শেহতীয়াকৈ পাঁচখন দেশ ভ্ৰমণ কৰি ভাৰতলৈ উভতি আহিছে প্ৰধানমন্ত্ৰী নৰেন্দ্ৰ মোদী। তেওঁৰ এই যাত্ৰাৰ ভিতৰত ইটালী ভ্ৰমণৰ কথা সকলোৰে মুখে মুখে চৰ্চা হৈছে। বিশেষকৈ ইটালীৰ প্ৰধানমন্ত্ৰী জৰ্জিয়া মেলোনীৰ সৈতে হোৱা তেওঁৰ সাক্ষাৎকাৰ আৰু মেলোনীলৈ লৈ যোৱা ‘মেলোডী’ টফীৰ উপহাৰে বহুতৰ দৃষ্টি আকৰ্ষণ কৰিছে। পিছে প্ৰধানমন্ত্ৰী মোদীয়ে কেৱল টফীয়েই লৈ যোৱা নাছিল, ইয়াৰ লগতে তেওঁ ইটালীৰ প্ৰধানমন্ত্ৰীগৰাকীৰ বাবে ভাৰতৰ চহকী সংস্কৃতিৰ প্ৰতীকস্বৰূপ আন কেইবাটাও অতি বিশেষ উপহাৰ লৈ গৈছিল যিয়ে দুয়োখন দেশৰ সম্পৰ্ক আৰু অধিক মজবুত কৰিব।
প্ৰধানমন্ত্ৰী মোদীয়ে জৰ্জিয়া মেলোনীক অসমৰ গৌৰৱ মৰমৰ মুগাৰ এখন চাদৰ উপহাৰ হিচাপে আগবঢ়ায়। মুগাৰ চাদৰখনৰ লগতে প্ৰধানমন্ত্ৰীয়ে মেলোনীক মণিপুৰৰ পৰম্পৰাৰে নিৰ্মিত এখন বিশেষ ৰেচমৰ ষ্টোল উপহাৰ দিয়ে। এই ষ্টোলখনত মণিপুৰৰ বিৰল ফুল ‘শিৰুই লিলি’ৰ চানেকি ব্যৱহাৰ কৰা হৈছে। শিৰুই লিলি ফুল কেৱল মণিপুৰৰ পাহাৰতহে পোৱা যায় আৰু ইয়াক সন্মান আৰু বিশুদ্ধতাৰ প্ৰতীক বুলি ধৰা হয়। আটাইতকৈ আকৰ্ষণীয় কথাটো হ’ল ইটালীত লিলি ফুলক বিশুদ্ধতা আৰু সৌন্দৰ্য্যৰ প্ৰতীক হিচাপে গণ্য কৰা হয়, যাৰ বাবে এই উপহাৰটো মেলোনীৰ বাবে আৰু বেছি গুৰুত্বপূৰ্ণ হৈ পৰিছে।
ইটালীৰ প্ৰধানমন্ত্ৰীৰ উপৰিও প্ৰধানমন্ত্ৰী মোদীয়ে ইটালীৰ ৰাষ্ট্ৰপতি চাৰ্জিঅ’ মাটাৰেলাকো এটা অতি সুন্দৰ উপহাৰ দিয়ে। তেওঁ ৰাষ্ট্ৰপতিগৰাকীক আগ্ৰাৰ বিখ্যাত পাথৰৰ কাৰুকাৰ্যৰে নিৰ্মিত এটা মাৰ্বলৰ বাকচ উপহাৰ দিয়ে। এই বাকচটো বহুমূলীয়া শিল আৰু সুন্দৰ কলাৰে সজোৱা আছিল। এই বাকচটোৰ ভিতৰত ভাৰতৰ প্ৰখ্যাত সংগীতজ্ঞ পণ্ডিত ভীমসেন যোশী আৰু এম. সুববুলক্ষ্মীৰ শাস্ত্ৰীয় সংগীতৰ ৰেকৰ্ডিং ভৰাই দিয়া হৈছিল। এই আটাইবোৰ উপহাৰৰ জৰিয়তে প্ৰধানমন্ত্ৰীয়ে সমগ্ৰ বিশ্বৰ আগত ভাৰতৰ চহকী কলা, সংস্কৃতি আৰু সংগীতৰ এক সুন্দৰ নিদৰ্শন দাঙি ধৰিছে বুলি বিশেষজ্ঞসকলে মত প্ৰকাশ কৰিছে।
