মেঘালয়ৰ পূব জয়ন্তীয়া জিলাৰ ছান অঞ্চলৰ এটা কয়লা খনিৰ ভিতৰত আবদ্ধ হৈ পৰা ১৩জন শ্ৰমিকক এই পৰ্য্যন্ত উদ্ধাৰ কৰিব পৰা নগ’ল। যোৱলা ১৩ ডিচেম্বৰত সংঘটিত এই দুৰ্ভাগ্যজনক ঘটনাটোৰ পিছতে উদ্ধাৰ অভিযান চলোৱা হৈছিল যদিও ১৫ ডিচেম্বৰৰ সন্ধিয়া পৰ্য্যন্ত এজনৰো সন্ধান উলিয়াব পৰা হোৱা নাই।
উদ্ধাৰ অভিযানত জড়িত থকা চৰকাৰী বিষয়াই কয় যে খনিৰ ভিতৰত জমা হোৱা পানী সিঁচি থকা হৈছে যদিও এতিয়ালৈকে একো উদ্ধাৰ কৰিব পৰা হোৱা নাই।
“খনিৰ গাঁতটো প্ৰায় ৩৭০ ফুট গভীৰ আৰু ৰাষ্ট্ৰীয় দুৰ্য্যোগ প্ৰশমন বাহিনী (এন ডি আৰ এফ)-ৰ উদ্ধাৰকাৰীয়ে ৩০ ফুটলৈকেহে প্ৰৱেশ কৰিব পাৰিছিল।” উদ্ধাৰ অভিযানত জড়িত এজন জ্যেষ্ঠ বিষয়াই কয়।
আনহাতে সিঁচি আছে যদিও পানী এতিয়াও ভালেখিনি ৰৈ গৈছে বুলিও জানিবলৈ দিয়ে বিষয়াজনে। “আমি পানীখিনি সিঁচি উলিয়াবলৈ যত্ন কৰিছো যদিও এতিয়াও বহুত পানী আছে। এই পৰিস্থিতিত ডুবাৰুৱে উদ্ধাৰ অভিযান চলাব পৰা নাই।” বিষয়াজনে কয়।
খনিটোৰ ভিতৰত আবদ্ধ হৈ পৰা ১৩জন শ্ৰমিকৰ ভিতৰত কেইবাজনো অসমৰ শ্ৰমিক আছে। আটাইকেইজন শ্ৰমিকৰ মৃত্যু হোৱা বুলি আশংকা কৰা হৈছে।
উল্লেখযোগ্য যে মেঘালয়ত ৰাষ্ট্ৰীয় সেউজ ন্যায়াধিকৰণে কয়লাৰ খনন ২০১৪ চনৰ পৰাই বন্ধ ৰাখিছে যদিও বহুতো অবৈধ কয়লাখনি ৰাজ্যখনত গঢ় লৈ উঠিছে। জীৱিকাৰ তাড়নাতে এই কয়লাৰ খনিবোৰত কাম কৰিবলৈ বিভিন্ন ঠাইৰ শ্ৰমিক গৈ এইদৰে মৃত্যুৰ মুখত পৰা ঘটনা নতুন নহয়। ২০১২ চনতো খনিৰ ভিতৰত পানী সোমোৱা বাবে ১২ জন শ্ৰমিকৰ মৃত্যু হৈছিল। এই খনিবোৰত প্ৰয়োজনীয় বিজ্ঞানসন্মত ব্যৱস্থা আৰু সা-সুবিধা নাথাকে আৰু বিপদৰ সময়ত শ্ৰমিকসকলক এই খনিৰ ব্যৱসায়ীসকলে আপদকালীন সেৱাও আগ নবঢ়ায়।