এক মৰ্মান্তিক ঘটনাই আজি পুৱাই জোকাৰি গ’ল সমগ্ৰ ৰাজ্যকে।
কোকৰাঝাৰ জিলাৰ গোঁসাইগাঁওৰ তুলসীবিলত আজি পুৱাই উদ্ধাৰ হয় একেটা পৰিয়ালৰে পাঁচ সদস্যৰ ওলমি থকা মৃতদেহ।
গোসাইগাঁও মহকুমাৰ তুলসীবিল আৰক্ষী চকীৰ অন্তৰ্গত তুলসীবিল বজাৰত এক চাঞ্চল্য ঘটনা সংঘটিত হৈছে।তুলসীবিল বজাৰৰ বাসিন্দা নিৰ্মল পাল (৫২) পত্নী মল্লিকা পাল (৪৫)আৰু জীয়ৰী ক্ৰমে পূজা পাল( ২৫) নেহা পাল(১৭ ),স্নেহা পালে (১৫)যোৱা নিশা নিজ গূহতে চিপলৈ আত্মহত্যা কৰে।নিৰ্মল পালে তুলসীবিল বজাৰত ভাৰত গেছৰ ছাব এজেণ্ট হিচাপে কাম কৰি জীৱিকা নিৰ্বাহ কৰি আছিল।
এক বিশেষ সূত্ৰই প্ৰকাশ কৰা তথ্য অনুসৰি তুলসীবিল বজাৰ নিবাসী নিৰ্মল পালৰ পৰিয়ালৰ কোনো সদস্যই আজি পুৱা বহু দেৰিলৈকে শুই নুঠাত স্থানীয় লোকে পৰিয়ালটোক জগাবলৈ যায় যদিও কোনো সঁহাৰি নোপোৱাত বেৰৰ ফাঁকেৰে চাই পাঁচটা দেহ ওলমি থকা দেখিবলৈ পায় ।
লগে লগে স্থানীয় ৰাইজে আৰক্ষীক খবৰ দিয়ে। ঘটনাৰ খবৰ পোৱাৰ পিছতে আৰক্ষীৰ এটা দলে ঘটনাস্থলীলৈ গৈ মৃতদেহ কেইটা উদ্ধাৰ কৰে।
এই হৃদয় বিদাৰক ঘটনাৰ প্ৰকৃত কাৰণ এতিয়ালৈকে জানিব পৰা হোৱা নাই।
স্থানীয় একাংশ লোকে প্ৰকাশ কৰা মতে আৰ্থিক দৈন্যতাৰ বাবেই পাল দম্পতিয়ে সন্তানসহ আত্মহত্যাৰ পথ বাচি ল’ব পাৰে।
সকলো কথা আৰক্ষীৰ তদন্তৰ পিছতহে স্পষ্ট হ’ব।
স্হানীয় লোকে জনোৱা মতে নিৰ্মল পালে ব্যৱসায়ৰ বাবে যথেষ্ট পৰিমাণে ঋণগ্ৰস্ত হৈ পৰিছিল ।অবশেষত ঋণৰ চাপ সহ্য কৰিব নোবাৰি এই চৰম পথ বাচি লয় ।
পালৰ ডাঙৰ ছোৱালী পূজা পালে বিজ্ঞান শাখাৰ স্নাতক ডিগ্ৰী লাভ কৰি তুলসীবিল জাতীয় বিদ্যালয়ত শিক্ষিয়ত্ৰী হিচাপে কাম কৰি আছিল আৰু দ্বিতীয় ছোৱালী জনী উচ্চতৰ মাধ্যমিকৰ দ্বিতীয় বৰ্ষৰ ছাত্রী আৰু কনিষ্ঠ ছোৱালী স্নেহা পাল দশম শ্ৰেণীত অধ্যয়নৰত আছিল।একমাত্র ঋণৰ চাপ সহ্য কৰিব নোৱাৰি চৰম পথ বাচি লোৱা ঘটনাটোৰ সঠিক তদন্ত দাবী কৰিছে বিভিন্ন দল সংগঠনে।