তিনিচুকীয়াৰ মাকুম আৰক্ষী থানাৰ আৰক্ষীৰ এটা দলে চিআৰপিএফৰ ৬৮ বেটেলিয়নৰ সহযোগত প্ৰায় ৯০০ গ্ৰাম ব্ৰাউন ছুগাৰ জব্দ কৰিবলৈ সক্ষম হোওৱাটোত এটা বিৰাট সাফল্য হিচাপে বিৱেচিত হৈছে। উক্ত ব্ৰাউন ছুগাৰখিনি লৈ অহা ৩জন ড্ৰাগ সৰবৰাহকাৰী (এওঁলোকৰ এগৰাকী ডীলাৰ) আৰক্ষীয়ে গ্ৰেপ্তাৰ কৰে।
এটা নিৰ্ভৰযোগ্য সূত্ৰৰ পম খেদি যুটীয়া তালাচী দলটোৱে ৩৮নং ৰাষ্ট্ৰীয় ঘাইপথৰ ডিগবৈ-মাকুম পথত তিনিচুকীয়া বাইপাছৰ ওচৰত এই সন্দেহজনক ব্ৰাউন ছুগাৰখিনি কঢ়িয়াই নিয়া এখন এল্টো গাড়ীসহ ৩জন লোকক গ্ৰেপ্তাৰ কৰে। অভিযুক্ত কেইজন হৈছে বৰদুমছা মিহলি ঋতু গাঁৱৰ লখি নেওগ, অৰুণাচলৰ মিয়াওৰ টম্বা আলী তেওঁলোকৰ মহিলা সহযোগী বৰদুমছাৰ শ্ৰীমতী দীপ্তি বৰা। জব্দ কৰা ড্ৰাগখিনিৰ বজাৰ মূল্য প্ৰায় ৮ লাখ টকা হ’ব বুলি আৰক্ষীৰ সূত্ৰই জনাইছে।
সূত্ৰটোৱে জনাইছে যে এই নিষিদ্ধ ড্ৰাগখিনি নিয়মীয়া গ্ৰাহকৰ ওচৰত বিক্ৰি কৰাৰ বাবে লৈ যোৱা হৈছিল। আৰক্ষী সূত্ৰটোৱে আৰু জনাইছে যে ডিব্ৰুগড়ৰ পৰা নিষিদ্ধ ড্ৰাগৰ এটা বিৰাট ছালান আহি কিছু দিনৰ পূৰ্বে ডিগবৈ, বৰদুমছা, জাগুন, কৰছিং আৰিউ মিয়াওৰ সীমান্ত এলেকাত প্ৰৱেশ কৰোৱা হৈছে।
ইতিমধ্যে তিনিচুকীয়া জিলাৰ আৰক্ষী অধীক্ষক মুগ্ধজ্যোতি মহন্তই মাকুম আৰক্ষীৰ এই সফলতাৰ ভূয়সী প্ৰশংসা কৰে আৰু কয় যে ৰাইজ আৰু ড্ৰাগ বিৰোধী সংস্থাসমূহৰ অকুণ্ঠ সহযোগিতাতহে ড্ৰাগছৰ বিপক্ষে চলা যুদ্ধখনত সফলতা অৰ্জন কৰিব পৰা যাব।
মাকুম আৰক্ষী থানাৰ ভাৰপ্ৰাপ্ত বিষয়া ভাস্কৰ শইকীয়াই জনাইছে যে এনডিপিএছ আইনৰ ২১(গ) ধাৰা অনুসৰি মাকুম থানাত এটা গোচৰ (২৪৭/১৮) পঞ্জীয়ন কৰা হৈছে। প্ৰতিৱেদন লিখাৰ সময়ত এই সম্পৰ্কে এটা অনুসন্ধান আৰম্ভ কৰা হৈছে।
