ৰাষ্ট্ৰীয় নাগৰিকপঞ্জীৰ দাবী-আপত্তি সমূহৰ শুনানি গ্ৰহণ হৈ থকাৰ সময়ত একাংশ ‘ভূৱা আপত্তি’ দাখিল হোৱাৰ অভিযোগ উত্থাপিত হৈছে। ‘ভূৱা আপত্তি’ৰে প্ৰকৃত ভাৰতীয় নাগৰিকক হাৰাশাস্তি কৰি থকাৰো অভিযোগ বৰ্তমান চৰ্চিত হৈ আছে।
মঙলবাৰে এই সন্দৰ্ভত সৰৱ হয় ৰূপহীহাটৰ বিধায়ক নুৰুল হুদা। দিচপুৰৰ বিধায়ক আৱাসত এখন সংবাদমেল অনুষ্ঠিত কৰি বিধায়ক হুদাই এন আৰ চিৰ দ্বিতীয় খচৰাত নাম অন্তৰ্ভূক্ত হোৱা ভাৰতীয় নাগৰিকৰ বিৰুদ্ধে নামে-বেনামে আপত্তি দাখিল কৰি হাৰাশাস্তি দিয়া বুলি মন্তব্য কৰে। লগতে আপত্তি দাখিল কৰা অধিকাংশ লোকেই এতিয়া পলাই থকা বুলিও মন্তব্য কৰে।
বিধায়ক গৰাকীয়ে ধৰ্মীয় তথা ভাষিক সংখ্যালঘু প্ৰকৃত ভাৰতীয় লোকৰ বিৰুদ্ধে এটা ৰাতিৰ ভিতৰত নামে-বেনামে লাখ লাখ আপত্তি দাখিল হোৱাৰ প্ৰসংগ উত্থাপন কৰি এয়া এক ভয়ংকৰ ষড়যন্ত্ৰ আছিল বুলি মন্তব্য কৰে। লগতে আপত্তি দাখিল কৰা সকলৰ বেছিভাগেই শুনানিত উপস্থিত নথকা বুলি উল্লেখ কৰি তেওঁলোকক পলাই ফুৰা বুলি অভিহিত কৰে।
‘’আপত্তি দাখিল কৰা লোক যদি সোশৰীৰে শুনানিত উপস্থিত থাকিব নোৱাৰে তেনে লোকৰ আপত্তিৰ ভিত্তিত শুনানি অনুষ্ঠিত কৰা হৈছে কিয়? কোনোবাই আপত্তি দিলে বুলিয়েই পৰীক্ষা নিৰীক্ষা নকৰাকৈ এজন ভাৰতীয় লোকক হাৰাশাস্তি কৰিব সেয়া সংবিধান পৰিপন্থী। আক্ৰোশমূলকভাৱে ধৰ্মীয় তথা ভাষিক সংখ্যালঘুসকলৰ নাম এন আৰ চিৰ পৰা বাদ পেলোৱাৰ বাবে এয়া এক ষড়যন্ত্ৰ।‘‘
হুদাই এই ষড়যন্ত্ৰত এন আৰ চিৰ ৰাজ্যিক সমন্বয়ক গৰাকীৰো সহযোগ থকা বুলি অভিযোগ কৰে।
তেওঁ লগতে নগাঁৱৰ আনন্দৰাম ঢেকিয়াল ফুকন মহাবিদ্যালয়ৰ অৱসৰপ্ৰাপ্ত অধ্যক্ষ তথা প্ৰাক্ স্বাধীনতা কালৰ অসমৰ প্ৰধান মন্ত্ৰী চাৰ চৈয়দ চাদুল্লাৰ সময়ৰ বিধায়ক ওচমানি সদাগৰৰ পুত্ৰ আব্দুল হাইৰ লগতে তেওঁৰ পৰিয়ালৰ লোকৰ বিৰুদ্ধে কোনো অপৰিচিত লোকে আপত্তি দাখিল কৰা বিষয়টোও উত্থাপন কৰে।
উল্লেখ্য যে, ইয়াৰ আগতে আমছুৱে কোকৰাঝাৰ জিলাত দাখিল হোৱা একাংশ ভূৱা আপত্তিৰ তথ্য ফাদিল কৰিছিল। কোকৰাঝাৰৰ দুজন ব্যক্তিয়ে এবছুৰ একাংশ স্থানীয় কৰ্মীয়ে জোৰ জৱৰদস্তি তেওঁলোকৰ চহী লৈ জিলাখনৰ একাংশ ব্যক্তিৰ বিৰুদ্ধে আপত্তি দাখিল কৰা বুলি শপতনামা দাখিল কৰাৰ কথা আমছুৱে সদৰী কৰিছিল।
ইয়াৰ পৰৱৰ্তী সময়ত সোমবাৰে অসম ৰাজ্যিক জমিয়ত উলেমায়ো নামে-বেনামে এন আৰ চিৰ আপত্তি দাখিল হোৱাৰ কথা এক সংবাদমেলযোগে অভিযোগ আনিছিল।
ইপিনে, দাবী-আপত্তিৰ নিষ্পত্তিৰ বাবে শুনানি কেন্দ্ৰ সমুহ বহু দূৰৈত হোৱাকলৈও অসন্তুষ্টি প্ৰকাশ কৰে বিধায়ক নুৰুল হুদাই। ইয়াৰ ফলত সাধাৰণ লোকৰ যথেষ্ট শ্ৰম, অৰ্থ আৰু সময় ব্যয় কৰিবলগীয়া হোৱা বিষয়টোও তেওঁ উত্থাপন কৰে। লগতে নিজৰ অঞ্চলৰ এন আৰ চি সেৱা কেন্দ্ৰতে শুনানিৰ সুবিধা প্ৰদানৰো দাবী জনায়।
