বৃহস্পতিবাৰে হোটেল ৰেডিশ্যন ব্লুত সম্বোধন কৰা এক সংবাদমেলত নৱগঠিত আঞ্চলিক শক্তি ৰাইজৰ দল আৰু অসম জাতীয় পৰিষদক একেলগে নিৰ্বাচন খেলিবলৈ পুনৰবাৰ আহ্বান জনালে মন্ত্ৰী হিমন্ত বিশ্ব শৰ্মাই।
সংবাদমেলত মন্ত্ৰীগৰাকীৰ দাবী ‘মোৰ অনুৰোধ প্ৰথম পৰ্য্যায়ত দুয়োটা আঞ্চলিক ৰাজনৈতিক দলে একত্ৰিত হোৱাৰ সিদ্ধান্ত লোৱাত মই নথৈ আনন্দিত হৈছো।‘
‘পৃথকে পৃথকে নিৰ্বাচন খেলিলে দল দুটাৰ প্ৰাৰ্থীয়ে ২,৩ হাজাৰতকৈ অধিক ভোট নাপায়। গতিকে একেলগে হৈ নিৰ্বাচন খেলিব লাগে।‘ এইদৰে আহ্বান জনায় মন্ত্ৰীগৰাকীয়ে।
ইপিনে, দুলীয়াজানত চলি থকা আছুৰ অধিৱেশনকো কটাক্ষ কৰে মন্ত্ৰীগৰাকীয়ে।
তেওঁ তাচ্ছিল্য কৰি কয়, ‘আছুৰ অধিৱেশনত যাতে ২১ নৱেম্বৰৰ দিনটোত কাজিয়া নোহোৱাকৈ ভালদৰে পাৰ হয় তাৰে কামনা কৰিছো। ছাত্ৰ সকলে পঢ়া শুনা কৰি লওক। তাৰ পিছত ৰাজনীতি কৰিব। তেওঁলোকৰ কোৰ্চেই শেষ হোৱা নাই। কোৰ্চ শেষ কৰি অলপ প্ৰশিক্ষণ লৈ ৰাজনীতিলৈ আহিব লাগে।‘
লুৰিণজ্যোতি গগৈক কটাক্ষ কৰি মন্ত্ৰীগৰাকীয়ে কয়, ‘লুৰিণজ্যোতি গগৈকো তেখেতৰ মাক -দেউতাকে বহু কষ্ট কৰি পঢ়াইছে। গতিকে যদি এতিয়া পঢ়া কমপ্লিট হোৱা নাই, মই ৰাজনীতিলৈ নহাটোৱেই কামনা কৰিম।‘
আনহাতে, একেখন সংবাদমেলতে কংগ্ৰেছ আৰু এআইয়ুডিএফৰ মিত্ৰতাকো সমালোচনা কৰে হিমন্তই।
তেওঁ কয়, ‘বদৰুদ্দিন আজমল আৰু কংগ্ৰেছ পাৰ্টী তেওঁলোকৰ যিবোৰ বক্তব্য যেনে বিজেপি ক্ষমতাত আহিলে মুছলমান হিন্দু হ’ব লাগিব। এইবোৰে প্ৰমাণ কৰিছে যে অসমত তেওঁলোকে সাম্প্ৰদায়িক ৰাজনীতি চলাব বিচাৰিছে।‘
‘কংগ্ৰেছে জুইৰ লগত খেলা কৰিছে উত্তৰ পূৰ্বাঞ্চল আৰু কাশ্মীৰত। সামাজিক সদভাৱনা আৰু বান্ধোনৰ প্ৰতি কংগ্ৰেছৰ ৰাজনীতি এক প্ৰত্যাহ্বান স্বৰূপে থিয় দিছে। মিঞা স্কুল, মিউজিয়াম বিচৰা এই গোটেইবোৰক ৰাইজে উচিত প্ৰত্যুত্তৰ দিব।‘ হিমন্তই সংবাদমেলত কয়।
আনহাতে, বিজেপি আৰু বিপিএফৰ মিত্ৰতা শেষ হোৱাৰ পথত বুলি এক ইংগিত দি মন্ত্ৰীগৰাকীয়ে কয়, ‘এটা ৰাজনৈতিক দলৰ ৫ বছৰ থাকে মিত্ৰতা। ৫ বছৰ পাৰ হৈ গ’লে এই মিত্ৰতা ৰিনিউ নহয়। ২০২১ চনত বিটিচিত ভাৰতীয় জনতা পাৰ্টীয়ে নিজে প্ৰতিদ্বন্দিতা কৰিব।‘
‘বিটিচিত বিজেপিৰ চৰকাৰ হ’ব। য়ুপিপিএলক ৰাজনৈতিক দল হিচাপে এতিয়া বিটিচিত লোৱা নাই। আমাৰ প্ৰতিটো সমষ্টিতে প্ৰত্যক্ষ প্ৰতিদ্বন্দিতা বিপিএফৰ লগত হ’ব।‘ তেওঁ এইদৰে কয়।
ইফালে বিটিচি নিৰ্বাচনত কৰ’নাৰ প্ৰট’কল চূড়ান্তভাৱে উলংঘা হোৱাৰ সন্দৰ্ভত সাংবাদিকে সোধা প্ৰশ্নত হিমন্ত বিশ্ব শৰ্মাই কয় যে, ‘মোৰ কাম দেখি সৰ্বদলীয় সভাই নিৰ্বাচন বিচাৰিলে। সেয়ে হৈছে। গতিকে সভা সমিতিত মানুহ আহিবই। কৰ’নাৰ প্ৰকোপ কি পৰিস্থিতিত আছে সেয়া সকলোৱে জানে। মই বিটিচি নিৰ্বাচন নালাগে বুলিয়েই কৈছিলো।নিৰ্বাচনত ক’ৰবাত সামাজিক দুৰত্ব মানিব পাৰি নেকি? এইখন আমেৰিকা নহয় ঘৰত বহি ভিডিঅ’ কৰি প্ৰচাৰ চলাব।’