অসম প্ৰদেশ কংগ্ৰেছৰ চাহ আৰু প্ৰাক্তন চাহ মজদুৰ শাখাৰ সভাপতিৰ দায়িত্ব গ্ৰহণ কৰিলে মৰিয়নিৰ বিধায়ক ৰূপজ্যোতি কুৰ্মীয়ে। সোমবাৰে গুৱাহাটীৰ ৰাজীৱ ভৱনত অনুষ্ঠিত এক অনুষ্ঠানত প্ৰদেশ কংগ্ৰেছৰ সভাপতি ৰিপুণ বৰাই কুৰ্মীক এই দায়িত্বভাৰ অৰ্পণ কৰে।
ইপিনে আজি দায়িত্ব গ্ৰহণ কৰিয়েই বিজেপি নেতৃত্বাধীন চৰকাৰখনৰ বিৰুদ্ধে সৰৱ হয় বিধায়কজন। সাংবাদিকৰ আগত তেওঁ চাহ জনগোষ্ঠীৰ লোকসকলক বিজেপি চৰকাৰে প্ৰতাৰণা আৰু অৱহেলা কৰি অহা বুলি মন্তব্য কৰি চৰকাৰখনৰ বিৰুদ্ধে আন্দোলন কৰাৰো হুংকাৰ দিয়ে।
তেওঁ কয়, “নিৰ্বাচনৰ পূৰ্বে বিজেপিয়ে চাহ শ্ৰমিকৰ মজুৰি ৩৫০ টকালৈ বৃদ্ধি কৰাৰ কথা কৈছিল, কিন্তু আজিলৈ সেয়া হৈ নুঠিল। মাত্ৰ ৩০ টকা মজুৰি বৃদ্ধি কৰি জনগোষ্ঠীটোৰ শ্ৰমিকসকলক আভুৱা ভাঁৰিলে।”
তেওঁ লগতে কেন্দ্ৰত অসমৰ পৰা লোকসভাৰ দুগৰাকী চাহ জনগোষ্ঠীৰ লোক সাংসদ হিচাপে আছে যদিও বিজেপিয়ে এজনকো মন্ত্ৰিত্ব নিদিয়াৰ বিষয় লৈ আক্ষেপ কৰে। লগতে অসমতো বিজেপিৰ তিনিজন এই সম্প্ৰদায়ৰ বিধায়ক আছে তাৰে এজনক মন্ত্ৰিত্ব নামত দিয়া হৈছে যদিও কামত নাই বুলি মন্তব্য কৰে। এনেবোৰ কথাই জনগোষ্ঠীটোৰ প্ৰতি বিজেপিয়ে অৱহেলা কৰি অহাৰ কথাকে প্ৰমাণ কৰে বুলিও কুৰ্মীয়ে কয়।
ইপিনে, ‘ডিজিটেল ইণ্ডিয়া’ৰ প্ৰসংগতো নৰেন্দ্ৰ মোদী নেতৃত্বাধীন বিজেপি চৰকাৰৰ বিৰূদ্ধে সমালোচনাত মুখৰ হৈ পৰে বিধায়কজন।
“নৰেন্দ্ৰ মোদীয়ে ‘ডিজিটেল ইণ্ডিয়া’ৰ কথা কৈ চাহ বাগিচাৰ শ্ৰমিক সকলৰ বেংক একাউন্ট খোলোৱাৰ লগতে ডিজিটেল লেনদেনৰ ব্যৱস্থা কৰিলে। কিন্তু সেই হিচাপত নাই এ টি এমৰ সুবিধা। লগতে বেংকত নিজৰ জমা টকাৰ লেনদেন কৰোতেও যথেষ্ট পৰিমাণত টকা কটা যায়। এইদৰে চৰকাৰখনে সাধাৰণ ৰাইজক লুণ্ঠন কৰি আহিছে।”
তেওঁ লগতে বিজেপিৰ চাহ জনগোষ্ঠীৰ বিধায়ক আৰু সাংসদকেইজনে জনগোষ্ঠীটোৰ সমস্যাসমূহ শক্তিশালী ৰূপত তুলি ধৰাৰ ক্ষেত্ৰতো ব্যৰ্থ হোৱা বুলি মন্তব্য কৰে।
ইয়াৰ উপৰি চাহ জনজাতি ছাত্ৰ সন্থা(আটছা)ই নিজৰ জনগোষ্ঠীটোক বিজেপি নেতৃত্বাধীন চৰকাৰখনে প্ৰতাৰণা কৰি আহাৰ পাছতো দুৰ্বল ভূমিকা গ্ৰহণ কৰি থকা বুলি মন্তব্য কৰি তেওঁলোকে বিজেপিৰে মিতিৰালি কৰি থকা বুলি কয়।