ফেচবুক মেচেঞ্জাৰত আৰম্ভ হৈছিল চ্যাট। নিশা নামৰ এগৰাকী মহিলা। ইনষ্টাগ্ৰামত তেওঁৰ নাম আছিল পুনম। পিছত ৰেলপথত উদ্ধাৰ হয় তেওঁৰ মৃতদেহ। প্ৰথমতে আৰক্ষীয়ে ইয়াক কেৱল দুৰ্ঘটনা বুলি ভাবিছিল। মৰণোত্তৰ পৰীক্ষাত মূৰত একাধিক গভীৰ আঘাত দেখা যায়। তেওঁক বাৰে বাৰে গধুৰ বস্তুৰে আঘাত কৰা হৈছিল।
ইয়াৰ পিছতে আৰক্ষীয়ে নিজা উদ্যোগত হত্যাকাণ্ডৰ তদন্ত আৰম্ভ কৰে। শেহতীয়াকৈ সমগ্ৰ দেশতে ব্যাপক চৰ্চিত গুজৰাটৰ ৰাজকোটৰ হত্যাকাণ্ডৰ গোচৰটোত অভিযুক্তক আৰক্ষীৰ জেৰাৰ সময়ত চাঞ্চল্যকৰ তথ্য পোহৰলৈ আহিছে। সেই ঘটনাত আৰক্ষীয়ে গ্ৰেপ্তাৰ কৰে পীয়ুষ নামৰ এজন ২০ বছৰীয়া যুৱকক। সোধা-পোছাৰ সময়ত তেওঁ কয় যে তেওঁ চ্যাট কৰা নিশা আৰু পুনম নামৰ মহিলাগৰাকী আচলতে এজন পুৰুষ। তেওঁৰ নাম আচলতে চন্দন। লিভ ইন ৰিলেচনতো আছিল দুয়ো। লিভ-ইনৰ সময়তো তেওঁলোকে জনা নাছিল।
যোৱা ২৫ জুনত প্ৰথমবাৰৰ বাবে এই ঘটনা পোহৰলৈ আহে। ৰাজকোটৰ এখন গাঁৱৰ ৰে’লপথত এটা উৱলি যোৱা মৃতদেহ উদ্ধাৰ হয়। মৃতদেহটোৰ পিন্ধন আছিল এখন শাৰী। মৰণোত্তৰ পৰীক্ষাৰ প্ৰতিবেদনত হত্যাৰ সন্দেহ প্ৰকাশ পোৱাৰ পিছতে আৰক্ষীয়ে তদন্ত আৰম্ভ কৰে।
চিচিটিভিৰ ফুটেজ আৰু অন্যান্য দিশ পৰীক্ষা কৰাৰ অন্তত উত্তৰ প্ৰদেশৰ বাসিন্দা পিয়ুষ কুমাৰ খাৰৱাৰ নামৰ এজন যুৱকক গ্ৰেপ্তাৰ কৰা হয়। জেৰাৰ সময়ত তেওঁ স্বীকাৰ কৰে যে চন্দন ওৰফে নিশা ওৰফে পুনমক মূৰত থেতেলিয়াই হত্যা কৰি মৃতদেহ ৰেলপথত পেলাই দিছিল।
আৰক্ষীৰ দাবী, চন্দনক মহিলা বুলি ভাবি পীয়ুষে চন্দনৰ লগত সম্পৰ্কত জড়িত হৈ পৰে। পিছত দুয়ো একেলগে থাকিবলৈ আৰম্ভ কৰিলে। কিন্তু ওচৰ চাপি অহাৰ কথা আহিলে ধৰ্মীয় বিশ্বাসৰ উদ্ধৃতি দি শাৰীৰিক সংস্পৰ্শৰ পৰা বাৰে বাৰে আঁতৰি গৈছিল চন্দনে। সম্পৰ্কটোৱে এটা ডাঙৰ মোৰ লয় যেতিয়া এদিন পীয়ুষে চন্দনক দাড়ি খুৰোৱা দেখিলে। তেতিয়াই তেওঁৰ সন্দেহ হ’ল আৰু গম পালে যে তেওঁ নাৰী বুলি বিশ্বাস কৰা মানুহগৰাকী আচলতে পুৰুষ। আৰক্ষীয়ে দাবী কৰিছে যে চন্দনে সমলিংগ সম্পৰ্কৰ উদ্দেশ্যে নিজৰ পৰিচয় লুকুৱাই ৰাখিছিল।
এই ঘটনাৰ পিছৰে পৰা দুয়োৰে মাজত প্ৰায়ে কাজিয়া আৰম্ভ হৈছিল। তদন্তকাৰীয়ে দাবী কৰিছে যে পীয়ুষে সম্পৰ্কৰ পৰা ওলাই আহিব বিচাৰিছিল। আৰক্ষীয়ে জনোৱা মতে, পিয়ুষে কামৰ বাবে হায়দৰাবাদ, উত্তৰ প্ৰদেশ, ৰাজস্থান আৰু তাৰ পিছত গুজৰাটৰ ৰাজকোট জিলালৈ গৈছিল যদিও চন্দনে তেওঁৰ পিছে পিছে বিভিন্ন ঠাইলৈ গৈ সম্পৰ্ক বজাই ৰাখিবলৈ চেষ্টা কৰিছিল।
অৱশেষত ২১ জুনত ৰাজকোটৰ পদভলা গাঁৱৰ এটা কাৰখানাত দুয়োৰে মাজত তীব্ৰ কাজিয়াৰ সৃষ্টি হয়। তদন্তকাৰীয়ে দাবী কৰা মতে, তাৰ পিছত পীয়ুষে চন্দনক ৰেলপথৰ কাষৰ নিৰ্জন স্থানলৈ লৈ গৈ ডাঙৰ ডাঙৰ শিলেৰে আঘাত কৰি হত্যা কৰে। পিছত শিলেৰে পুতি মৃতদেহটো লুকুৱাবলৈ চেষ্টা কৰা হয়।
