সকলো জল্পনা কল্পনাৰ অন্ত পেলাই অৱশেষত গেৰুৱা হ’ল মিথুন চক্ৰৱৰ্তী।
দেওবাৰে দুই বজাৰ পৰা প্ৰধানমন্ত্ৰী নৰেন্দ্ৰ মোডীয়ে কলকাতাত সম্বোধন কৰিব লগা এখন বিশাল নিৰ্বাচনী সভাৰ আগমুহূৰ্তত জনপ্ৰিয় অভিনেতাজনে ভাৰতীয় জনতা পাৰ্টিত যোগদান কৰে।
নিৰ্বাচনী সভাখনি অনুষ্ঠিত কৰিব লগা বিগ্ৰেড পেৰেড গ্ৰাউণ্ডত অভিনেতাজন উপস্থিত হোৱাৰ লগে লগে বংগৰ ৰাজনীতিত ধুমুহাৰ সৃষ্টি হৈছে।
বিজেপি নেতা কৈলাশ বিজয়বৰ্গীয়ই শনিবাৰে অভিনেতাজনৰ কলকাতাস্থিত নিজা বাসগৃহত লগ কৰাৰ পাছত ঘোষণা কৰিছিল যে অভিনেতাজনে প্ৰধানমন্ত্ৰী মোদীৰ সভাত উপস্থিত থাকিব।
দেওবাৰে বিগ্ৰেড পেৰেড গ্ৰাউণ্ডত অভিনেতাজন উপস্থিত হোৱাৰ লগে লগে বিজেপি কৰ্মীসকলৰ মাজত উচ্ছাহৰ বন্যা বোৱা দেখা যায়।
২০০৬ চনৰ ‘এমএলএ ফাটাকেষ্টু’ নামৰ চিনেমাখনৰ এটা জনপ্ৰিয় বেংগলী সংলাপেৰে উপস্থিত জনতাক তেওঁ আমোদ প্ৰদান কৰে।
”এজন বেংগলী হিচাপে মই গৰ্বিত। মই জানো আপোনালোকে মোৰ সংলাপবিলাক ভাল পায়।” জনতাক এইদৰে কৈ তেওঁ চিনেমাখনৰ সংলাপ আওঁৰায়- ”মাৰবো এখানে… লাছ পৰবে শশ্বানে”, অৰ্থাৎ মাৰিম ইয়াত, শ পৰিবগৈ শ্মশানত।
বলিউড আৰু টলিউডৰ অজস্ৰ জনপ্ৰিয় এক্সন প্ৰধান চিনেমাৰে অনুৰাগীসকলৰ মাজত ‘মিথুন দা’ নামেৰে পৰিচিত অভিনেতাজনে ৰাজনৈতিকভাৱেও সক্ৰিয় ভূমিকা পালন কৰি অহা দেখা যায়।
চিনেমাৰ পৰ্দাত অন্যায়ৰ বিৰুদ্ধে জেহাদ ঘোষণা কৰা মিথুনক এসময়ত নক্সালবাদী আন্দোলনক সমৰ্থন কৰাৰো বাতৰি পোৱা যায়।
২০১৪ চনত তৃণমূল কংগ্ৰেছে অভিনেতাজনক সাংসদ হিচাপে ৰাজ্যসভালৈ প্ৰেৰণ কৰে যদিও স্বাস্থ্যজনিত কাৰণত ২০১৬ চনত সাংসদ পদ ত্যাগ কৰে।
আনহাতে তেওঁ সাৰদা গ্ৰুপৰো ব্ৰেণ্ড এম্বেছাদৰ হিচাপে জড়িত হৈ আছিল আৰু বহুচৰ্চিত সাৰদা কেলেংকাৰীৰ পাছৰ পৰা তেওঁ ৰাজনীতি আৰু সামাজিক জীৱনৰ পৰা অব্যাহতি লয়।
৭০ বছৰীয়া অভিনেতাজনে শেহতীয়াকৈ সাস্থ্যজনীত কাৰণতো সামাজিকভাৱে সক্ৰিয়ভাৱে জড়িত হোৱা নাছিল।
বিজেপিয়ে দাবী কৰিছে যে প্ৰধানমন্ত্ৰীৰ নিৰ্বাচনী সভাখনত ১০ লাখ মানুহ গোট খাব।
উল্লেখযোগ্য যে ইতিমধ্যে কেইবাজনো তৃণমূল কংগ্ৰেছৰ নেতাই বিজেপিত যোগদান কৰিছে।
ইয়াৰ ভিতৰত অন্যতম হৈছে শুভেন্দু অধিকাৰী। তেওঁ নন্দীগ্ৰাম সমষ্টিত ৰাজ্যখনৰ মুখ্যমন্ত্ৰী মমতা বেনাৰ্জীৰ বিৰুদ্ধে প্ৰতিদ্বন্দিতা কৰিব।
২৭ মাৰ্চৰ পৰা ৮টা পৰ্যায়ত অনুষ্ঠিত হ’ব লগা বংগৰ নিৰ্বাচনক কেন্দ্ৰ কৰি ইতিমধ্যে ব্যাপক চৰ্চা হৈছে।
মমতা বেনাৰ্জীৰ বিৰুদ্ধে বিজেপিয়ে ৰাজ্যখনৰ মুখ্যমন্ত্ৰী হিচাপে কাক প্ৰক্ষেপ কৰিব সেই লৈয়ো ৰাজনৈতিক বিশ্লেষকসকলে দৃষ্টি ৰাখিছে।
শেহতীয়াকৈ মিথুন চক্ৰৱৰ্তী দলত যোগ দিয়াত ই এক নতুন মাত্ৰা লাভ কৰিছে।
উল্লেখযোগ্য যে ১৬ ফেব্ৰুৱাৰীত আৰএছএছ প্ৰধান মোহন ভাগৱতে অভিনেতাজনক মুম্বাইস্থিত বাসাভৱনত লগ কৰিছিল।
তাৰ পাছতে বংগৰ নিৰ্বাচনত তেওঁক বিজেপিয়ে মুখ্যমন্ত্ৰী হিচাপে প্ৰক্ষেপ কৰিব পাৰে বুলি চৰ্চাত আহিছিল।