এইবাৰ ৰেল লাইন উৰাই দিলে মাওবাদীয়ে।
যাৰ ফলত বহু ষ্টেচনত আৱদ্ধ হৈ ৰ’বলগা হৈছে কেইবাখনো যাত্ৰীবাহী ট্ৰেইন।
ঝাড়খণ্ডৰ হাউৰা-মুম্বাই সংযোগী ৰেলপথত সংঘটিত হৈছে মাওবাদীৰ এই আক্ৰমণ।
বৰ্তমান যুদ্ধকালীন তৎপৰতাৰে ৰেল লাইন মেৰামতিৰ কাম কৰি থকা হৈছে।
জানিব পৰামতে, মাওবাদীৰ লক্ষ্য আছিল আজাদ হিন্দ এক্সপ্ৰেছ।
সেই অনুসৰি মাওবাদীয়ে চক্ৰধৰপুৰ ৰেলৱে’ ডিভিজনৰ লোটাপাহাৰ আৰু সোনুৱা ষ্টেচনৰ মাজভাগত ৰেল লাইনত লেণ্ডমাইন পুতি ৰাখে।
যোৱাৰাতি ২ বজাত এক বিস্ফোৰণত ৰেল লাইনৰ কিছু অংশ উৰি যায়।
যাৰ ফলত ৰেল লাইন ভাগি পৰে।
খবৰ পোৱাৰ লগে লগেই চক্ৰধৰপুৰ ডিভিজনে আৱদ্ধ হৈ ৰয় সকলো যাত্ৰীবাহী ট্ৰেইন।
ঘটনাস্থলীত উপস্থিত হয় জিলা আৰক্ষীৰ এটা দল।
প্ৰাপ্ত তথ্য অনুসৰি, যোৱাৰাতি এখন মালগাড়ীৰ চালকে প্ৰথমে বিস্ফোৰণৰ শব্দ শুনা পায়।
তেওঁ আৰক্ষী বিভাগক খবৰ দিয়াৰ পাছতে আৰক্ষী সষ্টম হৈ পৰে।
কাষৰ ষ্টেশ্যনত আৱদ্ধ কৰি দিয়া হয় আজাদ হিন্দ এক্সপ্ৰেছ।
ফলত অভিযানত সফল হ’ব নোৱাৰিলে মাওবাদী।
ৰেলৱে’ৰ তৰফৰ পৰা জনা গৈছে, অতি শীঘ্ৰেই ৰেল পৰিসেৱা স্বাভাৱিক হ’ব।