ৰাজা আৰু সোণম ৰঘুবংশীয়ে হানিমুনত মেঘালয়ত অহাৰ সময়ত সোণৰ গা-গহনা বেগত ভৰাই আনিছিল। কিন্তু মেঘালয়ৰ চেৰাপুঞ্জীৰ সমীপৰ চোহৰা অঞ্চলত ৰাজাৰ মৃতদেহ উদ্ধাৰ হ’লেও তেওঁ কঢ়িয়াই অনা গহনা আৰু মানিবেগ সন্ধানহীন হৈ আছিল। ৰাজাৰ মৃতদেহ উদ্ধাৰ হোৱাৰ প্ৰায় এমাহৰ পাছত মধ্যপ্ৰদেশৰ পৰা উদ্ধাৰ হৈছে গহনাখিনি। আৰক্ষীৰ সূত্ৰ অনুসৰি মধ্যপ্ৰদেশৰ ৰাটলাম অঞ্চলত উদ্ধাৰ হৈছে এই গহনা।
জুনৰ ২ তাৰিখে মধ্য প্ৰদেশৰ ইন্দোৰ নিবাসী ৰাজাৰ মৃতদেহ উদ্ধাৰ হয়। প্ৰায় এসপ্তাহৰ পিছত গাজীপুৰৰ পৰা তেওঁৰ পত্নী সোণমক গ্ৰেপ্তাৰ কৰা হয়। প্ৰেমিক ৰাজ কুশৱাহাৰ সৈতে পৰিকল্পনা কৰাৰ পিছত ভাড়াতীয়া হত্যাকাৰীক নিযুক্তি দি স্বামীক হত্যা কৰি পুনৰ মধ্যপ্ৰদেশলৈ উভতি আহে সোণম।
সোণমক গ্ৰেপ্তাৰ কৰাৰ পিছত ৰাজাৰ পৰিয়ালে দাবী কৰে যে সোণমে হানিমুনলৈ যোৱাৰ আগতে সোণমে ৰাজাক সোণৰ গহনাখিনি লৈ যাবলৈ বাধ্য কৰাইছিল। অৱশ্যে ৰাজাৰ মৃতদেহ উদ্ধাৰ হোৱাৰ পিছতো গহনাখিনি বিচাৰি পোৱা হোৱা নাছিল।
আনহাতে, মেঘালয় আৰক্ষীয়ে হত্যাকাণ্ডৰ তদন্তৰ বাবে বিশেষ তদন্তকাৰী দল (SIT) গঠন কৰে। ঘটনা সন্দৰ্ভত তদন্ত অব্যাহত ৰাখিছে। মেঘালয় আৰক্ষীৰ সূত্ৰ অনুসৰি তদন্তকাৰী দলে ইন্দোৰৰ প্ৰপাৰ্টি ডিলাৰ ছিলম জেমছৰ শহুৰেকৰ ঘৰৰ পৰা সোণমৰ লেপটপ আৰু পেন ড্ৰাইভৰ লগতে গহনা আৰু অন্যান্য সামগ্ৰী উদ্ধাৰ কৰে।
অভিযোগ অনুসৰি জেমছে ইন্দোৰত বিশাল সিং চৌহানক এটা ফ্লেট ভাড়াত দিছিল। সোণমক স্বামীক হত্যা কৰাত সহায় কৰা তিনিজন ব্যক্তিৰ ভিতৰত বিশাল অন্যতম। ৰাজা ৰঘুবংশীক হত্যা কৰি মেঘালয়ৰ পৰা উভতি আহি বিশাল চৌহানে এই ফ্লেটটোত থাকিবলৈ লৈছিল।
ইয়াৰ পূৰ্বে জেমছক হত্যাৰ প্ৰমাণ ধ্বংস কৰা আৰু ঘটনাৰ সৈতে জড়িত অপৰাধমূলক উপাদান লুকুৱাবলৈ চেষ্টা কৰাৰ অভিযোগত গ্ৰেপ্তাৰ কৰা হৈছিল। একে অভিযোগতে ফ্লেটটোৰ মালিক আৰু নিৰাপত্তাৰক্ষীকো গ্ৰেপ্তাৰ কৰা হয়।
আৰক্ষীয়ে জনোৱা মতে, জেমছে তদন্তকাৰী বিষয়াৰ আগত স্বীকাৰ কৰে যে তেওঁ ৰাটলামৰ এজন আত্মীয়ৰ ঘৰত গহনা আৰু নগদ ধন লুকুৱাই ৰাখিছিল, য’ৰ পৰা গহনাখিনি উদ্ধাৰ কৰা হৈছে।
