মঙলবাৰে দিল্লীত ইণ্ডিয়া মিত্ৰজোঁটৰ বৈঠক বহিব। বিৰোধী নেতাসকলে বৈঠকত মিলিত হৈ অহা বছৰ লোকসভা নিৰ্বাচনত বিজেপিৰ বিৰুদ্ধে এজেণ্ডা প্ৰস্তুত কৰাৰ সিদ্ধান্ত ল’ব। তাৰ আগতে পুৱা ১০ বজাত কংগ্ৰেছৰ ৰাষ্ট্ৰীয় সভাপতি মল্লিকাৰ্জুন খাৰ্গেৰ ঘৰত বিৰোধী সংসদীয় দলৰ নেতাৰ এখন বৈঠক অনুষ্ঠিত হব। সাংসদসকলৰ অভূতপূৰ্ব নিলম্বনৰ ঘটনাক লৈয়েই খাৰ্গে এই বৈঠক আহ্বান কৰিছে।
সূত্ৰ অনুসৰি, ৰাজ্যসভা আৰু লোকসভাৰ ৭৮ গৰাকী সাংসদক বিশৃংখলতাৰ অভিযোগত সোমবাৰে নিলম্বন কৰা হৈছে। ইয়াৰ পূৰ্বে ১৪ জন সাংসদক নিলম্বন কৰা হৈছিল। অৰ্থাৎ চলিত অধিবেশনত মুঠ ৯২ জন সাংসদক নিলম্বন কৰা হৈছে।
অভূতপূৰ্ব এই ঘটনাত কেন্দ্ৰৰ বিৰুদ্ধে প্ৰতিবাদৰ ৰূপৰেখা নিৰ্ধাৰণ কৰিবলৈ খাৰ্গে বিৰোধী আটাইকেইটা সংসদীয় দলৰ নেতাৰ সৈতে বৈঠকত মিলিত হ’বলৈ ওলাইছে। সাংসদ নিলম্বনৰ ক্ষেত্ৰত বিৰোধীয়ে ল’বলগীয়া ব্যৱস্থা সন্দৰ্ভত এই বৈঠকতে চূড়ান্ত কৰা হ’ব।
লগতে পঢ়কঃ চীনত শক্তিশালী ভূমিকম্প; শতাধিক লোকৰ মৃত্যু, আহত বহুলোক
ইতিমধ্যে সাংসদৰ এটা অংশই বিৰোধী সাংসদসকলক একত্ৰিত কৰি অধিৱেশনৰ বাকী থকা দিনবোৰত অধিৱেশন বৰ্জন কৰাৰ প্ৰস্তাৱ আগবঢ়াইছে। এই প্ৰস্তাৱ সন্দৰ্ভত বৈঠকতে চূড়ান্ত সিদ্ধান্ত লোৱা হ’ব। এই বৈঠকৰ অন্তত বিৰোধী সংসদীয় দলৰ নেতা আৰু নিলম্বিত সাংসদসকলে গান্ধীৰ প্ৰতিমূৰ্তি পৰিদৰ্শন কৰিব। ইয়াৰ পাছতে বিৰোধী সংসদীয় দলৰ নেতাসকলে বিজয় চ’কত সংবাদমেল অনুষ্ঠিত কৰিব৷ মুঠতে মঙলবাৰৰ দিনটোত ৰাজধানীখন ব্যস্ত হৈ পৰিব।
উল্লেখ্য যে যোৱা বুধবাৰে লোকসভাত সংঘটিত আক্ৰমণৰ পিছৰে পৰা সংসদ ভৱনৰ নিৰাপত্তাক লৈ বিৰোধীয়ে প্ৰশ্ন উত্থাপন কৰিছে। লগতে এই ঘটনাত গৃহমন্ত্ৰী অমিত শ্বাহৰ বক্তব্য দাবী কৰি শ্লোগানেৰে উত্তাল কৰি তোলে। এই ঘটনাত চৰম বিশৃংখলতাৰ অভিযোগ উত্থাপন কৰি ইজনৰ পিছত সিজন সাংসদক নিলম্বন কৰা হৈছিল।
লগতে পঢ়কঃ ভাৰতক ‘অমৃত কাল’লৈ আগুৱাই নিবলৈ উৎপাদনৰ পৰিৱৰ্তে সেৱাৰ মূল্য শৃংখল উন্নীত কৰা প্ৰয়োজন: ৰঘুৰাম ৰাজন
যোৱা বৃহস্পতিবাৰে ১৪ গৰাকী বিৰোধী সাংসদক শীতকালীন অধিবেশনৰ বাকী সময়ছোৱাৰ বাবে নিলম্বন কৰা হৈছিল। ইয়াৰ পিছত সোমবাৰে একেটা অপৰাধৰ বাবে লোকসভা আৰু ৰাজ্যসভাৰ মুঠ ৭৮জন বিৰোধী সাংসদক একেধৰণে চলিত অধিৱেশনৰ বাকী সময়ছোৱাৰ বাবে নিলম্বন কৰা হয়। ৰাজনৈতিক পৰ্যবেক্ষকসকলে এইটো অভূতপূৰ্ব ঘটনা বুলি অভহিত কৰিছে।
