অ’নাৰ কিলিঙৰ নামত সংঘটিত অন্য এক জঘন্য হত্যাকাণ্ডৰ ঘটনা এইবাৰ পোহৰলৈ আহিছে। এইবাৰ এগৰাকী পিতৃয়ে নিজ কন্যাক হত্যা কৰি মৃতদেহ এটা ছুটকেছত ভৰাই পেলাই দিয়াৰ অভিযোগ উঠিছে।
উত্তৰ প্ৰদেশ আৰক্ষীয়ে প্ৰকাশ কৰা অনুসৰি যোৱা সপ্তাহৰ শুকুৰবাৰে উত্তৰ প্ৰদেশৰ মথুৰাৰ যমুনা এক্সপ্ৰেছৱেৰ সমীপত এগৰাকী ২২ বছৰীয়া যুৱতীৰ মৃতদেহ উদ্ধাৰ কৰা হৈছিল। কৰ্মৰত শ্ৰমিকে এটা ছুটকেছত মূৰ আৰু মুখত আঘাতৰ স্পষ্ট চিহ্ণ থকা এটা ৰক্তাক্ত মৃতদেহ উদ্ধাৰ কৰাৰ পিছতে আৰক্ষীক খবৰ দিয়ে।
ঘটনাস্থলীত আৰক্ষীয়ে উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষা বাবে প্ৰেৰণ কৰে।
দিল্লীৰ ২২ বছৰীয়া যুৱতীগৰাকীক পিতৃয়ে হত্যা কৰা বুলি উত্তৰ প্ৰদেশ আৰক্ষীয়ে আজি প্ৰকাশ কৰে। আৰক্ষীয়ে ছুটকেছটো উদ্ধাৰ কৰাৰ পিছতে ফোন ট্ৰেচিং আৰম্ভ কৰাৰ লগতে চিচিটিভিৰ ফুটেজ পৰীক্ষা কৰি অচিনাকি মৃতদেহটোৰ পৰিচয় উদ্ধাৰ কৰিবলৈ ছ’চিয়েল মিডিয়াও ব্যৱহাৰ কৰিছিল।
ইয়াৰ পাছতে যোৱা দেওবাৰে পুৱা এটা অজ্ঞাত ফোন কলৰ পৰা যুৱতীগৰাকীৰ বিষয়ে সুনিৰ্দিষ্ট তথ্য লাভ কৰাৰ পাছতে আক্ষীয়ে মৃত যুৱতীগৰাকী দিল্লীৰ বদৰপুৰৰ নিৱাসী ২২ বছৰীয়া আয়ুশী চৌধুৰী বুলি নিশ্চিত হয়।
প্ৰকাশিত সূত্ৰ অনুসৰি আয়ুশী চৌধুৰীৰ পিতৃ নীতেশ যাদৱে অনুজ্ঞাপত্ৰ থকা মাৰণাস্ত্ৰেৰে গুলীয়াই কন্যাক হত্যা কৰে। মৃতদেহটো চিনাক্ত কৰিবলৈ যোৱাৰ সময়তে আয়ুশীৰ পিতৃ-মাতৃক আৰক্ষীয়ে জেৰা কৰাৰ সময়তে পিতৃয়ে হত্যা কৰা বুলি নিশ্চিত হয়।
আৰক্ষীয়ে প্ৰকাশ মতে কন্যাই অন্য জাতিৰ এক যুৱকেৰে বিবাহ কৰাৰ বাবেই পিতৃয়ে হত্যা কৰে। কন্যাক হত্যা কৰাৰ পাছত মাতৃয়েও কন্যাৰ মৃতদেহটো এটা ছুটকেছত ভৰাই পেলাই দিয়াৰ সময়ত স্বামীক সহযোগ কৰিছিল।
ইতিমধ্যে এই হত্যাকাণ্ডৰ সন্দৰ্ভত আৰক্ষীয়ে আয়ুশী চৌধুৰীৰ পিতৃ-মাতৃ দুয়োকে গ্ৰেপ্তাৰ কৰি তদন্ত অব্যাহত ৰাখিছে।
আৰক্ষীয়ে লগতে প্ৰকাশ কৰিছে যে নীতেশ যাদৱে চৰকাৰী চাকৰি লাভ কৰাৰ পাছতে উত্তৰ প্ৰদেশৰ গোৰখপুৰৰ বালুনীৰ পৰা ৰাষ্ট্ৰীয় ৰাজধানী দিল্লীলৈ প্ৰব্ৰজন কৰি তাতে স্থায়ীভাৱে বসবাস কৰি আহিছিল।