উত্তৰ প্ৰদেশৰ লক্ষ্ণৌত এক অতি মৰ্মান্তিক আৰু ৰহস্যজনক ঘটনা পোহৰলৈ আহিছে যিয়ে সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে। যোৱা শনিবাৰৰ পৰা সন্ধানহীন হৈ থকা বিজয় পাল নামৰ এজন ৩৮ বছৰীয়া ব্যক্তিৰ মৃতদেহ দেওবাৰে পুৱা এখন নিৰামিষ বিৰিয়ানীৰ দোকানৰ ডিপ ফ্ৰীজাৰৰ ভিতৰত উদ্ধাৰ কৰা হয়। জিচিআৰজি কলেজৰ ঠিক বিপৰীত দিশত অৱস্থিত এই দোকানখনৰ পৰা আৰক্ষীয়ে মৃতদেহটো উদ্ধাৰ কৰে। এই ঘটনাই এতিয়া বহুতো প্ৰশ্নৰ জন্ম দিছে।
আৰক্ষীৰ মতে যিখন দোকানত মৃতদেহটো পোৱা গৈছে সেইখন এখন অস্থায়ী দোকান। দোকানখনৰ তিনিফালে টিনৰ বেৰ আছে যদিও কোনো দুৱাৰ বা গেট নাই। আটাইতকৈ আচৰিত কথাটো হ‘ল যিটো ফ্ৰীজাৰৰ ভিতৰত পালৰ মৃতদেহ পোৱা গৈছিল সেইটো বন্ধ অৱস্থাত আছিল আৰু যোৱা তিনিদিন ধৰি দোকানখনো সম্পূৰ্ণৰূপে বন্ধ হৈ আছিল। আৰক্ষীৰ এজন জ্যেষ্ঠ বিষয়াই জনোৱা মতে বিজয় পালৰ দেহত কোনো ধৰণৰ আঘাতৰ স্পষ্ট চিন দেখা পোৱা হোৱা নাই যাৰ বাবে মৃত্যুৰ প্ৰকৃত কাৰণ এতিয়াও ৰহস্যৰ আৱৰ্তত আছে।
ঘটনাটো পোহৰলৈ আহে যেতিয়া দোকানখনৰ মালিক অজয় নামৰ ব্যক্তিজনে কিছু সামগ্ৰী নিবলৈ দোকানলৈ আহিছিল। তেওঁ দোকানখনৰ ভিতৰত থকা ফ্ৰীজাৰটো খোলাৰ লগে লগে বিজয় পালৰ মৃতদেহটো দেখা পায় আৰু লগে লগে আৰক্ষীক খবৰ দিয়ে। আৰক্ষীয়ে ঘটনাস্থলীত উপস্থিত হৈ মৃতদেহৰ ওচৰত থকা মোবাইল ফোন আৰু আধাৰ কাৰ্ডৰ জৰিয়তে লোকজনৰ পৰিচয় নিশ্চিত কৰে। ইয়াৰ মাজতে আৰক্ষীয়ে এটা আচৰিত তথ্যও লক্ষ্য কৰিছে। মৃত ব্যক্তিজনৰ এপাট চেণ্ডেল কলেজৰ ওচৰৰ এটা চুকত পৰি থকা অৱস্থাত উদ্ধাৰ হৈছে আৰু আনপাট চেণ্ডেল দোকানখনৰ ভিতৰত পোৱা গৈছে।
বৰ্তমান আৰক্ষীয়ে বিজয় পালৰ পৰিয়ালৰ লোকৰ সৈতে যোগাযোগ কৰি তদন্ত অব্যাহত ৰাখিছে। মৃত্যুৰ প্ৰকৃত কাৰণ জানিবলৈ মৃতদেহটো মৰণোত্তৰ পৰীক্ষাৰ বাবে প্ৰেৰণ কৰা হৈছে। এই ঘটনাই সমগ্ৰ অঞ্চলটোত এক আতংকময় পৰিৱেশৰ সৃষ্টি কৰিছে আৰু ৰাইজৰ মাজত বহুতো সন্দেহৰ সৃষ্টি হৈছে। আৰক্ষীয়ে এয়া এক দুৰ্ঘটনা নে ইয়াৰ আঁৰত কোনো অপৰাধমূলক চক্ৰ জড়িত হৈ আছে সেই সকলোবোৰ দিশ পৰীক্ষা কৰি আছে।
