কেৱল ৰাজনীতিয়েই নকৰে হিমন্ত বিশ্বই। সহায়-সহানুভূতিৰ সৈতে সমষ্টিবাসীৰ ওচৰত থিয় দিয়াত কৃপণালি নকৰে মন্ত্ৰীজনে, যিটোৱে তেওঁৰ ৰাজনীতিৰ ভেটি নিৰ্মাণ কৰিছে।
আজি মন্ত্ৰীজনে তেওঁৰ সমষ্টি জালুকবাৰীৰ দুগৰাকী মেধাৱী ছাত্ৰীক তেওঁলোকৰ ঘৰলৈ গৈ সাক্ষাৎ কৰাৰ লগতে তেওঁলোকক অভিনন্দন জনায়।
তাৰে এগৰাকী হ’ল অলপতে ফলাফল ঘোষিত উচ্চতৰ মাধ্যমিক চূড়ান্ত পৰীক্ষাত (কলা শাখা) ৰাজ্যৰ ভিতৰতে নৱম স্থান দখলেৰে উত্তীৰ্ণ হোৱা মেধাৱী ছাত্ৰী মানসী দাস। মন্ত্ৰীজন ছাত্ৰীগৰাকীৰ সিন্দুৰীঘোপা গাঁৱৰ বাসগৃহলৈ যায় আৰু শুভেচ্ছা জ্ঞাপন কৰাৰ লগতে ছাত্ৰীগৰাকী আৰু অভিভাৱকৰ সৈতে মত বিনিময় কৰে।
মন্ত্ৰীজনে সাক্ষাৎ কৰা আনগৰাকী ছাত্ৰী হ’ল জালুকবাৰী সমষ্টিৰ দগাঁৱৰ বৰষা ডেকা। বৰষা যোৱা ১৫ মে’ত হাইস্কুল শিক্ষান্ত পৰীক্ষাত অষ্টম স্থান লাভেৰে উত্তীৰ্ণ হৈছিল। মন্ত্ৰীজনে ছাত্ৰীগৰাকীৰ বাসভৱন উপস্থিত হৈ তেওঁক অভিনন্দন জ্ঞাপন কৰে আৰু উজ্জ্বল ভৱিষ্যৎ কামনা কৰে।
দুয়োগৰাকী ছাত্ৰীক তেওঁলোকৰ ঘৰলৈ গৈ সাক্ষাৎ কৰাৰ ফটোসহ নিজৰ ফেইচবুক টাইমলাইনত পোষ্ট দি মন্ত্ৰীজনে ছাত্ৰীকেইগৰাকীৰ উজ্জ্বল ভৱিষ্যৎ কামনা কৰা বুলি প্ৰকাশ কৰে।
আনহাতে এটা সূত্ৰই জনোৱা মতে, মন্ত্ৰীজনে মানসী দাসৰ পৰিয়ালৰ আৰ্থিক অৱস্থা উন্নত নোহোৱা বাবে কটন বিশ্ববিদ্যালয়ত তিনি বছৰৰ পঢ়াৰ খৰচ দিয়াৰ প্ৰতিশ্ৰুতি আগ বঢ়াইছে।
