আগন্তুক বিধান সভা নিৰ্বাচনৰ পূৰ্বেই সমষ্টিসমূহৰ সীমা নিৰ্ধাৰণ হ’ব বুলি চৰ্চা চলি আহিছিল তথা বিজেপিৰ নেতা-মন্ত্ৰীসকলে ইয়াক লৈ আনন্দিত হোৱাও পৰিলক্ষিত হৈছিল।
কিন্তু তেনে সময়তে এই বিষয়টোক লৈ প্ৰতিক্ৰিয়া প্ৰকাশ কৰি ২০২১ৰ পূৰ্বে সমষ্টি নিৰ্ধাৰণ কৰাটো সম্ভৱ নহয় বুলি মন্তব্য কৰিছে স্বাস্থ্য মন্ত্ৰী ড০ হিমন্ত বিশ্ব শৰ্মাই।
জিএমচিএইচত সেনাৰ প্লাজমা দান অনুষ্ঠানত অংশগ্ৰহণ কৰি এই সন্দৰ্ভত মন্তব্য কৰি মন্ত্ৰীজনে কয়, ‘এইটো সাধাৰণভাৱেই জানো যে নিৰ্বাচনৰ পূৰ্বে সমষ্টি পুনৰ নিৰ্ধাৰণ নহয়।‘
মন্ত্ৰী ড০ শৰ্মাই ইয়াৰ কাৰণ বাখ্যা কৰি কয়, ‘ডিলিমিটেশ্যন আইনত উল্লেখ আছে যে এয়া ২০০১ৰ ওপৰত নিৰ্ধাৰণ হ’ব। সংবিধান সংশোধন কৰি যেতিয়ালৈকে ২০১১ টো নানিব তেতিয়ালৈকে এই নিৰ্বাচনৰ আগত কোনোপধ্য সমষ্টি পুনৰ নিৰ্ধাৰণ হ’বই নোৱাৰে। ‘
‘২০০১ ৰ ঠাইত সংবিধান সংশোধন কৰি ২০১১ কৰিব লাগিব। ৬ নং দফা ৰূপায়ণৰ সময়ত সমষ্টি নিৰ্ধাৰণ প্ৰক্ৰিয়া প্ৰয়োজন হ’ব।‘ মন্ত্ৰীয়ে লগতে কয়।
ইপিনে, আগন্তুক নিৰ্বাচনৰ পূৰ্বেই অসমৰ বিধানসভা আৰু লোকসভা সমষ্টিৰ সীমা পুনৰ নিৰ্ধাৰণ কৰা হ’ব বুলি দেশৰ আইন আৰু ন্যায় মন্ত্ৰ্যালয়ে জনাইছিল।
দেশৰ আইন আৰু ন্যায় মন্ত্ৰ্যালয়ে জনাইছিল যে ২০০৮ চনত সীমা পুনৰ নিৰ্ধাৰণ কৰিবলৈ ৰৈ যোৱা অসমকে ধৰি ৪খন ৰাজ্যৰ সীমা নতুনকৈ নিৰ্ধাৰণ কৰা হ’ব।এই ৰাজ্যকেইখন হ’ল- অসম, অৰুণাচল প্ৰদেশ, মণিপুৰ আৰু নাগালেণ্ড।
আইন আৰু ন্যায় মন্ত্ৰ্যালয়ৰ এই প্ৰস্তাৱটোত ৰাষ্ট্ৰপতি কোবিন্দে সন্মতি প্ৰদান কৰাৰ পিছতে এইটো নিশ্চিত হয় বুলিও জানিব পৰা গৈছে।
৮ ফেব্ৰুৱাৰি, ২০০৮-ৰ এটা নিৰ্দেশ যোগে সেই সময়ত এই ৰাজ্যকেইখনৰ আইন-শৃংখলা আৰু নিৰাপত্তাৰ দিশ উন্নত নোহোৱাৰ দোহাই দি পৰৱৰ্তী সময়লৈ এই কাম স্থগিত ৰখা হৈছিল।
ৰাষ্ট্ৰপতি কোবিন্দে এই কাৰকবোৰ উন্নত হোৱা বুলি বিশ্বাসৰ ভিত্তিত এই প্ৰক্ৰিয়া উপৰোক্ত ৰাজ্যকেইখনত আৰম্ভ কৰাৰ অনুমতি দিয়ে।
এই প্ৰস্তাৱত ৰাষ্ট্ৰপতিয়ে সন্মতি প্ৰদান কৰাৰ পাছতেই ৰাজ্যিক বিজেপিৰ নেতৃত্ব আনন্দিত হৈছিল আৰু সমষ্টি পুনৰ নিৰ্ধাৰণলৈ বিশেষ আশাৰে বাট চাই ৰৈছিল।
কিন্তু তাৰ পাছতো মন্ত্ৰীগৰাকীয়ে আজি ২০২১ৰ নিৰ্বাচনৰ পূৰ্বে সমষ্টিৰ পুনৰ নিৰ্ধাৰণ অসম্ভৱ বুলি কৰা মন্তব্যই বিশেষ তাৎপৰ্য্য তথা ইংগিত বহন কৰিছে।