সংযুক্ত আৰব আমিৰশ্বাহীৰ এগৰাকী যুৱতীয়ে প্ৰথমবাৰৰ বাবে মিছ ইউনিভাৰ্ছ প্ৰতিযোগিতাত অংশগ্ৰহণ কৰিবলৈ ওলাইছে। ২৬ বছৰীয়া যুৱতীগৰাকীৰ নাম মৰিয়ম মহম্মদ। প্ৰতিযোগিতাখনত অংশগ্ৰহণ কৰিবলৈ তেওঁ কঠোৰ বাছনি প্ৰক্ৰিয়াৰ মাজেৰে পাৰ হ’বলগীয়া হৈছিল। অৱশেষত শ শ আবেদনকাৰীৰ মাজৰ পৰা তেওঁক নিৰ্বাচিত কৰা হয়।
শেহতীয়াকৈ মিছ ইউনিভাৰ্ছ ইউ এ ই-২০২৫ হিচাপে নিৰ্বাচিত হৈছে মৰিয়ম। অহা মাহত থাইলেণ্ডত অনুষ্ঠিত হ’বলগীয়া মিছ ইউনিভাৰ্ছ প্ৰতিযোগিতাত তেওঁ সংযুক্ত আৰব আমিৰশ্বাহীক প্ৰতিনিধিত্ব কৰিব।
মৰিয়ম মহম্মদে ফেশ্বন বিষয়ত অধ্যয়ন কৰি আছে। তেওঁ কয়, “ইউ এ ইয়ে মোক ডাঙৰ সপোন দেখাৰ আত্মবিশ্বাস দিছে। মই অভিলাষী আৰু কৌতুহলী মহিলাৰ কণ্ঠ হ’ব বিচাৰো। মিছ ইউনিভাৰ্ছ ইউ এ ই কেৱল সৌন্দৰ্য্য প্ৰতিযোগিতা নহয়, ইয়াৰ প্ৰভাৱ বহু দিশত পৰে।”
মৰিয়ামে অষ্ট্ৰেলিয়াৰ ছিডনী বিশ্ববিদ্যালয়ৰ পৰা অৰ্থনীতিত স্নাতক ডিগ্ৰী লাভ কৰিছে। বৰ্তমান ই এছ এম অ’ ডি ডুবাইত ফেশ্বন ডিজাইনৰ শিক্ষা গ্ৰহণ কৰি আছে। তেওঁ শিক্ষা, শিল্প আৰু সামাজিক সচেতনতাৰ মাজত এখন সেতু গঢ়ি তুলিছে। তেওঁৰ মিছন হৈছে দৰিদ্ৰতাৰ বিৰুদ্ধে যুঁজ দিয়া, নাৰীক সবলীকৰণ কৰা আৰু সমাজত প্ৰেম আৰু শান্তি গঢ়ি তোলা।
এমিৰেটছৰ যুৱ ডিজাইনাৰগৰাকীয়ে বহনক্ষম ফেশ্বনৰ ডিজাইন কৰিছে। ৰমজান আমান আৰু দ্য গিভিং ফেমিলি ইনিচিয়েটিভৰ দৰে দাতব্য কাৰ্যসূচীত অংশগ্ৰহণ কৰিছে। আন্তঃৰাষ্ট্ৰীয় মহিলা উদ্যোগীকৰণ কাৰ্যসূচীতো ইউ এ ইক প্ৰতিনিধিত্ব কৰি আহিছে।
মৰিয়ামৰ আগ্ৰহ পৰম্পৰা আৰু উদ্ভাৱনৰ এক নিখুঁত মিশ্ৰণ। ঈগল চৰাই চিকাৰ আৰু উট চালনাৰ পৰা আৰম্ভ কৰি বহনক্ষম ফেশ্বন আৰু বিশ্বব্যাপী সাংস্কৃতিক বিনিময়লৈকে তেওঁ পৰম্পৰা আৰু আধুনিকতাৰ সংমিশ্ৰণ ঘটাইছে। সংযুক্ত আৰব আমিৰশ্বাহীৰ মূল্যবোধক সৌন্দৰ্য্য আৰু দৃঢ়তাৰে মূৰ্ত কৰি তুলিছে আৰু প্ৰতিনিধিত্ব কৰিছে।
মৰিয়মে নতুন প্ৰজন্মৰ আমিৰাতৰ মহিলাসকলৰ বাবে প্ৰেৰণাৰ উৎস হ’ব বুলি আশা কৰিছে। ইউ এ ইৰ সবলীকৰণ, বহনক্ষমতা আৰু উদ্ভাৱনৰ কাহিনীক বিশ্বব্যাপী দৰ্শকৰ আগত প্ৰদৰ্শন কৰিবলৈও তেওঁ দৃঢ়প্ৰতিজ্ঞ।
মিছ ইউনিভাৰ্ছ ইউ এ ইৰ ৰাষ্ট্ৰীয় সঞ্চালিকা পপি কেপেলাই প্ৰতিযোগিতাখনত মৰিয়ামৰ জয়ত আনন্দ প্ৰকাশ কৰে। তেওঁ কয় যে মৰিয়মে কেৱল নিজৰ কথা আৰু দৃষ্টিভংগীৰ জৰিয়তেই নহয়, ইউ এ ইৰ ঐতিহ্য, সৱলীকৰণ আৰু বিশ্ব দৃষ্টিভংগী প্ৰকাশ কৰাৰ ক্ষমতাৰ জৰিয়তেও নিজকে পৃথক কৰি তুলিছে।
