কেন্দ্ৰীয় চৰকাৰে নাগৰিকত্ব নিয়ম ২০০৯ ৰ প্ৰস্তাৱিত সংশোধনৰ খচৰা অধিসূচনা জাৰি কৰিছে। এই নতুন নিয়ম অনুসৰি এতিয়াৰে পৰা আবেদনকাৰীসকলে নিজৰ ওচৰত পাকিস্তান, বাংলাদেশ বা আফগানিস্তানৰ চৰকাৰে জাৰি কৰা পাছপ’ৰ্ট আছে নে নাই সেই কথা স্পষ্টকৈ ঘোষণা কৰিব লাগিব। কেৱল সিমানেই নহয়, ভাৰতীয় নাগৰিকত্ব লাভ কৰাৰ ১৫ দিনৰ ভিতৰত তেওঁলোকে এই পাছপ’ৰ্টসমূহ চৰকাৰৰ ওচৰত জমা দিব লাগিব।
गृह মন্ত্ৰালয়ে জাৰি কৰা চৰকাৰী জাননী অনুসৰি প্ৰস্তাৱিত নাগৰিকত্ব সংশোধন নিয়ম ২০২৬ ত এটা নতুন নিয়ম সংযোজন কৰা হৈছে। ইয়াৰ অধীনত আবেদনকাৰীৰ ওচৰত এই তিনিখন দেশৰ কোনো বৈধ বা ম্যাদ উকলি যোৱা পাছপ’ৰ্ট আছে নে নাই, সেই কথা জনোৱাটো বাধ্যতামূলক কৰা হৈছে। যদি কোনো আবেদনকাৰীৰ ওচৰত এনে পাছপ’ৰ্ট থাকে, তেন্তে তেওঁলোকে পাছপ’ৰ্ট নম্বৰ, জাৰি কৰা তাৰিখ আৰু স্থানৰ লগতে ইয়াৰ ম্যাদ শেষ হোৱা তাৰিখসহ সকলো তথ্য চৰকাৰক দিব লাগিব। ভাৰতীয় নাগৰিকত্ব মঞ্জুৰ হোৱাৰ পিছত ডাক বিভাগৰ জ্যেঠ অধীক্ষক বা ডাক অধীক্ষকৰ ওচৰত এই পাছপ’ৰ্টসমূহ অৰ্পণ কৰিব লাগিব। এই নিয়মসমূহ চৰকাৰী ৰাজপত্ৰত প্ৰকাশ পোৱাৰ তাৰিখৰ পৰাই কাৰ্যকৰী হ’ব।
উল্লেখ কৰিব পাৰি যে নাগৰিকত্ব সংশোধনী আইনে ৩১ ডিচেম্বৰ ২০১৪ চনৰ পূৰ্বে ভাৰতত প্ৰৱেশ কৰা এই তিনিখন চুবুৰীয়া দেশৰ ৬ টা অনা-মুছলিম সম্প্ৰদায়ৰ লোকক নাগৰিকত্ব প্ৰদানৰ সুবিধা দিয়ে। গৃহ মন্ত্ৰালয়ৰ এজন বিষয়াই জানিবলৈ দিয়া মতে, এই সংশোধনৰ মূল উদ্দেশ্য হৈছে নাগৰিকত্ব সম্পৰ্কীয় বিষয়বোৰত পৰীক্ষা-নিৰীক্ষা প্ৰক্ৰিয়া অধিক শক্তিশালী কৰা আৰু ইয়াৰ সঠিক ৰেকৰ্ড বজাই ৰখা। ইয়াৰ উপৰিও ইলেক্ট্ৰনিক অভাৰচিজ চিটিজেন অব ইণ্ডিয়া অৰ্থাৎ ই-অচিআই কাৰ্ড, অনলাইন আবেদন ব্যৱস্থা আৰু নাবালকৰ দ্বৈত পাছপ’ৰ্ট সম্পৰ্কীয় নিয়মসমূহো পূৰ্বতকৈ অধিক কঠোৰ কৰা হৈছে।
মন কৰিবলগীয়া যে পশ্চিম বংগৰ নিৰ্বাচন সমাপ্ত হোৱাৰ পিছতেই এই চৰকাৰী জাননী জাৰি কৰা হৈছে। পশ্চিম বংগৰ মতুৱা সম্প্ৰদায়ৰ বহু লোকৰ ওচৰত প্ৰয়োজনীয় নথি-পত্ৰ নাই বুলি জানিব পৰা গৈছে। এই সম্প্ৰদায়টোক বিজেপিৰ এটা ডাঙৰ সমৰ্থক গোট হিচাপে গণ্য কৰা হয়। বিভিন্ন জিলাত স্থাপন কৰা নাগৰিকত্ব সাহায্য শিবিৰসমূহত দলীয় কৰ্মীসকলে আবেদনকাৰীসকলক প্ৰপত্ৰ পূৰণ কৰা আৰু সহায়ক নথি-পত্ৰ সংগ্ৰহ কৰাত সহায় কৰি আছিল। অৱশ্যে মতুৱা সম্প্ৰদায়ৰ কিছুমান সদস্যই তেওঁলোকৰ বাংলাদেশী মূলৰ পৰিচয় প্ৰকাশ কৰিবলগীয়া হোৱা বিষয়টোক লৈ চিন্তা প্ৰকাশ কৰিছে আৰু আবেদন প্ৰক্ৰিয়াত সহায়ৰ বাবে মাচুল দিবলগীয়া হোৱা বুলিও ক্ষোভ প্ৰকাশ কৰিছে।
