সোমবাৰে জনতা ভৱনত এক সংবাদ মেল সম্বোধন কৰে মন্ত্ৰী ড০ হিমন্ত বিশ্ব শৰ্মাই।
উক্ত সংবাদমেলতে কেতিয়াৰ পৰা কেনেকুৱা ৰূপত প্ৰাক, প্ৰাথমিক বিদ্যালয়, হোষ্টেলসমূহ খুলিব সেই কথা উল্লেখ কৰে মন্ত্ৰী হিমন্ত বিশ্ব শৰ্মাই।
তেওঁ জনোৱা অনুসৰি ‘কোভিড-১৯ ৰ লগত ৰজিতা খুৱাই ১৫ ডিচেম্বৰৰ পৰা সীমিত ৰূপত হোষ্টেলসমূহ খুলি দিয়া হ’ব। চূড়ান্ত বৰ্ষৰ ছাত্ৰ-ছাত্ৰীসকল হোষ্টেললৈ আহিব পাৰিব।‘
‘যদি আৱাসিক স্কুল আছে তেন্তে দশম শ্ৰেণী, দ্বাদশ শ্ৰেণীৰ ছাত্ৰ-ছাত্ৰীসকল হোষ্টেললৈ আহিব পাৰিব। মহাবিদ্যালয়ৰ ক্ষেত্ৰত চূড়ান্ত বৰ্ষৰ ছাত্ৰ-ছাত্ৰীসকল হোষ্টেললৈ আহিব পাৰিব।‘ মন্ত্ৰীয়ে জানিবলৈ দি কয়।
ইপিনে, প্ৰাথমিক শিক্ষক সন্মিলনীৰ সৈতে হোৱা আলোচনাৰ ভিত্তিত ১ জানুৱাৰীৰ পৰা নাৰ্চাৰীৰ পৰা ষষ্ঠ শ্ৰেণীলৈকে বিদ্যালয়সমূহ খোলা হ’ব বুলি তেওঁ সংবাদমেলত জানিবলৈ দিয়ে।
এই ক্ষেত্ৰত কোনদিনা কোনটো শ্ৰেণীৰ পাঠদান হ’ব সেয়া পৰৱৰ্তী সময়ত নিৰ্দ্ধাৰণ কৰা হ’ব বুলি তেওঁ উল্লেখ কৰে।
ইপিনে, মহাবিদ্যালয়, বিদ্যালয়ৰ অধ্যক্ষসকলক হোষ্টেলৰ চাফ-চিকুণতাৰ কাম আৰম্ভ কৰিবলৈ মন্ত্ৰীয়ে আহ্বান জনায়।
তদুপৰি, হোষ্টেললৈ অহাৰ পূৰ্বে চূড়ান্ত বৰ্ষৰ ছাত্ৰ-ছাত্ৰীসকলক কোভিড টেষ্ট কৰোৱা হ’ব বুলি তেওঁ জনায়।
আনহাতে, উক্ত সংবাদমেলতে অস্থায়ী কোভিড কেয়াৰ চেন্টাৰসমূহ ইতিমধ্যে বন্ধ কৰা হৈছে বুলি জানিবলৈ দি হিমন্তই কয়, ‘খানাপাৰাত ২৮ নৱেম্বৰলৈকে কোভিড কেয়াৰ চেন্টাৰ চলি আছিল। হাস্পতালক বাদ দি অন্য কোনো ঠাইত এতি্য়া কোভিড কেয়াৰ চেন্টাৰ নাই।‘