বিজেপি তথা নেডাক প্ৰত্যাহ্বান জনাই উত্তৰ-পূবৰ প্ৰায়বোৰ আঞ্চলিক ৰাজনৈতিক দলৰ প্ৰতিনিধিয়ে আজি গুৱাহাটীত অনুষ্ঠিত কৰিব এখন গুৰুত্বপূৰ্ণ বৈঠক। বৈঠকত নাগৰিকত্ব সংশোধনী বিধেয়ক বাতিলৰ দাবীত ভৱিষ্যতে চৰকাৰৰ বিৰুদ্ধে কি ব্যৱস্থা গ্ৰহণ কৰিব সেই সম্পৰ্কে আলোচনা কৰিব বুলি জানিব পৰা গৈছে।
বিজেপি মিত্ৰজোঁটৰ দল এন পি পি তথা মেঘালয়ৰ মুখ্য মন্ত্ৰী কনৰাড চাংমাৰ আহ্বানত তথা অসম গণ পৰিষদ দলৰ উদ্যোগত গুৱাহাটীৰ তাজ ভিভাণ্টাত অনুষ্ঠিত হ’ব লগীয়া এই বৈঠকত উত্তৰ-পূবৰ প্ৰায়বোৰ সৰু বৰ ৰাজনৈতিক দলে অংশগ্ৰহণ কৰিব বুলি জানিব পৰা গৈছে।
নাগৰিকত্ব সংশোধনী বিধেয়কৰ বিৰোধিতাৰে আহ্বান জনোৱা আজিৰ এই বৈঠকত মেঘালয়ৰ মুখ্য মন্ত্ৰী কনৰাড চাংমা, মিজোৰামৰ মুখ্য মন্ত্ৰী জোৰাম থাংগাৰ উপৰি মণিপুৰ, ত্ৰিপুৰা, নাগালেণ্ড আৰু অৰুণাচলৰ বিভিন্ন ৰাজনৈতিক দলৰ নেতৃবৃন্দই অংশগ্ৰহণ কৰিব।
আজিৰ সভাত উত্তৰ-পূবৰ সকলো ৰাজনৈতিক দলে ঐক্যবদ্ধভাৱে জাতিধ্বংসী বিধেয়কখন বাতিলৰ দাবীত সংকল্প লোৱাৰ লগতে ভৱিষ্যতে ইয়াৰ বিৰুদ্ধে কেনেধৰণৰ আন্দোলনৰ কাৰ্যসূচী গ্ৰহণ কৰিব সেই সম্পৰ্কত আলোচনা কৰিব বুলি জানিব পৰা গৈছে।
আনহাতে এই সভাৰ পাছতেই দলসমূহৰ নেতৃত্বই আন্দোলনৰ কাৰ্যসূচী তথা ভৱিষ্যতৰ কাৰ্যপন্থা ৰাজহুৱা কৰিব।
উল্লেখ্য যে বিধেয়কখন গৃহীত হ’লে উত্তৰ-পূবৰ ৰাজ্য কেইখন সৰ্বাধিক ক্ষতিগ্ৰস্ত হোৱাৰ সম্ভাৱনা আছে সেয়ে অসমৰ লগতে উত্তৰ-পূবৰ বাকী ৰাজ্য কেইখনত বিভিন্ন দল-সংগঠনে ইয়াৰ বিৰুদ্ধে প্ৰতিবাদ তীব্ৰতৰ কৰি তুলিছে। কিন্তু ইমানৰ পাছতো কেন্দ্ৰীয় চৰকাৰে বিধেয়কখন সম্পৰ্কত নিজৰ স্থিতিত অচল আছে। সেয়ে উত্তৰ-পূবৰ সকলো আঞ্চলিক ৰাজনৈতিক দলে আজি গুৱাহাটীত একত্ৰিত হৈ বিধেয়কখনৰ বিৰুদ্ধে ঐক্যবদ্ধ আন্দোলনৰ কাৰ্যসূচী ঘোষণা কৰিব বুলি জানিব পৰা যায়।