পশ্চিম কাৰ্বি আংলঙত খাচী-নাৰ সম্প্ৰদায়ৰ এদল লোকে প্ৰবীনছন টিমুং নামৰ এজন লোকক আজি চোকা অস্ত্ৰৰে আক্ৰমণ কৰে।
অসম-মেঘালয় সীমান্তৰ উত্তেজনাপূৰ্ণ অঞ্চল হামৰেন থানাৰ অন্তৰ্গত নংজিৰঙত টিমুঙক সন্ধিয়া প্ৰায় ৬মান বজাত তেওঁৰ ঝুম খেতিত কৰি উভতি অহাৰ সময়তে খাচী-নাৰ সম্প্ৰদায়ৰ তিনিজন লোকে দাৰে আক্ৰমণ কৰে।
টিমুঙে আক্ৰমণকাৰী সকলৰ হাতৰ পৰা পলাই টাপাটৰ এখন খাচী গাঁৱত আশ্ৰয় লয় যদিও ৰক্তপাতৰ ফলত তেওঁ মূৰ্চ্ছা যায়। টাপাট গাঁৱবাসীয়ে গুৰুতৰভাৱে আহত টিমুঙক হামৰেন অসামৰিক হাস্পাতললৈ লৈ যায় আৰু তাতে তেওঁ চিকিৎসাধীন হৈ আছে।
অল পাৰ্টি হিলছ লীডাৰছ কনফাৰেন্সৰ নেতা জে আই কথাৰে এই সন্দৰ্ভত কাৰ্বি আৰু খাচী-নাৰ জনগোষ্ঠীৰ মাজত শান্তি কমিটি গঠনৰ আহ্বান জনাই অতিৰিক্ত উপায়ুক্ত মহম্মদ পাৰভেজ আমিনক এখন স্মাৰকপত্ৰ প্ৰদান কৰে। তেওঁ লগতে ঘটনাৰ বলি টিমুঙক চিকিৎসাৰ বাবে আৰ্থিক সাহায্য প্ৰদানৰ বাবেও অনুৰোধ জনায়।
আনহাতে, ঘটনাৰ বলি টিমুঙৰ পৰিয়ালে হামৰেন আৰক্ষী থানাত এখন এজাহাৰ দাখিল কৰে আৰু আক্ৰমণকাৰী হিচাপে টিন পাৰপেট, চেম ছিটুঙ আৰু ট্ৰাম টাৰলিয়াঙৰ নামৰ তিনিজন লোকৰ নাম উল্লেখ কৰিছে।
এই সংক্ৰান্তত ভাৰতীয় দণ্ডবিধিৰ ২৯/০৪/২০১৯ য়ু/এছ ৩২৫/৩০৭/৩৪ নম্বৰত এটা গোচৰ পঞ্জীয়ন কৰা হৈছে।
