আমেৰিকাৰ ৰাষ্ট্ৰপতি নিৰ্বাচনত জ’ বিডেনে বৃহৎ পৰিমাণৰ ভোটৰ ব্যৱধানত পৰাস্ত কৰিলে বৰ্তমানৰ ৰাষ্ট্ৰপতি ড’নাল্ড ট্ৰাম্পক।
নিৰ্বাচনত পৰাজিত হোৱাৰ পিছতে আন্তৰাষ্ট্ৰীয় সংবাদ মাধ্যমত ড’নাল্ড ট্ৰাম্পৰ সংসাৰ ভাঙিব বুলি চৰ্চা হৈছে।
আন্তৰাষ্ট্ৰীয় সংবাদ সংস্থা ডেইলী মেইল-এ ড’নাল্ড ট্ৰাম্পৰ পত্নী মেলানিয়া ট্ৰাম্পৰ এসময়ৰ সহযোগী ষ্টীফেন ভলক’ফৰ উদ্ধৃতিৰে দাবী কৰিছে যে মেলানিয়াই ড’নাল্ড ট্ৰাম্পৰ সৈতে বিবাহত্তোৰ চুক্তিৰ সম্পৰ্কে আলোচনা আৰম্ভ কৰিছে।
ভলক’ফৰ উদ্ধৃতিৰে লগতে ডেইলী মেইল-এ দাবী কৰিছে যে ট্ৰাম্প দম্পতীয়ে নিজৰ মাজত আৰু পুত্ৰ বাৰ’ণ ট্ৰাম্পৰ সম্পত্তি সমান ভাগ বতৰাৰ সন্দৰ্ভতো আলোচনা অব্যাহত ৰাখিছে।
ভলক’ফৰ মতে হোৱাইট হাউছত পূৰ্বৰে পৰা পৃথক পৃথক শোৱনি কোঠা ব্যৱহাৰ কৰি আহিছে ড’নাল্ড আৰু মেলানিয়াই। আনকি তেওঁলোকৰ বিবাহক লেনদেনমূলক বুলিও অভিহিত কৰিছে ভলক’ফে।
ইফালে একে সময়তে ড’নাল্ড ট্ৰাম্পৰ পূৰ্বৰ ৰাজনৈতিক সহায়ক অ’মাৰ’ছা মেনিগ’ল্ট নিউমেনও দাবী কৰিছে যে ড’নাল্ড ট্ৰাম্প আৰু মেলানিয়া ট্ৰাম্পৰ ১৫ বছৰীয়া দাম্পত্য জীৱনৰ ইতি পৰিছে। মেলানিয়াই কেৱল ক্ষণহে গণি আছে। তেওঁৰ মতে হোৱাইট হাউছৰ পৰা ওলায়ে মেলানিয়াই ড’নাল্ড ট্ৰাম্পক বিবাহ বিচ্ছেদ দিব।
অ’মাৰ’ছাই লগতে দাবী কৰিছে যে মেলানিয়াই ট্ৰাম্পক প্ৰতিশোধ লোৱাৰ বাবে সুযোগৰ অপেক্ষাত ক্ষণহে গণি আছিল।
আনহাতে ডেইলী মেইলৰ মতে মেলানিয়াই পূৰ্বৰ এক সাক্ষাৎকাৰ ড’নাল্ড ট্ৰাম্প আৰু তেওঁৰ মাজৰ সম্পৰ্কটো এটা গভীৰ সম্পৰ্ক বুলিও অভিহিত কৰিছিল।
উল্লেখ্য যে ট্ৰাম্পে দ্বিতীয় পত্নী মাৰ্লা মেপল্ছৰ সৈতে বিবাহ বিচ্ছেদ কৰাৰ পিছতে ১৯৯৮ চনৰ পৰা মেলানিয়া আৰু ড’নাল্ড ট্ৰাম্পৰ প্ৰেমৰ সম্পৰ্ক আৰম্ভ হৈছিল। সেই সময়ত ড’নাল্ড ট্ৰাম্পৰ বয়স আছিল ৫২ আৰু মেলানিয়াৰ বয়স ২৮ বছৰ।
২০০৪ বৰ্ষত ১.৫ মিলিয়ন মাৰ্কিন ড’লাৰ মূল্যৰ এটা ডাইমণ্ডৰ আঙুঠি পিন্ধাই ড’নাল্ড ট্ৰাম্পে মেলানিয়াক বিবাহৰ প্ৰস্তাৱ দিছিল আৰু ২০০৫ চনৰ ২২ জানুৱাৰীত তেওঁলোক বিবাহপাশত আৱদ্ধ হৈছিল।
দুয়োপক্ষৰ একালৰ সতীৰ্থৰ দাবীৰে এতিয়া আন্তৰাষ্ট্ৰীয় সংবাদ সংস্থাসমূহে ড’নাল্ড ট্ৰাম্প আৰু মেলানিয়াৰ বিবাহ বিচ্ছেদ প্ৰায় নিশ্চিত বুলি দাবী কৰিছে।