গুৱাহাটীৰ আমিনগাঁওস্থিত উত্তৰ গুৱাহাটীৰ ৰাজহ চক্ৰক কেন্দ্ৰ কৰি বৃহৎ পৰিমাণৰ মাটি কেলেংকাৰীৰ অভিযোগ উত্থাপন কৰিছে কুটুম সুৰক্ষা পৰিষদে। সংগঠনটোৱে এই সন্দৰ্ভত ৰাজহ চক্ৰ বিষয়াৰ ওচৰত লিখিত অভিযোগ দাখিল কৰি মাটি ক্ৰয়-বিক্ৰয়ৰ বিভিন্ন তথ্য ৰাজহুৱা কৰাৰ দাবী জনাইছে।
৩ আগষ্টত দাখিল কৰা পত্ৰখনত কুটুম সুৰক্ষা পৰিষদৰ সভাপতি সত্যৰঞ্জন বৰাই অভিযোগ কৰে যে ৰাজহ চক্ৰৰ অধীনত বহু কেইগৰাকী সাধাৰণ লোকক অতি সংবেদনশীলভাৱে মাটিৰ লেনদেন সন্দৰ্ভত তথ্য বিচৰা হৈছিল যদিও সঠিক তথ্য লাভ কৰা হোৱা নাই। তেওঁ কয় যে বিষয়টোৰ গুৰুত্ব অনুধাৱন কৰি প্ৰথমে সাধাৰণভাৱে কিছু তথ্য বিচৰা হৈছিল আৰু প্ৰয়োজন সাপেক্ষে RTI Act, 2005-ৰ অধীনত আনুষ্ঠানিকভাৱে তথ্য বিচৰা হ’ব।
পত্ৰখনত বিশেষকৈ ৰাজহ চক্ৰৰ বৰবংশৰ মৌজাৰ আলিপুৰ গাঁৱৰ দাগ নম্বৰ ২২০-ৰ অন্তৰ্গত মাটিৰ বিষয়ে প্ৰশ্ন উত্থাপন কৰা হৈছে। অভিযোগ অনুসৰি, উক্ত দাগত মুঠ ১১ বিঘা মাটিৰ ভিতৰত প্ৰায় ১৬ বিঘা মাটি বিক্ৰী হোৱা বুলি তথ্য পোৱা গৈছে, তাৰ স্পষ্টতা বিচৰা হৈছে। লগতে মাটিখিনি কাৰ নামত, কোন ব্যক্তি বা ব্যৱসায়িক গোষ্ঠীৰ নামত বিক্ৰী কৰা হৈছিল আৰু ইয়াৰ সৈতে কোনো পৰিয়াল বা ব্যক্তিগত স্বাৰ্থ জড়িত আছে নেকি, সেয়াও জানিবলৈ বিচৰা হৈছে।
ইয়াৰ উপৰি দাগ নম্বৰ ২২২-ৰ ক্ষেত্ৰতো প্ৰায় ৯.৫ বিঘা মাটি কোনো এজন ব্যক্তি বা তেওঁৰ সম্পৰ্কীয় লোকৰ হাতত বিক্ৰী কৰা হৈছিল নেকি আৰু মাটিখিনি ক’ৰ পৰা ক্ৰয় কৰা হৈছিল, সেই সন্দৰ্ভতো প্ৰশ্ন উত্থাপন কৰিছে সংগঠনটোৱে।
কেৱল এই দুটা দাগতে সীমাবদ্ধ নহৈ ৰাজহ চক্ৰৰ অধীনত আন বহু দাগত দখল আৰু মাটি বিক্ৰীৰ খবৰ লাভ কৰাৰ দাবী কৰিছে কুটুম সুৰক্ষা পৰিষদে। পত্ৰখনত অসমৰ মুখ্যমন্ত্ৰীয়ে মাটি জালিয়াতি আৰু মাটি দালালিৰ বিৰুদ্ধে কঠোৰ ব্যৱস্থা গ্ৰহণৰ কথা উল্লেখ কৰি এনে কাৰ্যকলাপ অব্যাহত থকাটো দুৰ্ভাগ্যজনক বুলি মন্তব্য কৰা হৈছে।
সংগঠনটোৰ অভিযোগ অনুসৰি, সুমন আহমেদ নামৰ এগৰাকী লোক মাটি দালালিৰ সৈতে জড়িত থকাৰ তথ্যও তেওঁলোকৰ হাতত আছে। পত্ৰখনত সুমন আহমেদে দালালি কৰি উমেশ কুমাৰ বেৰীয়াৰ নামত মাটি বিক্ৰী কৰাৰ তথ্য আৰু প্ৰমাণ সংগঠনটোৰ হাতত আছে দাবী কৰা হৈছে।
এই সমগ্ৰ বিষয়টো তদন্ত কৰি সংশ্লিষ্ট মাটি লেনদেনৰ নথি-পত্ৰ আৰু তথ্য স্পষ্টভাৱে প্ৰকাশ কৰিবলৈ ৰাজহ চক্ৰ কৰ্তৃপক্ষৰ সহযোগিতা বিচাৰিছে কুটুম সুৰক্ষা পৰিষদে। সংগঠনটোৱে বিষয়টো পৰৱৰ্তী সময়ত কেনেদৰে আগবঢ়াব, সেয়া কৰ্তৃপক্ষৰ পদক্ষেপৰ ওপৰত নিৰ্ভৰ কৰিব বুলি জানিবলৈ দিছে।
