মাত্ৰ এমাহৰ আগৰ কথা। দুই জনপ্ৰতিনিধিৰ মাজত দেখা গৈছিল টুইটাৰৰ যুদ্ধ। এগৰাকী ৰাজ্যৰ কেবিনেট মন্ত্ৰী, আনগৰাকী বিধায়ক। বিষয় আছিল- ভূমি বেদখল।
মন্ত্ৰী পিযুষ হাজৰিকা আৰু বিধায়ক অখিল গগৈৰ কথা সেয়া।
কিন্তু মাত্ৰ এমাহতে পিযুষ হাজৰিকা আৰু অখিল গগৈৰ টুইটাৰ যুদ্ধৰ এটা বিপৰীত ৰূপ।
বৃহস্পতিবাৰে কাজিৰঙাৰ অৰ্কিড পাৰ্কত দেখা গ’ল মন্ত্ৰী পিযুষ হাজৰিকাক। কাষত বিধায়ক অখিল গগৈ।
মাত্ৰ এমাহৰ আগতে যোৱা ১১ ডিচেম্বৰত অখিল গগৈৰ বিৰুদ্ধে ভূমি বেদখলৰ অভিযোগ তুলি পিযুষ হাজৰিকাই টুইট কৰিছিল।
কাজিৰঙাৰ জাতীয় অৰ্কিড উদ্যানৰ নামতো বৃহত ভূমি বেদখল হোৱাৰ অভিযোগ তুলিছিল পিযুষ হাজৰিকাই।
কিন্তু সেইখন জাতীয় অৰ্কিড উদ্যানত বৃহস্পতিবাৰে দেখা গ’ল মন্ত্ৰী পিযুষ হাজৰিকাক। কাষত অখিল গগৈক লৈ মন্ত্ৰী পিযুষ হাজৰিকাই অৰ্কিড উদ্যান পৰিদৰ্শন কৰিলে।
মুখ্যমন্ত্ৰী ড০ হিমন্ত বিশ্ব শৰ্মাৰ পৰিয়ালৰ বিৰুদ্ধে বেআইনীভাৱে ভূমি ক্ৰয়ৰ অভিযোগ উঠাৰ সময়তে টুইটাৰত উত্থাপন হৈছিল আন এক ভূমি বেদখল। মন্ত্ৰী পিযুষ হাজৰিকাই উত্থাপন কৰিছিল কাজিৰঙাৰ জাতীয় অৰ্কিড উদ্যানৰ নামত ভূমি বেদখল হোৱাৰ কথা।
মুখ্যমন্ত্ৰীৰ পৰিয়ালৰ ভূমি কেলেংকাৰীৰ বাতৰি প্ৰকাশ পোৱাৰ পাছতেই বিষয়টোক লৈ অখিল গগৈ সৰৱ হৈ উঠিছিল। ইয়াৰ পাছতেই পিযুষ হাজৰিকা-অখিল গগৈৰ মাজত টুইট যুদ্ধ আৰম্ভ হৈছিল।
পিযুষ হাজৰিকাই টুইটাৰযোগে অভিযোগ কৰিছিল- অখিল গগৈয়ে বহু বছৰৰ পৰাই বৃহৎ ভূমি বেদখলত জড়িত। অৰ্কিড উদ্যানৰ নামত ৬ বিঘা, ১ কথা, ১২ লেচা মাটি বেদখল কৰাৰ অভিযোগ তুলি ধৰিছিল মন্ত্ৰী পিযুষ হাজৰিকাই। টুইটাৰত এখন পত্ৰ সংলগ্ন কৰি তেওঁ এই অভিযোগ উত্থাপন কৰিছিল।
অৰ্কিড উদ্যানৰ চৰকাৰী আৱন্টিত ভূমিৰ বাবদ আদায় দিবলগীয়া প্ৰিমিয়াম আদায় নিদিয়াৰো অভিযোগ মন্ত্ৰী হাজৰিকাই দাঙি ধৰিছিল।
১২ ডিচেম্বৰত নৰ্থ-ইষ্ট নাওত এই বাতৰি সবিস্তাৰে প্ৰকাশ কৰা হৈছিল।
কিন্তু মাত্ৰ এমাহৰ পাছতেই পট পৰিৱৰ্তন ঘটিল। মন্ত্ৰী পিযুষ হাজৰিকাই ভূমি বেদখল কৰাৰ অভিযোগ তোলা অৰ্কিড উদ্যানত তেওঁ নিজেই উপস্থিত হ’ল। কাষত ল’লে টুইটাৰযোগে নিজেই ভূমি বেদখলৰ অভিযুক্ত সজোৱা অখিল গগৈক।
এতিয়া আমি কি বুজিম, বা সৰ্বসাধাৰণ ৰাইজে কি বুজিব। এয়া, কিবা বুজাবুজি, সনাপিটিকা নে আন কিবা?
মন্ত্ৰীয়ে অনা অভিযোগবোৰ প্ৰকৃততে কি আছিল? এমাহৰ আগৰ টুইটাৰ যুদ্ধ অভিযোগ-প্ৰতিঅভিযোগৰ এখন নাটকহে আছিল নেকি?
