উদ্বোধনী অনুষ্ঠানত আছিল ছাকিৰা। খেলত হৈছিল গ’ল। উত্তেজনা আৰু বিশ্বকাপৰ অভিলেখ ভংগ কৰা তিনিখন ৰঙা কাৰ্ড! মুঠতে ২০২৬ চনৰ বিশ্বকাপৰ প্ৰথমখন খেলত ফুটবলৰ লগতে অনুশাসনহীনতাৰ কথাও সমানে চৰ্চালৈ আহিল।
মেক্সিকো চিটি ষ্টেডিয়ামত দক্ষিণ আফ্ৰিকাক ২-০ গ’লত পৰাস্ত কৰি বিশ্বকাপৰ অভিযান আৰম্ভ কৰিছিল মেক্সিকোৱে। স্ক’ৰলাইন ২-০ হ’ব পাৰে। কিন্তু খেলৰ ছবিখন আছিল অধিক একপক্ষীয়। বল দখল, আক্ৰমণ, সুযোগ সৃষ্টি সহ প্ৰায় সকলো শাখাতে আগবাঢ়ি আয়োজক দল।
আনহাতে দক্ষিণ আফ্ৰিকা আক্ৰমণৰ ক্ষেত্ৰত নিষ্প্ৰভ, প্ৰতিৰক্ষাৰ ক্ষেত্ৰত শৃংখলাহীন আৰু আচৰণত অমাৰ্জিত। শেষলৈকে দুখন ৰঙা কাৰ্ড দেখাৰ পিছত ৯ জন খেলুৱৈৰে খেলখন শেষ কৰিবলগীয়া হয়।
খেলখনৰ নৱম মিনিটত মেক্সিকোৱে অগ্ৰগতি লাভ কৰে। দক্ষিণ আফ্ৰিকাৰ গ’লৰক্ষক ৰনৱেন উইলিয়ামছে খেলপথাৰৰ মাজৰ পৰা ভুল পাছ দিছিল। সেই সুযোগ কামত লগালে গুটিয়েৰেজে। তেওঁৰ পাছৰ পৰা জুলিয়ান কুইনোনেছে অকলে গ’লপোষ্টত গৈ বলটো নেটত সুমুৱাই দিয়ে। ২০২৬ চনৰ বিশ্বকাপৰ এইটোৱেই আছিল প্ৰথমটো গ’ল, আৰু একে সময়তে বিশ্বকাপত মেক্সিকোৰ তৃতীয়টো দ্ৰুততম গ’ল।
মেক্সিকোৱে আগবাঢ়ি গৈ মেচখনৰ সম্পূৰ্ণ নিয়ন্ত্ৰণ ল’লে। দুয়ো দিশৰ পৰা আক্ৰমণেৰে দক্ষিণ আফ্ৰিকাৰ ৰক্ষণ বিভাগক ব্যস্ত কৰি ৰাখিছিল। প্ৰথমাৰ্ধত ৰাউল জিমেনেজ গ’লৰ অতি ওচৰ চাপিছিল। কুইনোনেছৰ এটা শ্বটও পোষ্টত খুন্দা মাৰে। সেই সময়ত ১-০ গ’লৰ স্ক’ৰৰ ব্যৱধান দক্ষিণ আফ্ৰিকাৰ বাবে সকাহ যেন লাগিছিল।
দ্বিতীয়াৰ্ধৰ আৰম্ভণিতে দক্ষিণ আফ্ৰিকাৰ বিপদ আৰু অধিক বৃদ্ধি পায়। ইয়ায়া চিথোলে ৫০ মিনিটত প্ৰত্যক্ষভাৱে ৰঙা কাৰ্ড লাভ কৰে। গুটিয়েৰেজক ফাউল কৰি খেলপথাৰ এৰিবলগীয়া হয়। মেক্সিকোৱে এজন বেছি খেলুৱৈৰ সৈতে খেলি চাপ বৃদ্ধি কৰিলে। ৬৭ মিনিটত আহিল ফলাফল।
ৰবাৰ্ট আলভাৰাডোৰ নিখুঁত ক্ৰছৰ পৰা হেডাৰেৰে ৰাউল জিমেনেজে গ’ল দিয়ে। ২০২০ চনত মূৰৰ ভয়ংকৰ আঘাতৰ বাবে দীৰ্ঘদিন ধৰি খেলপথাৰৰ বাহিৰত থকা ফৰৱাৰ্ডগৰাকীয়ে গুৰুত্বপূৰ্ণ সময়ত বিশ্বকাপৰ মঞ্চত নিজৰ নাম উজলাই তুলিলে। গ’লটোৰ পিছতে প্ৰশিক্ষকে তেওঁক অঁতৰাই দিলে। কিন্তু নাটকখন তেতিয়াও বাকী আছিল।
খেলখনৰ শেষত দক্ষিণ আফ্ৰিকাৰ থেম্বা জোয়ানে অবৈধ আক্ৰমণাত্মক আচৰণৰ বাবে দ্বিতীয়খন ৰঙা কাৰ্ড লাভ কৰে। ২০০৬ চনৰ পিছত বিশ্বকাপৰ মেচত দুখন ৰঙা কাৰ্ড দেখা প্ৰথমটো দল হিচাপে দক্ষিণ আফ্ৰিকাই দুৰ্ভাগ্যজনক অভিলেখ গঢ়িলে।
মেচখনৰ অন্তিম মুহূৰ্তত নাটকখনৰ শেষ দৃশ্যৰ নায়ক আছিল মেক্সিকোৰ অধিনায়ক চেজাৰ মণ্টেছ। অতিৰিক্ত সময়ত বিপক্ষৰ নিশ্চিত গ’লৰ সুযোগ ৰোধ কৰাৰ সময়তে তেওঁ ৰঙা কাৰ্ড লাভ কৰে। যাৰ অৰ্থ হ’ল চলিত বিশ্বকাপৰ প্ৰথমখন মেচত তিনিখনকৈ ৰঙা কাৰ্ড। মন কৰিবলগীয়া যে ২০২২ চনৰ সমগ্ৰ বিশ্বকাপত মুঠ চাৰিখন ৰঙা কাৰ্ড দেখুওৱা হৈছিল।
মেচখনৰ পৰিসংখ্যাতো মেক্সিকোৰ আধিপত্য স্পষ্ট হৈ পৰিছে। গোটেই মেচখনত ৬১ শতাংশ বল দখল, ১৫টা শ্বট আৰু নিয়ন্ত্ৰণ তেওঁলোকৰ হাতত আছিল। দক্ষিণ আফ্ৰিকাৰ হাতত মাত্ৰ চাৰিটা শ্বটহে আছিল।
এই জয়ৰ জৰিয়তে মেক্সিকোৱে গ্ৰুপ এত তিনিটা গুৰুত্বপূৰ্ণ পইণ্ট লাভ কৰিছে। তেওঁলোকৰ পৰৱৰ্তী প্ৰতিদ্বন্দ্বী হৈছে দক্ষিণ কোৰিয়া। আনহাতে দক্ষিণ আফ্ৰিকাৰ সন্মুখত এতিয়া কঠিন সমীকৰণ। যদি চেক গণৰাজ্যৰ বিৰুদ্ধে জয়ী নহয় তেন্তে নকআউটৰ পথ প্ৰায় বন্ধ হৈ যাব পাৰে।
