ভাৰতীয় ক্ৰিকেট দলৰ অধিনায়ক বিৰাট কোহলিয়ে মহেন্দ্ৰ সিং ধোনী সন্দৰ্ভত কৰা এটা মন্তব্যই এতিয়া ছ’চিয়েল মিডিয়াত ব্যাপক চৰ্চা লাভ কৰিছে।
অধিনায়ক কোহলিয়ে শেহতীয়াভাৱে টুইটযোগে শ্বেয়াৰ কৰিছিল এখন ফটো। ফটোখনত ধোনীৰ সন্মুখত কোহলিয়ে তলমূৰ কৰি থকা পৰিলক্ষিত হয়।
আচলতে এই ফটোখনৰ সৈতে কোহলিয়ে দিয়া কেপশ্যনটোৱেহে ছ’চিয়েল মিডিয়াত চৰ্চাৰ মূল বিষয়বস্ত হৈ পৰিছে।
কেপশ্যনটোত তেওঁ ধোনী সন্দৰ্ভত গুৰুত্বপূৰ্ণ মন্তব্য কৰি কয়, ‘মই কেতিয়াও পাহৰিব নোৱাৰা এখন মেচ। সেইটো আছিল বিশেষ নিশা’।
ইয়াৰ উপৰি সেই মেচখনত ধোনীয়ে ফিটনেছ টেষ্ট লোৱাৰ নিচিনাকৈ বিৰাটক দৌৰাইছিল বুলিও তেওঁ মন্তব্য কৰে।
A game I can never forget. Special night. This man, made me run like in a fitness test ? @msdhoni ?? pic.twitter.com/pzkr5zn4pG
— Virat Kohli (@imVkohli) September 12, 2019
যিখন মেচৰ কথা কোহলীয়ে উল্লেখ কৰিছে সেইখন আছিল ২০১৬ টি-২০ বিশ্বকাপৰ মেচ। ধোনীৰ নেতৃত্বত অষ্ট্ৰেলিয়াৰ বিৰুদ্ধে খেলা উক্ত মেচখনত কোহলিৰ বিস্ফোৰক ৮২ৰানৰ সহায়ত ভাৰতে ছয় উইকেটত বিজয় সাব্যস্ত কৰিছিল।
অতীতৰ উত্তেজনাপূৰ্ণ মেচখনৰ কথা মনত পেলাই কৰা টুইটোত বিৰাটে ধোনীকো টেগ কৰি দিয়ে।
উল্লেখ্য যে বিশ্বকাপৰ পিছৰে পৰা ক্ৰিকেটৰ পৰা আঁতৰি আছে প্ৰাক্তন অধিনায়ক মহেন্দ্ৰ সিং ধোনী। বিশ্বকাপত ভাৰতে ছেমি ফাইনেলত পৰাস্ত হোৱাৰ পাছৰে পৰা বিভিন্ন জনে ধোনীক দোষাৰোপ কৰি তেওঁৰ অৱসৰৰ দাবী তুলিছিল।
ইফালে আজি সন্ধিয়া বি চি চি আইৰ মুখ্য কাৰ্যালয়ৰ বাহিৰত এখন গুৰুত্বপূৰ্ণ সংবাদমেলৰ আয়োজন কৰিছে ধোনীয়ে। এইখন সংবাদমেলতে ধোনীয়ে নিজৰ কেৰিয়াৰ সমাপ্ত কৰাৰ কথা ঘোষণা কৰিব পাৰে বুলি বিভিন্ন সূত্ৰই দাবী কৰিছে।
কোহলিৰ টুইট আৰু ধোনীৰ সংবাদমেলে অনুৰাগীৰ মাজত বৃদ্ধি কৰিছে উদ্বিগ্নতা।