মণিপুৰৰ নিৰ্বাসিত মানৱাধিকাৰ সংগ্ৰামী বীণালক্ষ্মী নেপ্ৰামলৈ ‘আন্না পোলিটকোভস্কায়া’ বঁটা

মণিপুৰৰ সাহসী মানৱাধিকাৰ কৰ্মী তথা সাহিত্যিক বীণালক্ষ্মী নেপ্ৰামক মহিলা মানৱাধিকাৰ কৰ্মীক স্বীকৃতি প্ৰদান কৰা বিশিষ্ট বঁটা ‘আন্না পোলিটকোভস্কায়া’ বঁটাৰ বাবে নিৰ্বাচিত কৰা হৈছে। এই বঁটাটো ২০০৬ চনৰ ৭ অক্টোবৰত মস্কোত হত্যাৰ বলি হোৱা ৰাছিয়ান সাংবাদিক আন্না পোলিকোভস্কায়াৰ প্ৰতি সন্মানৰ চিন স্বৰূপে ‘ৰিচ অল উইমেন ইন ৱাৰ’(RAW in WAR) নামৰ সংস্থাটোৱে প্ৰদান কৰি আহিছে।  নেপ্ৰামৰ সৈতে এই বঁটাটো যৌথভাৱে লাভ কৰিব  বেলাৰুছৰ অনুসন্ধানমূলক সাংবাদিক শ্বেটলানা এলেক্সেইভিচে।

অহা দেওবাৰে আন্না পোলিটকোভস্কায়াৰ হত্যাৰ ১২ বছৰ পূৰ্ণ হোৱাৰ দিনটোতে বীণালক্ষ্মী আৰু আলেক্সেইভিচক এই বঁটাটো প্ৰদান কৰা হ’ব। অন্যায়, হিংসা আৰু সন্ত্ৰাসবাদৰ বিৰুদ্ধে সৰৱ কণ্ঠ তুলি প্ৰতিবাদ কৰাৰ বাবে তেওঁলোকক এই বঁটাৰ বাবে নিৰ্বাচিত কৰা হৈছে।

‘ৰিচ অল উইমেন ইন ৱাৰ’ সংস্থাৰ মনোনয়ন কমিটীখনৰ তৰফৰ পৰা প্ৰকাশিত এটা বিবৃতিত এইদৰে কোৱা হৈছে ‘বীণালক্ষ্মী নেপ্ৰাম আৰু শ্বেটলানা আলেক্সেইভিচে নিৰৱে কিন্তু সাহসেৰে যি দৰে  সংঘৰ্ষ-পীড়িত এলেকাত বাস কৰা মহিলাসকল সমৰ্থনত কণ্ঠ সৰৱ কৰিছে সেয়া জানিব পাৰি আমি তেওঁলোকৰ ওচৰত বিনম্ৰতাৰে মূৰ নত কৰিছোঁ।”

উল্লেখ্য যে বীণালক্ষ্মীয়ে নিৰস্ত্ৰীকৰণৰ সপক্ষে আৰু বৰ্ধিতহাৰত সামৰিকীকৰণৰ বিৰোধিতা কৰি ভাৰতৰ প্ৰথমটো নাগৰিক সংস্থা ‘কণ্ট্ৰোল আৰ্মছ ফাউণ্ডেশ্যন অব ইণ্ডিয়া’ (CAFI) স্থাপন কৰিছে।

২০০৭ চনত বীণালক্ষ্মীয়ে ‘মণিপুৰ উইমেন গান ছাৰভাইভৰ্ছ নেটৱৰ্ক’ স্থাপন কৰেয আৰু এই সংস্থাটোৱে প্ৰায় মণিপুৰৰ ৭০ বছৰীয়া সশস্ত্ৰ সংগ্ৰামত আগ্নেয়াস্ত্ৰৰ পৰা বাচি অহা প্ৰায় ২০,০০০ মহিলালৈ সহায়তা আগবঢ়াইছে।

বঁটা গ্ৰহণ কৰি বীণালক্ষ্মীয়ে কৈছে, মোক আৰু ২০১৫ চনৰ সাহিত্যত নবেল বিজয়িনী বেলাৰুছৰ শ্বেটলালা আলেক্সেইভিচক ‘আন্না পোলিকোভস্কায়া’ বঁটাৰ বাবে মনোনীত কৰাৰ বাবে ‘ৰিচ অল উইমেন ইন ৱাৰ’ সংস্থা আৰু গুণী বিচাৰকসকলক ধন্যবাদ জনাওঁ। ‘মণিপুৰ গান ছাৰভাইভৰ্ছ নেটৱৰ্ক’, ‘কণ্ট্ৰোল আৰ্মছ ফাউণ্ডেশ্যন অব ইণ্ডিয়া’ৰ হৈ এই বঁটাটো মই  আন্তৰিকতাৰে গ্ৰহণ কৰিছোঁ।