মানসিক ভাৰসাম্য হেৰুৱাই তিনি বছৰ পূৰ্বেই নিৰুদ্দেশ হৈ থকা বৰপেটা জিলাৰ কয়াকুছিৰ সমীপৰ কুৰিহা গাঁৱৰ এগৰাকী মহিলাক বিশেষ তৎপৰতাৰে উদ্ধাৰ কৰিবলৈ সক্ষম হ’ল অসম আৰক্ষী।
২২ বছৰ বয়সীয়া মহিলাগৰাকী হৈছে কুৰিহা গাঁৱৰ তালেপ আলীৰ কন্যা মজিৰন নেছা। দুই সন্তানৰ মাতৃ দুৰ্ভগীয়া মহিলাগৰাকী তিনি বছৰ পূৰ্বে বিবাহ বিচ্ছেদ হোৱাৰ পিছৰ পৰাই মানসিক ভাৰসাম্য হেৰুৱাই ঘৰৰ পৰা নিৰুদ্দেশ হৈ আছিল।
আৰক্ষীৰমতে, পৰৱৰ্তী সময়ত মহিলাগৰাকী কোনোবা নৰপিশাচৰ কামনাৰ বলি হয়। ফলত গৰ্ভধাৰণ কৰি পশ্চিম বংগৰ ডায়মণ্ড হাৰ্বৰ পথৰ দাঁতিত আজিৰ পৰা এমাহ আগতে এটি কন্যা সন্তানৰ জন্ম দিয়ে।
সেই সময়ত হাম ৰেডিঅ’ৰ কৰ্ণধাৰ অম্বৰীশ নাগ বিশ্বাসৰ নেতৃত্বত পশ্চিম বংগৰ চি আই ডি আৰু পুলিচ বিভাগৰ সহযোগত ডায়মণ্ড হাৰ্বৰ জিলা হস্পিতালত ডাঃ আনোৱাৰ হুছেইনৰ পৰিচৰ্যাত মহিলাগৰাকী সুস্থ হৈ উঠাৰ লগতে স্মৃতিশক্তিও ঘূৰাই পাবলৈ সক্ষম হয়।
স্মৃতি ঘূৰাই পোৱাৰ পিছতে মহিলাগৰাকীয়ে নিজৰ নাম, ঠিকনা প্ৰকাশ কৰিবলৈ সক্ষম হয়। অসম আৰক্ষী বিভাগৰ বৰপেটা জিলাৰ আৰক্ষী অধীক্ষক ভায়োলেট বৰুৱাৰ নেতৃত্বত আৰু কয়াকুছি আৰক্ষী চকীৰ ভাৰপ্ৰাপ্ত বিষয়া হেমন্ত হালৈৰ প্ৰচেষ্টাত সন্তানসহ মহিলাগৰাকী মাতৃ আৰু ভাতৃৰ লগত শুক্ৰবাৰ নিশাৰ ভাগত নিজৰ ঘৰ আহি পাবলৈ সক্ষম হয়। আজি পুৱাৰ ভাগত বৰপেটা জিলাৰ আৰক্ষী অধীক্ষক ভায়োলেট বৰুৱাই কয়াকুছি আৰক্ষী চকীত উপস্থিত হৈ মহিলাগৰাকীৰ লগতে শিশুটিৰ স্বাস্থ্যৰ বুজ লয় আৰু মিঠাই-বস্ত্ৰ আদি প্ৰদান কৰে।
