অসমৰ নিজস্বতাহীন বৰমূৰীয়াসকলে পদলেহনৰ নামত ৰাজ্যখনৰ বিভিন্ন অনুষ্ঠান-প্ৰতিষ্ঠান, বাট-ঘাট আদি নেহৰু, ৰাজীৱ গান্ধী, ইন্দিৰা গান্ধী, বাজপেয়ী, দীনদয়াল আদিৰ নামত নামাকৰণ কৰাৰ প্ৰতিযোগিতাত নমাৰ সময়তে মণিপুৰৰ চৰকাৰে নিজৰ ৰাজ্যৰ সফল ব্যক্তিৰ নামত পথ নামকৰণেৰে দেখুৱালে অনুকৰণীয় দৃষ্টান্ত। ৰাজ্যখনৰ চৰকাৰখনে ছবাৰকৈ মহিলা বিশ্ব বক্সিং চেম্পিয়ন হোৱা এম চি মেৰিকমৰ নামত নামকৰণ কৰিছে এটা পথ।
জানিব পৰা মতে চেম্পিয়ন বক্সাৰগৰাকীয়ে স্থায়ীভাৱে পৰিয়ালৰ লগত বসবাস কৰা পশ্চিম ইম্ফল ডি চি পথটো চৰকাৰে এম চি মেৰিকমৰ নামেৰে নামকৰণ কৰিছে। ১১ ডিচেম্বৰত ৰাজ্য চৰকাৰে বক্সাৰগৰাকীক সম্বৰ্ধনা জনোৱাৰ উদ্দেশ্যে আয়োজন কৰা এক অনুষ্ঠানত মুখ্য মন্ত্ৰী এন বীৰেন সিঙে এই কথা ঘোষণা কৰে।
মণিপুৰৰ খুমাম লেম্পাক স্প’ৰ্টছ কমপ্লেক্সত অনুষ্ঠিত সম্বৰ্ধনা অনুষ্ঠানত ছবাৰৰ মহিলা বিশ্ব বক্সিং চেম্পিয়ন মেৰিকমক ৰাজ্য চৰকাৰৰ তৰফৰ পৰা ‘মিথৈ লেইমা’ উপাধি প্ৰদান কৰাৰ লগতে ১০ লাখ টকাৰ চেকো প্ৰদান কৰা হয়।
সম্বৰ্ধনা অনুষ্ঠানত মুখ্য মন্ত্ৰী বীৰেন সিঙে নিজৰ ভাষণ প্ৰসংগত কয় যে মেৰিকমক আমাৰ ৰাজ্যৰ জীয়ৰী হিচাপে পোৱা বাবে আমি ভাগ্যবান তথা গৰ্বিত। আমি নতুনকৈ চিনাকি দিয়াৰ প্ৰয়োজন নাই, কাৰণ আজি সমগ্ৰ বিশ্বই তেওঁক চিনি পাই। এতিয়া ২০২০ টকিঅ’ অলিম্পিকত সফলতা অৰ্জনৰ বাবে তেওঁক মণিপুৰবাসীয়ে মৰম আৰু আশীৰ্বাদ কৰক।
আনহাতে ৰাজ্যসভাৰ সাংসদ হিচাপে মেৰিকমক বাচনি কৰা আৰু মণিপুৰত দেশৰ একমাত্ৰ ক্ৰীড়া বিশ্ববিদ্যালয় স্থাপন কৰাৰ সিদ্ধান্ত লোৱা বাবে মুখ্য মন্ত্ৰীগৰাকীয়ে প্ৰধান মন্ত্ৰী নৰেন্দ্ৰ মোদীকো ধন্যবাদ জনায়।
ইফালে উক্ত সম্বৰ্ধনা অনুষ্ঠানত বক্সাৰ মেৰিকমেও উপস্থিত লোকসকলৰ উদ্দেশ্যি ভাষণ আগবঢ়োৱা দেখা যায়। তেওঁ মানুহৰ মৰম, আশীৰ্বাদ তথা সহযোগিতা অবিহনে সফলতা অৰ্জন কৰাটো সম্ভৱ নহয় বুলি উল্লেখ কৰে। ইয়াৰ উপৰি মেৰিকমে অনুষ্ঠানত উপস্থিত থকা যুৱ খেলুৱৈসকলক অতি মনোযোগেৰে নিয়মীয়াকৈ অনুশীলন কৰি যাবলৈও আহ্বান জনায়।
উল্লেখযোগ্য যে মেৰিকমক সম্বৰ্ধনা জনোৱাৰ উদ্দেশ্যে ৰাজ্য চৰকাৰে আয়োজন কৰা অনুষ্ঠানত উপ মুখ্য মন্ত্ৰী ৱাই জয়কুমাৰ সিং, কেবিনেট মন্ত্ৰী টি এইচ বিশ্বজিৎ, এল জয়ন্তকুমাৰ, কৰম শ্যাম, এন কাইছি, ভি হেংখালিয়া, লেটপাও হাওকিপৰ লগতে বহুতো শীৰ্ষ পৰ্যায়ৰ বিষয়ববীয়া উপস্থিত থাকে।
