নগাঁও চহৰৰ মাজমজিয়াতে আজি এগৰাকী ব্যৱসায়ীক দুৰ্বৃত্তই আক্ৰমণ কৰি আহত কৰা ঘটনাই নগাঁৱত চাঞ্চল্যৰ সৃষ্টি কৰিছে।
প্ৰাপ্ত তথ্য মতে, আজি বিয়লি নগাঁও চহৰৰ শেনচোৱা ৰে’লগেটৰ ওচৰত ৫-৬ জনীয়া দুৰ্বৃত্তৰ দল এটাই চন্দ্ৰদেৱ গোস্বামী নামৰ ব্যৱসায়ীজনক আক্ৰমণ কৰি গুৰুতৰভাবে আহত কৰে।
পিছত স্থানীয় লোকে তেওঁক উদ্ধাৰ কৰি সংকটজনক অৱস্থাত নগাঁও অসামৰিক চিকিৎসালয়ত ভৰ্তি কৰায় যদিও পিছত তেওঁক উন্নত চিকিৎসাৰ বাবে গুৱাহাটীলৈ প্ৰেৰণ কৰা হয়।
নগাঁও চহৰৰ লক্ষীনগৰ নিৱাসী অমায়িক স্বভাৱৰ ব্যৱসায়ীজনক দুৰ্বৃত্তই কিয় আক্ৰমনৰ লক্ষ্য কৰি ললে সেয়া এতিয়ালৈকে জানিব পৰা হোৱা নাই। ঘটনাৰ সন্দৰ্ভত আৰক্ষীয়ে তদন্ত অব্যাহত ৰাখিছে যদিও বাতৰি লিখা পৰলৈকে কাকো গ্ৰেপ্তাৰ কৰিবলৈ সক্ষম হোৱা নাই।
