমান দুৰ্ঘটনাত মৃত্যু হৈছে। বুধবাৰে সংঘটিত এই মৰ্মান্তিক ঘটনাই সমগ্ৰ মহাৰাষ্ট্ৰতে গভীৰ শোকৰ ছাঁ পেলাইছে। এই দুখজনক পৰিস্থিতিৰ প্ৰতি লক্ষ্য ৰাখি ৰাজ্য চৰকাৰে তিনিদিনীয়া শোক পালনৰ কথা ঘোষণা কৰিছে। সেই অনুসৰি অহা ৩০ জানুৱাৰী পৰ্যন্ত মহাৰাষ্ট্ৰৰ সকলো চৰকাৰী আৰু ব্যক্তিগত খণ্ডৰ শিক্ষানুষ্ঠান তথা চৰকাৰী কাৰ্যালয়সমূহ বন্ধ ৰখাৰ নিৰ্দেশ দিয়া হৈছে। এই তিনিদিনৰ শোককালত ৰাষ্ট্ৰীয় পতাকা অৰ্ধনমিত হৈ থাকিব আৰু চৰকাৰী তথা মনোৰঞ্জনমূলক সকলো অনুষ্ঠান বাতিল কৰা হৈছে।
সর্বভাৰতীয় সংবাদ মাধ্যমৰ পৰা পোৱা তথ্য অনুসৰি মুখ্যমন্ত্রী দেবেন্দ্র ফড়নবীশে এই কথা নিশ্চিত কৰিছে যে ৰাজ্যখনত ৩০ জানুৱাৰীলৈকে চৰকাৰী শোক পালন কৰা হ’ব। জানিব পৰা মতে এখন চাৰ্টাৰ্ড বিমানেৰে মুম্বাইৰ পৰা বাৰামতী লৈ গৈ থকা অৱস্থাত এই দুৰ্ঘটনাটো সংঘটিত হয়। উৰণ আৰম্ভ কৰাৰ প্ৰায় ৪৫ মিনিটৰ পাছতে বিমানখন দুৰ্ঘটনাগ্ৰস্ত হয়। অজিত পাৱাৰে সেইদিনা তিনিখনকৈ নিৰ্বাচনী জনসভাত অংশ লোৱাৰ কথা আছিল। দুৰ্ঘটনাটো ইমানেই ভয়াবহ আছিল যে বিমানখন মাটিত আছড়ে পৰাৰ লগে লগে জুই লাগি যায় আৰু উপ-মুখ্যমন্ত্ৰীগৰাকীৰ সৈতে মুঠ পাঁচজন লোকৰ থিতাতে মৃত্যু হয়।
বিমানখনৰ ধ্বংসাৱশেষৰ মাজত উদ্ধাৰ হোৱা মৃতদেহসমূহ চিনাক্ত কৰাটো প্ৰথম অৱস্থাত যথেষ্ট কঠিন হৈ পৰিছিল। পৰৱৰ্তী সময়ত হাতঘড়ী আৰু পোছাক প্ৰত্যক্ষ কৰিহে অজিত পাৱাৰৰ মৃতদেহটো চিনাক্ত কৰা হয়। ডিজচিএ-ৰ পৰা জনোৱা অনুসৰি পুৱা ৮ বজাত মুম্বাই বিমান বন্দৰৰ পৰা উৰা মৰা বিমানখনে ৮ বাজি ৪৫ মিনিটত বাৰামতীত জৰুৰী অৱতৰণৰ চেষ্টা কৰিছিল। কিন্তু অৱতৰণৰ ঠিক আগমুহূৰ্তত যান্ত্ৰিক বিজুতিৰ বাবে বিমানখন দুৰ্ঘটনাগ্ৰস্ত হয়। তদন্তৰ বাবে ইতিমধ্যে এখন উচ্চ পৰ্যায়ৰ কমিটি গঠন কৰা হৈছে।
ডিজচিএ-ৰ সূত্ৰই প্ৰকাশ কৰিছে যে বিমানখনত দুজন ক্ৰু মেম্বাৰ আৰু তিনিজন যাত্ৰী আছিল। দুৰ্ঘটনাটোৰ আগত বিমানখনৰ পৰা কোনো ধৰণৰ বিপদকালীন সংকেত বা মে-ডে কল দিয়া হোৱা নাছিল। সেই সময়ত বাৰামতীত দৃশ্যমানতা অতি কম আছিল আৰু ডাৱৰীয়া বতৰৰ বাবে পাইলটে ৰানৱে স্পষ্টকৈ দেখা পোৱা নাছিল। প্ৰথমবাৰ অৱতৰণৰ চেষ্টা বিফল হোৱাৰ পাছত আকাশত এপাক ঘূৰি দ্বিতীয়বাৰ চেষ্টা কৰোঁতেই ৰানৱেৰ পৰা ১০০ ফুট দূৰত বিমানখন ভাঙি পৰে আৰু এক বিকট বিস্ফোৰণৰ শব্দৰে সম্পূৰ্ণৰূপে জ্বলি ভস্মীভূত হয়।
এই দুৰ্ঘটনাগ্ৰস্ত বিমানখন লিয়াৰজেট ৪৫ মডেলৰ আছিল যিখন বম্বাৰ্ডিয়াৰ এৰোস্পেচ নামৰ সংস্থাটোৱে নিৰ্মাণ কৰিছিল। ১৫ বছৰ পুৰণি এই বিমান মডেলটোৰ সুৰক্ষা সন্দৰ্ভত পূৰ্বেও প্ৰশ্ন উত্থাপন হৈছিল কাৰণ ২০২৩ চনতো অনুৰূপ ধৰণৰ এক বিমান দুৰ্ঘটনা মুম্বাইত সংঘটিত হৈছিল। সেইবাৰো বিশাখাপত্তনমৰ পৰা অহা এখন বিমান অৱতৰণৰ সময়তে দুৰ্ঘটনাগ্ৰস্ত হৈছিল। বৰ্তমান এই সমগ্ৰ ঘটনাটোৰ গভীৰ তদন্ত চলাই থকা হৈছে আৰু সমগ্ৰ দেশবাসীয়ে অজিত পাৱাৰৰ মৃত্যুত গভীৰ সমবেদনা জ্ঞাপন কৰিছে।
