নতুন দিল্লীত কংগ্ৰেছ আৰু তৃণমূল কংগ্ৰেছ দলৰ মাজত একত্ৰীকৰণ হ’ব বুলি চলি থকা চৰ্চাক সম্পূৰ্ণৰূপে নাকচ কৰিছে তৃণমূল কংগ্ৰেছে। বিৰোধী মিত্ৰজোঁটৰ বৈঠকৰ পিছত মমতা বেনাৰ্জী আৰু ছোনিয়া গান্ধীৰ মাজত হোৱা বাৰ্তালাপক লৈ এই জল্পনা-কল্পনা তীব্ৰতৰ হৈ পৰিছিল। কিন্তু তৃণমূল কংগ্ৰেছৰ উচ্চস্তৰীয় সূত্ৰই স্পষ্ট কৰি দিছে যে দুই দলৰ মাজত বিলীনীকৰণ বা একত্ৰীকৰণক লৈ কোনো ধৰণৰ আলোচনা হোৱা নাই। দলটোৱে এই সমগ্ৰ বিষয়টোক কেৱল এক উৰা বাতৰি বুলি অভিহিত কৰিছে।
তৃণমূল কংগ্ৰেছৰ ভিতৰচৰাত চলি থকা ৰাজনৈতিক সংকট আৰু নেতাৰ পদত্যাগৰ মাজতে দলৰ সাংসদ অভিষেক বেনাৰ্জীয়ে ৰাহুল গান্ধীক সাক্ষাৎ কৰে। ইয়াৰ পূৰ্বে তৃণমূল কংগ্ৰেছৰ প্ৰধান মমতা বেনাৰ্জীয়ে নতুন দিল্লীত কংগ্ৰেছৰ সংসদীয় দলৰ মুৰব্বী ছোনিয়া গান্ধীক তেওঁৰ বাসভৱনত সাক্ষাৎ কৰিছিল। এই বৈঠকত দুই নেত্ৰীয়ে অতি আন্তৰিকতাৰে বাৰ্তালাপ কৰে। বৈঠকত মমতা বেনাৰ্জীয়ে বিৰোধী ঐক্যৰ ওপৰত গুৰুত্ব আৰোপ কৰে আৰু বিভিন্ন গুৰুত্বপূৰ্ণ সমস্যা সমাধানৰ বাবে আটাইকেইটা দলে একেলগে কাম কৰা উচিত বুলি মত প্ৰকাশ কৰে।
নিৰ্বাচনৰ পিছত মমতা বেনাৰ্জী আৰু ছোনিয়া গান্ধীৰ মাজত এইখন আছিল প্ৰথমখন বন্ধ দুৱাৰ বৈঠক। শেহতীয়া নিৰ্বাচনত হোৱা ফলাফল আৰু দলীয় কৰ্মীসকলৰ ওপৰত হোৱা আক্ৰমণৰ পিছত এই বৈঠক অনুষ্ঠিত হয়। বৈঠকত এই কথাৰ ওপৰতো আলোচনা হয় যে মিত্ৰজোঁটৰ নেতাসকলে ইজনে সিজনক সমালোচনা কৰাৰ পৰা বিৰত থাকিব লাগে। পূৰ্বৰ তুলনাত মমতা বেনাৰ্জীৰ এই স্থিতি এক ডাঙৰ পৰিৱৰ্তন বুলি ধৰা হৈছে, কাৰণ ইয়াৰ পূৰ্বে তেওঁ কংগ্ৰেছৰ অবিহনে এক সুকীয়া মঞ্চ গঢ়াৰ চেষ্টা কৰিছিল। কিন্তু বৰ্তমান পৰিস্থিতিত দল দুয়োটাই কেৱল একত্ৰিত হৈ কাম কৰাৰ হে সিদ্ধান্ত লৈছে আৰু একত্ৰীকৰণৰ বাতৰিক মিছা বুলি প্ৰমাণ কৰিছে।
