আজি শিৱসাগৰৰ উপায়ুক্তৰ কাৰ্যালয় কক্ষত গড়কাপ্টানী আৰু শক্তি বিভাগৰ ৰাজ্যিক মন্ত্ৰী তপন গগৈৰ সভাপতিত্বত আৰু অসম পৰ্যটন উন্নয়ন নিগমৰ অধ্যক্ষ জয়ন্তমল্ল বৰুৱা, শিৱসাগৰ আৰু চৰাইদেউ জিলাৰ উপায়ুক্তদ্বয়ৰ উপস্থিতিত কেন্দ্ৰীয় পুৰাতত্ত্ব সৰ্বেক্ষণ ,ৰাজ্যিক পুৰাতত্ত্ব বিভাগ, পৰ্যটন বিভাগ আৰু সাংস্কৃতিক বিভাগৰ জিলা মূৰব্বী বিষয়াবৰ্গৰ সৈতে এক বৈঠক অনুষ্ঠিত হয় ৷
অসম পৰ্যটন উন্নয়ন নিগমৰ অধ্যক্ষ জয়ন্তমল্ল বৰুৱাই জনায় যে অবিভক্ত শিৱসাগৰ জিলাত প্ৰাচীন কীৰ্তিচিহ্নসমূহৰ আশে পাশে পৰ্যটকৰ বাবে বিভিন্ন সা-সুবিধা উপলব্ধ হোৱাকৈ নিগমে কেইবাটাও প্ৰকল্প ৰূপায়ন কৰি আছে।
আনহাতে, কেতবোৰ অভিলাষী আঁচনিৰ বাবে পুঁজি অনুমোদিত হৈ আছে যদিও সেইবোৰৰ ৰূপায়নৰ বাবে কেন্দ্ৰীয় পুৰাতত্ত্ব সৰ্বেক্ষণৰ অনুমতিৰ প্ৰয়োজন বুলি সদৰী কৰে অধ্যক্ষ বৰুৱাই।
ইপিনে, মন্ত্ৰী গগৈয়ে প্ৰাচীন কীৰ্তিচিহ্নসমূহৰ সংৰক্ষণ, সৌন্দৰ্যবৰ্ধন আৰু পৰ্যটকৰ বাবে বিভিন্ন সা-সুবিধা উপলব্ধ কৰাৰ স্বাৰ্থত কেন্দ্ৰীয় পুৰাতত্ত্ব বিভাগ, ৰাজ্যিক পুৰাতত্ত্ব বিভাগ, পৰ্যটন বিভাগ আৰু সাংস্কৃতিক বিভাগৰ সমন্বয়ৰ পোষকতা কৰে ৷
গগৈয়ে অসম চৰকাৰৰ কেইবাটাও প্ৰস্তাৱিত প্ৰকল্প ৰূপায়ণৰ বাবে কেন্দ্ৰীয় পুৰাতত্ত্ব সৰ্বেক্ষণৰ নতুন দিল্লীস্থ উৰ্ধতম কৰ্তৃপক্ষৰ সৈতে আলোচনাত বহিব বুলিও জানিব দিয়ে।
উল্লেখযোগ্য যে আজি জিলা উপায়ুক্ত কাৰ্যালয়ৰ চ্যুকাফা সভাকক্ষত গড়কাপ্টানী আৰু শক্তি বিভাগৰ ৰাজ্যিক মন্ত্ৰী শ্ৰীযুত তপন গগৈৰ সভাপতিত্বত আৰু জিলা উপায়ুক্তৰ উপস্থিতিত স্বাস্থ্য, শিক্ষা, গ্ৰামোন্নয়ন, জলস্পদ, কৃষি, জনস্বাস্থ্য কাৰিকৰী, সমাজ কল্যাণ আদিকে ধৰি বিভিন্ন বিভাগৰ জিলা মূৰব্বী বিষয়া সকলৰ আন এখন বৈঠকো অনুষ্ঠিত হয়।
আনহাতে, বিয়লি আৱৰ্ত ভৱনত গড়কাপ্টানী, ৰাষ্ট্ৰীয় ঘাইপথ আন্ত:গাঁথনি উন্নয়ন নিগম আৰু অসম শক্তি প্ৰকল্প ৰূপায়ন সন্দৰ্ভত বিভাগীয় বিষয়াসকলৰ সৈতে মন্ত্ৰীগৰাকীয়ে এখন পৰ্যালোচনা বৈঠকতো অংশগ্ৰহণ কৰে।
মন্ত্ৰীগৰাকীয়ে চৰকাৰে গ্ৰহণ কৰা বিভিন্ন জনমুখী আঁচনিৰ বিষয়ে ৰাইজক অৱগত কৰিবলৈ বিভাগৰ ক্ষেত্ৰ পৰ্যায়ৰ বিষয়া-কৰ্মচাৰীসকলক অধিক সজাগতাৰ সৃষ্টি কৰিবলৈ আহ্বান জনায়। তদুপৰি তেওঁ আঁচনিসমূহ ৰূপায়নৰ ক্ষেত্ৰত স্বচ্ছতা আৰু অধিক তৎপৰতাৰে আগবাঢ়িবলৈকো আহ্বান জনায়।
