কোভিড প্ৰতিৰোধৰ বাবে সুনিৰ্দিষ্ট ৰাজ্যিক নীতি প্ৰস্তুত কৰণৰ দাবীৰে মণিপুৰৰ ছয়টাকৈ ছাত্ৰ সংগঠনে বুধবাৰে ইম্ফলৰ কাৱাকেইথেলত প্ৰতিবাদী অনশন কাৰ্য্যসূচী গ্ৰহণ কৰে।
সম্পুৰ্ণ কোভিড প্ৰট’কল মানি ছাত্ৰ সংগঠন কেইটাই দ্বিতীয় দিনৰ বাবেও অনশন কাৰ্য্যসূচী অৱ্যাহত ৰাখে।
অপুনবা ইৰিপাক্কি মাহেইৰোই চিংপাংলুপ, সদৌ মণিপুৰ ছাত্ৰ সন্থা, গণতান্ত্ৰিক ছাত্ৰ সংহতি মণিপুৰ, কাংগলেইপাক ছাত্ৰ সন্থা, মণিপুৰী ষ্টুডেণ্টছ ফেডাৰেশ্যন আৰু কাংগলেইপাক ছাত্ৰ সংস্থাই এই অনশন কাৰ্য্যসূচীত অংশগ্ৰহণ কৰে।
সদৌ মণিপুৰ ছাত্ৰ সন্থাই সংবাদ মাধ্যমৰ আগত মণিপুৰ চৰকাৰে ৰাজ্যখনত কোভিড নিয়ন্ত্ৰণৰ বাবে সুনিৰ্দিষ্ট নীতি গ্ৰহণেৰে আগবাঢ়িবই লাগিব বুলি দাবী জনায়।
আনহাতে, যদিহে চৰকাৰে ছাত্ৰ সংগঠনকেইটাৰ দাবী সমূহ নামানে তেন্তে অনাগত দিনত প্ৰৱল প্ৰতিৰোধ গঢ়ি তোলা হ’ব বুলিও ছাত্ৰ সংগঠন কেইটাই উল্লেখ কৰে।
মণিপুৰৰ ছাত্ৰ সংগঠন কেইটাই এসপ্তাহৰ ভিতৰত চৰকাৰক ৰাজ্যখনত ৫০০ ৰ অধিক বিচনাযুক্ত কোভিড চিকিৎসালয় গঢ়ি তোলাৰ বাবে দাবী জনায়।
ইয়াৰ পূৰ্বে মণিপুৰৰ ছাত্ৰ সংগঠন সমূহে চৰকাৰৰ ওচৰত ১২ টা দাবী যুক্ত এখন পত্ৰ প্ৰেৰণ কৰিছিল।
এই দাবী সমূহৰ ভিতৰত পৰ্যাপ্ত কোভিড কেয়াৰ কেন্দ্ৰ স্থাপন, অক্সিমিটাৰৰ যোগান ইত্যাদি অন্তৰ্ভূক্ত আছিল।
