“মই আটাইতকৈ চিনিয়ৰ…মই শেষত বাহিৰলৈ যাম।” গব্বৰ সিং নেগীয়ে নিঃসংকোচে ভাতৃক জনাই দিলে। উত্তৰকাশীৰ ছিলকিয়াৰাত সোতৰ দিন ধৰি ভাঙি পৰা সুৰংগত আৱদ্ধ হৈ থকা ৪১ জন শ্ৰমিকৰ ভিতৰত তেওঁ অন্যতম। ১৭ দিন বা ৪০০ ঘণ্টাৰো অধিক সময় মাটিৰ পৰা ২০০ ফুট তলত আৱদ্ধ হৈ আছিল।
এই ১৭ দিনত তেওঁলোকৰ উদ্ধাৰৰ সম্ভাৱনা বাৰে বাৰে উজ্জ্বল হৈ পৰিছে আৰু প্ৰতিবাৰেই মাজতে বাধাৰ সৃষ্টি হয়। মাজতে বন্ধ হৈ পৰিছে উদ্ধাৰ অভিযান। অৱশেষত মঙলবাৰে সন্ধিয়া অন্ধকূপ সুৰংগৰ পৰা ৪১ জন শ্ৰমিকক নিৰাপদে মুকলি কৰি অনা হয়। ওলাই অহাৰ পিছত সকলোৱে স্তম্ভিত হৈ পৰে। ১৭ দিন তাত আৱদ্ধ হৈ থকাৰ পিছতো সেই শ্ৰমিকসকল শাৰীৰিক আৰু মানসিকভাৱে ইমান সতেজ কেনেকৈ?
দৰাচলতে ৪০০ ঘণ্টাৰো অধিক সময় ধৈৰ্য্য আৰু অপেক্ষাৰ এই পৰীক্ষাত উত্তীৰ্ণ হ’বলৈ তেওঁলোকক এজন শক্তিশালী নেতাৰ প্ৰয়োজন আছিল। আৰু এই দুৰ্যোগৰ সন্মুখত গব্বৰে নেতাৰ ভূমিকা গ্ৰহণ কৰিলে!
তেওঁ উত্তৰাখণ্ডৰ বাসিন্দা। দুৰ্ঘটনাস্থলীৰ পৰা ২৬০ কিলোমিটাৰ নিলগৰ পৌৰী গড়োৱাল জিলাৰ এখন গাঁৱত তেওঁৰ ঘৰ। অবিশ্বাস্য যেন লাগিলেও, ধ্বংসৰ ফলত সুৰংগ এটাত আৱদ্ধ হৈ পৰাটো এই নিৰ্মাণ শ্ৰমিকজনৰ জীৱনত নতুন কথা নহয়। ছিলকিয়াৰা-বৰাকোট সুৰংগত আবদ্ধ হৈ পৰাৰ আগতে তেওঁ তিনিবাৰ সুৰংগ ভাঙি পৰাৰ দুৰ্ভাগ্যজনক অভিজ্ঞতা লাভ কৰিছিল।
সেয়ে, দেৱালীৰ ৰাতিপুৱা যেতিয়া ছিলকিয়াৰা সুৰংগত আবদ্ধ হৈ পৰিল তেতিয়াও তেওঁ ইমান আতংকিত হোৱা নাছিল। যিহেতু তেওঁ নিজেই দুৰ্যোগৰ সন্মুখত শান্ত হৈ আছিল, গতিকে গব্বৰ সিঙে বাকী ৪০ জন শ্ৰমিকৰ যত্ন লৈছিল যাতে মানসিকভাৱে ভাঙি নাযায়, মনৰ শক্তি নেহেৰুৱায়। বন্ধ সুৰংগৰ আন্ধাৰত সহকৰ্মীসকলক যোগাসন আৰু ধ্যান শিকাইছিল। তেওঁ বাৰে বাৰে আশ্বাস দিছিল যে তেওঁলোকক কোনোবাদিনা উদ্ধাৰ কৰা হ’ব।
লগতে পঢ়কঃ জল্পনা-কল্পনাৰ অন্ত! প্ৰশিক্ষক হিচাপে বাহাল দ্ৰাবিড়
উত্তৰাখণ্ডৰ এইগৰাকী নিৰ্মাণ শ্ৰমিকে আৱদ্ধ শ্ৰমিকসকলক শাৰীৰিক আৰু মানসিকভাৱে সক্ৰিয় কৰি ৰখাৰ দায়িত্ব নিজৰ ওপৰত লৈছিল। ইয়াৰ বাবে গব্বৰ সিং নেগীয়ে তেওঁলোকৰ সুৰংগ-কাৰাগাৰত বিভিন্ন খেল আৰু শাৰীৰিক ব্যায়ামৰ ব্যৱস্থা কৰে।
বুধবাৰে পুৱা ভাতৃ জয়মল নেগীয়ে কয় যে তেওঁ প্ৰতিদিনে ককায়েকৰ সৈতে কথা পাতিছিল। তেওঁ ককায়েকক যোগাসন ল’বলৈ পৰামৰ্শ দিলে। ককায়েকে জনাইছিল সকলোৱে একেলগে সেইটো কৰি আছে। উদ্ধাৰ কৰা শ্ৰমিকসকলে গব্বৰ সিং নেগীৰ পৰামৰ্শ মতেই সুৰংগটোত লুডু আৰু দবা খেলিবলৈ আৰম্ভ কৰা বুলি জানিবলৈ দিয়ে।
লগতে পঢ়কঃ পৰস্ত্ৰীলৈ চকু কিয়! খঙতে ৰেবিজৰ বেজীৰে প্ৰেমিকৰ চকু ফুটালে মহিলাই
আনকি আৱদ্ধ শ্ৰমিকসকলে ‘চোৰ পুলিচ’ও খেলিছিল বুলি উদ্ধাৰৰ লগত জড়িত এজন মনোৰোগ বিশেষজ্ঞই কয়। প্ৰধানমন্ত্ৰী নৰেন্দ্ৰ মোদীয়ে নিজেই গব্বৰ সিং নেগীৰ সাহস আৰু নেতৃত্বৰ প্ৰশংসা কৰিছে।