শ্বিলঙত ১৯ আগষ্টত খাছি ছাত্ৰ ইউনিয়নৰ বাইক ৰেলীক কেন্দ্ৰ কৰি সংঘটিত হিংসাত্মক ঘটনাক লৈ মেঘালয় উচ্চ ন্যায়ালয়ে গুৰুত্বপূৰ্ণ নিৰ্দেশ দিছে। সোমবাৰে স্বতঃস্ফূৰ্তভাৱে গ্ৰহণ কৰা এখন জনস্বাৰ্থমূলক আবেদনৰ শুনানিৰ সময়ত ন্যায়ালয়ে ৰাজ্য চৰকাৰক ঘটনাটোৰ ওপৰত বিশদ প্ৰতিবেদন আৰু কেছ ডায়েৰী দাখিল কৰিবলৈ নিৰ্দেশ দিয়ে।
ন্যায়াধীশ ডব্লিউ ডিয়েনগডোহ আৰু এইচ এছ থাংখিউৰ দ্বৈত বিচাৰপীঠে শুনানিৰ সময়ত উল্লেখ কৰে যে হিংসাৰ সময়ত মেঘালয় উচ্চ ন্যায়ালয়ৰ দুখন বাহন আক্ৰমণৰ সন্মুখীন হৈছিল। সেই সময়ত বাহন দুয়খনত আদালতৰ বিষয়াই যাত্ৰা কৰি আছিল। ঘটনাটোত এজন ব্যক্তিগত নিৰাপত্তা বিষয়া আৰু এজন চালককো আক্ৰমণ কৰা হৈছিল বুলি আদালতক অৱগত কৰা হয়।
আদালতে এই ঘটনাৰ সৈতে জড়িত কেছ ডায়েৰী দাখিল কৰিবলৈ ৰাজ্য চৰকাৰক স্পষ্ট নিৰ্দেশ দিয়ে। বিশেষকৈ আদালতৰ বাহন আৰু কৰ্মচাৰীৰ ওপৰত হোৱা আক্ৰমণৰ তদন্ত কিমান আগবাঢ়িছে, তাৰ তথ্য আদালতৰ সন্মুখত দাখিল কৰিবলৈ কোৱা হৈছে।
শুনানিৰ সময়ত ৰাজ্যৰ এডভোকেট জেনেৰেলে চৰকাৰে গ্ৰহণ কৰা বিভিন্ন পদক্ষেপৰ বিষয়ে আদালতক অৱগত কৰে। তেওঁ জনায় যে ১৯ আগষ্টৰ হিংসাৰ আঁৰত থকা ঘটনা আৰু পৰিস্থিতিৰ দ্ৰুত তদন্তৰ বাবে এখন বিশেষ তদন্তকাৰী দল বা SIT গঠন কৰা হৈছে। একে সময়তে খাছি ছাত্ৰ ইউনিয়নৰ কেইবাজনো বিষয়ববীয়াক গ্ৰেপ্তাৰ কৰা হৈছে বুলিও আদালতক জনোৱা হয়।
এতিয়ালৈকে এই ঘটনাৰ সৈতে জড়িত থকাৰ অভিযোগত খাছি ছাত্ৰ ইউনিয়নৰ চাৰিজন নেতাক গ্ৰেপ্তাৰ কৰা হৈছে।
অহা ১ ছেপ্টেম্বৰত এই গোচৰৰ পৰৱৰ্তী শুনানি অনুষ্ঠিত হ’ব। সেই দিনা ৰাজ্য চৰকাৰে নতুনকৈ স্থিতি প্ৰতিবেদন আৰু কেছ ডায়েৰী আদালতত দাখিল কৰিব লাগিব।
উল্লেখযোগ্য যে ১৯ আগষ্টত খাছি ছাত্ৰ ইউনিয়নৰ উদ্যোগত শ্বিলঙত এখন ক’লা পতাকাৰ বাইক ৰেলী উলিওৱাৰ সময়তে উত্তেজনাৰ সৃষ্টি হয়। ইয়াৰ পাছত বিভিন্ন ঠাইত আক্ৰমণৰ ঘটনা সংঘটিত হয়। অসমৰ পঞ্জীয়ন নম্বৰ থকা বাহনকো লক্ষ্য কৰি আক্ৰমণ কৰাৰ অভিযোগ উত্থাপন হয়। ইয়াৰ ফলত অসম আৰু মেঘালয়ৰ মাজতো নতুনকৈ উত্তেজনাৰ পৰিৱেশ সৃষ্টি হয়।
হিংসাত্মক ঘটনাৰ পাছত মেঘালয় চৰকাৰে সমগ্ৰ বিষয়টোৰ তদন্তৰ নিৰ্দেশ দিয়াৰ লগতে দোষীৰ বিৰুদ্ধে কঠোৰ ব্যৱস্থা গ্ৰহণ কৰা হ’ব বুলি ঘোষণা কৰে। পৰৱৰ্তী সময়ত আইন-শৃংখলা নিয়ন্ত্ৰণত ৰাজ্যৰ আৰক্ষীক সহায় কৰিবলৈ কেন্দ্ৰই অতিৰিক্ত কেন্দ্ৰীয় বাহিনীও মেঘালয়লৈ প্ৰেৰণ কৰে।
