গুৱাহাটী মহানগৰীৰ বামুনীমৈদামৰ অসম ঔদ্যোগিক প্ৰশিক্ষণ কেন্দ্ৰৰ ছাত্ৰাবাসত আজি সংঘটিত হৈছে এক ভয়ংকৰ অগ্নিকাণ্ড। বিয়লি প্ৰায় ৩ বজাত সংঘটিত অগ্নিকাণ্ডৰ ফলত ছাত্ৰাবাসটোৰ বিস্তৰ ক্ষতিসাধন হয়।
ছাত্ৰাবাসটোত থকা প্ৰশিক্ষণ কেন্দ্ৰৰ এজন ছাত্ৰই জানিবলৈ দিয়া মতে ছাত্ৰাবাসটোৰ ৰান্ধনিঘৰত মাংস বনাই থাকোতে চিলিণ্ডাৰ বিস্ফোৰণ হৈ অগ্নিকাণ্ডৰ সূত্ৰপাত হয়। তাৰ পাছতে ছাত্ৰাবাসৰ কোঠাসমূহ জুইয়ে আগুৰি ধৰাত তাত থকা আৱাসীসকলৰ মাজত এক আতংকময় পৰিস্থিতিৰ সৃষ্টি হয় বুলি তেওঁ লগতে জানিবলৈ দিয়ে।
উল্লেখযোগ্য যে জুইৰ সুত্ৰপাত হোৱাৰ সময়ত ছাত্ৰাবাসটোৰ কোঠাসমূহত ২২ জন ছাত্ৰ আছিল। জুইৰ উমান পোৱা মাত্ৰকে তেওঁলোকে কথমপি নিজৰ প্ৰাণ বচাই তাৰ পৰা ওলাই আহে যদিও ছাত্ৰসকলৰ বহুতো লাগতিয়াল নথি-পত্ৰ আৰু সা-সম্পত্তি জুইত জাহ যায়।
পিছত ঘটনাৰ খবৰ লাভ কৰাত ঘটনাস্থলীত দুখনকৈ অগ্নি নিৰ্বাপক বাহিনীৰ বাহন উপস্থিত হৈ প্ৰায় ১ ঘন্টা জোৰা চেষ্টাৰ অন্তত অগ্নি নিৰ্বাপন কৰিবলৈ সক্ষম হয়। উক্ত অগ্নিকাণ্ডটোৰ ফলত কোনো ছাত্ৰ হতাহত হোৱা নাই বুলি জানিব পৰা গৈছে।
