মেঘালয় উচ্চ ন্যায়ালয়ে নংক্ৰেমৰ এজন বাসিন্দাৰ পৰা লাভ কৰা এখন অভিযোগ পত্ৰক জনস্বাৰ্থ জড়িত গোচৰ(পিআইএল) হিচাপে গ্ৰহণ কৰিছে। এই পত্ৰত ঘাইপথৰ সমীপত অনুষ্ঠিত হোৱা মাছ ধৰা প্ৰতিযোগিতাৰ ফলত সাধাৰণ লোকৰ যাতায়াতত সৃষ্টি হোৱা অসুবিধাৰ বিষয়ে উত্থাপন কৰিছিল।
প্ৰপ্ত তথ্য অনুসৰি ২৮ আগষ্টত নংক্ৰেমৰ বাসিন্দা জোয়ানেছ জে টি এল লামাৰে মেঘালয় উচ্চ ন্যায়ালয়ৰ প্ৰাক্তন মুখ্য ন্যায়াধীশ ইন্দ্ৰ প্ৰসন্ন মুখাৰ্জীলৈ লিখা এখন পত্ৰৰ ভিত্তিত এই গোছৰ ৰুজু কৰে।
উল্লেখ্য যে লামাৰেই মটৰ গাড়ী আইন, ১৯৮৮ৰ ২০১ নং ধাৰা আৰু ৰাষ্ট্ৰীয় ঘাইপথ নিয়ন্ত্ৰণ (ভূমি আৰু যান-বাহন) আইন, ২০০২ৰ কথা উল্লেখ কৰি কয় যে ৰাজ্যখনত মাছ ধৰা প্ৰতিযোগিতাসমূহ এছঅ’পি পালন নকৰাকৈ অনুষ্ঠিত কৰি পথচাৰীৰ অধিকাৰ খৰ্ব কৰিছে।
তেওঁ কয় যে বিভিন্ন জিলাৰ জিলা উপায়ুক্তসকলে মাছ ধৰা প্ৰতিযোগিতাৰ অনুষ্ঠানৰ আয়োজকসকলক আপত্তিবিহীন প্ৰমাণ পত্ৰ (এন অ’ চি) প্ৰদান কৰাৰ সময়ত যাতে উপযুক্ত নিয়ম পালন কৰা হয় সেয়া নিশ্চিত কৰিব লাগে।
ইয়াৰ উপৰিও লামাৰেই শ্বিলং-নংষ্টেন-টুৰা পথৰ কাষত যেনে মাউলাংগ্ৰেন আৰু পামফিৰনাইত আয়োজিত মাছ ধৰা প্ৰতিযোগিতাৰ কথা উল্লেখ কৰে। যাৰ ফলত সৃষ্টিহোৱা বৃহৎ যান-জঁটৰ বাবে এম্বুলেন্সখন সময়মতে চিকিৎসালয়ত উপস্থিত হ’ব নোৱাৰা বাবে চিকিৎসাৰ অভাৱত এজন ৰোগীয়ে জীৱন হেৰুৱাবলগীয়া হৈছিল।
মুখ্য ন্যায়াধীশ সৌমেন চেন আৰু ন্যায়াধীশ ৱানলুৰা ডিয়েংডোৰ বিচাৰপীঠে এই গোচৰৰ শুনানি গ্ৰহণ কৰি ৰাজ্য আৰু কেন্দ্ৰীয় চৰকাৰক এনে ঘটনা নিয়ন্ত্ৰণৰ বাবে গ্ৰহণ কৰা পদক্ষেপ সন্দৰ্ভত তিনি সপ্তাহৰ ভিতৰত শপতনামা দাখিল কৰিবলৈ নিৰ্দেশ দিয়ে। আৰু ২৫ নৱেম্বৰত পৰৱৰ্তী শুনানিৰ গ্ৰহণ কৰা হ’ব বুলি বিচাৰপীঠে উল্লেখ কৰে।
