সোমবাৰে বিয়লি মণিপুৰৰ উখৰুল জিলাৰ নুংশাং কং (লুংশাং নদী)ৰ সমীপত সন্দেহযুক্ত উগ্ৰপন্থীয়ে চলোৱা এক অতৰ্কিত আক্ৰমণত ৪০ অসম ৰাইফলছৰ দুজন জোৱান নিহত হয়। উখৰুল জিলা সদৰৰ পৰা প্ৰায় ১৭ কিলোমিটাৰ দূৰত্বত বিয়লি প্ৰায় ৩.৫০ বজাত জোৱানসকলে ৪০ অসম ৰাইফলছৰ ছাংছাক বেটেলিয়নৰ মুখ্য কাৰ্যালয়লৈ উভতি আহি থকাৰ সময়তে এই আক্ৰমণৰ ঘটনা সংঘটিত হয়।
এই আক্ৰমণত প্ৰাণ হেৰুওৱা জোৱান দুজনক ৱাৰেণ্ট অফিচাৰ বলৱন্ত সিং আৰু হাৱিলদাৰ চি এম সিং বুলি চিনাক্ত কৰা হৈছে। জানিব পৰা মতে, হাৱিলদাৰ চি এম সিঙে বাহনখন চলাই আছিল আৰু দুয়োগৰাকী জোৱান এই এম্বুচত নিহত হয়। উগ্ৰপন্থীৰ আক্ৰমণৰ লগে লগে নিৰাপত্তাৰক্ষীয়েও গুলীচালনাৰে উচিত প্ৰত্যুত্তৰ দিয়ে আৰু দুয়োপক্ষৰ মাজত প্ৰায় দুঘণ্টা ধৰি সংঘৰ্ষ অব্যাহত থাকে। এই গুলীয়াগুলীৰ সময়ত সমীপৰ ধাননি পথাৰত কাম কৰি থকা কৃষকসকলে প্ৰাণৰ মমতাত উক্ত স্থানৰ পৰা পলায়ন কৰে।
ঘটনাৰ খবৰ পোৱাৰ লগে লগে সমগ্ৰ অঞ্চলটোত অতিৰিক্ত নিৰাপত্তাৰক্ষী মোতায়েন কৰা হয় আৰু আক্ৰমণকাৰীসকলক বিচাৰি উলিয়াবলৈ এক ব্যাপক তালাচী অভিযান আৰম্ভ কৰে। বৰ্তমানলৈকে কোনো উগ্ৰপন্থী সংগঠনে এই আক্ৰমণৰ দায়িত্ব স্বীকাৰ কৰা নাই। উল্লেখযোগ্য যে, উখৰুল আৰু ইয়াৰ পাৰ্শ্বৱৰ্তী কামজং জিলাত নিৰাপত্তা ব্যৱস্থা কটকটীয়া কৰাৰ লগতে সমন্বয় ৰক্ষাৰ প্ৰচেষ্টা অব্যাহত থকাৰ সময়তে এই আক্ৰমণৰ ঘটনা সংঘটিত হৈছে।
বৰ্তমান ঘটনাস্থলী আৰু ইয়াৰ আশে-পাশে থকা অঞ্চলসমূহত অতিৰিক্ত নিৰাপত্তাৰক্ষীৰ দ্বাৰা নিৰন্তৰ নিৰীক্ষণ আৰু অভিযান চলাই থকা হৈছে। আক্ৰমণকাৰীৰ সন্ধানত অভিযান তীব্ৰতৰ কৰি তোলাৰ সমান্তৰালভাৱে সমগ্ৰ জিলাখনতে পৰিস্থিতি নিয়ন্ত্ৰণত ৰখাৰ বাবে প্ৰশাসনে যাৱতীয় সুৰক্ষামূলক আৰু সতৰ্কতামূলক পদক্ষেপ গ্ৰহণ কৰিছে।
