শনিবাৰে পুৱতি নিশা লখিমপুৰ জিলাৰ নাওবৈচাৰ দ’লহাট তিনিআলিৰ শিঙৰা দলঙৰ সমীপত সংঘটিত এক ভয়ংকৰ পথ দুৰ্ঘটনাই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰিছে। গুৱাহাটীৰ পৰা মাজুলীৰ কমলাবাৰী অভিমুখে গৈ থকা ‘য়াত্ৰা’ (YATRA) ট্ৰেভেলছৰ এখন নৈশ বাছে নিয়ন্ত্ৰণ হেৰুৱাই হঠাৎ পথৰ কাষৰ এজোপা গছত প্ৰচণ্ড জোৰেৰে খুন্দা মৰাৰ ফলত বাছখন বাগৰি পৰে। এই শোকাৱহ দুৰ্ঘটনাটোত মাজুলীৰ গেৰেকী পোহাৰদিয়া গাঁৱৰ নিবাসী দীপজ্যোতি বৰা নামৰ এজন যুৱকৰ কৰুণ মৃত্যু হয়। যুৱকজনে গুৱাহাটীত এটা চাকৰিৰ পৰীক্ষা দি স্বগৃহলৈ উভতি আহি থকা অৱস্থাতে এই অঘটন ঘটে।
প্ৰাপ্ত তথ্য অনুসৰি, মাজুলীৰ কেশৱৰাম বৰা উচ্চতৰ মাধ্যমিক বিদ্যালয়ৰ কম্পিউটাৰ শিক্ষকৰ খালী পদৰ বাবে অনুষ্ঠিত এখন পৰীক্ষাত অৱতীৰ্ণ হ’বলৈ দীপজ্যোতিয়ে যোৱা বৃহস্পতিবাৰে গুৱাহাটীলৈ গৈছিল। শুকুৰবাৰে নিশা প্ৰায় ৯ বজাত পৰিয়ালৰ লোকৰ সৈতে তেওঁৰ অন্তিমবাৰৰ বাবে কথা হৈছিল। চাকৰিটোৰ অগ্ৰগতিৰ বিষয়ে জানিবলৈ বাট চাই থকা পৰিয়ালৰ লোকে শনিবাৰে পুৱা ৫ বজাত যুৱকজনক বাৰে বাৰে ফোন কৰাৰ পাছতো কোনো সঁহাৰি লাভ নকৰাত তেওঁলোকৰ মাজত হাহাকাৰৰ সৃষ্টি হয়। ইফালে, দুৰ্ঘটনা সংঘটিত হোৱাৰ লগে লগে স্থানীয় ৰাইজে ঘটনাস্থলীত উপস্থিত হৈ বাছখনৰ ভিতৰত আৱদ্ধ হৈ থকা আহত যাত্ৰীসকলক ততাতৈয়াকৈ উদ্ধাৰ কৰি লখিমপুৰ অসামৰিক চিকিৎসালয়লৈ প্ৰেৰণ কৰে।
জীৱনৰ এক নতুন আশা বুকুত বান্ধি চাকৰিৰ সন্ধানত যোৱা দীপজ্যোতিৰ এনে আকস্মিক আৰু অকাল মৃত্যুত পিতৃ-মাতৃ তথা পৰিয়ালবৰ্গ সম্পূৰ্ণৰূপে ভাগি পৰিছে। এই খবৰ বিয়পি পৰাৰ লগে লগে সমগ্ৰ মাজুলীৰ লগতে গেৰেকী পোহাৰদিয়া গাঁৱত গভীৰ শোকৰ ছাঁ পৰিছে। দুৰ্ঘটনাৰ পাছত যুৱকজনৰ নশ্বৰ দেহ স্বগৃহলৈ লৈ অহাৰ সময়ত এক শোকাকুল পৰিৱেশৰ সৃষ্টি হয়। মাজুলী জিলা ছাত্ৰ সন্থা, কোচ ৰাজবংশী ছাত্ৰ সন্থা আৰু মাজুলী জিলা আপকু (AAPCU)কে ধৰি বিভিন্ন দল-সংগঠন তথা স্থানীয় ৰাইজে উপস্থিত হৈ প্ৰয়াত যুৱকজনলৈ শেষ শ্ৰদ্ধাঞ্জলি জ্ঞাপন কৰে।
এই শোকাৱহ ঘটনাৰ পাছতে মাজুলী জিলা ছাত্ৰ সন্থাই তীব্ৰ প্ৰতিক্ৰিয়া ব্যক্ত কৰিছে। সংগঠনটোৱে দুৰ্ঘটনাটোৰ এক উচ্চস্তৰীয় তদন্তৰ দাবী জনোৱাৰ লগতে যাত্ৰীৰ সুৰক্ষা সুনিশ্চিত কৰিবলৈ প্ৰশাসনক কঠোৰ ব্যৱস্থা গ্ৰহণৰ আহ্বান জনাইছে। নৈশ বাছসমূহৰ চলাচলৰ ক্ষেত্ৰত ঠায়ে ঠায়ে নিয়মীয়া তালাচী চলোৱা আৰু প্ৰতিখন নৈশ বাছতে বাধ্যতামূলকভাৱে তিনিজনকৈ চালক ৰখাৰ ব্যৱস্থা কৰিবলৈ ছাত্ৰ সন্থাই দাবী উত্থাপন কৰিছে।
