উত্তৰ-পূবক অষ্টলক্ষ্মী বুলি ভবা মোদী চৰকাৰে অসমৰ সম্পদবিলাকৰ এটাৰ পিছত আন এটা ব্যক্তিগত খণ্ডৰ হাতত গতাই দিয়াৰ কৌশল অব্যাহত ৰাখিছে। অলপতে বৰঝাৰস্থিত লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমান বন্দৰটো ব্যক্তিগত খণ্ডক গতাই দিয়াটো নিশ্চিত কৰাৰ পিছত এইবাৰ অসমৰ তৈলক্ষেত্ৰসমূহ গতাই দিবলৈ ওলাইছে।
জানিব পৰামতে, কেন্দ্ৰৰ মোদী চৰকাৰে ইতিমধ্যে অসমৰ ৭খন তৈলক্ষেত্ৰ ব্যক্তিগত খণ্ডক দিয়াৰ প্ৰক্ৰিয়া আৰম্ভ কৰি দিছে। আৰু এই ক্ষেত্ৰত অসমৰ জাতি-মাটি-ভেটি ৰক্ষাৰ বাবে শাসন বিচৰা বিজেপি চৰকাৰখনে মৌন সন্মতি আগ বঢ়াইছে।
মন কৰিব লগীয়া যে কেন্দ্ৰৰ বিজেপি চৰকাৰখনে ইতিপূৰ্বে অইল ইণ্ডিয়া লিমিটেডৰ দুখনকৈ তৈলক্ষেত্ৰ ব্যক্তিগতখণ্ডক গতাই থৈছে। কিন্তু এতিয়া পুনৰ অইল ইণ্ডিয়াৰ অধীনত থকা আন ৬খন তৈলক্ষেত্ৰ ব্যক্তিগত খণ্ডক গতোৱাৰ প্ৰক্ৰিয়া আৰম্ভ কৰিছে। অইল ইণ্ডিয়া লিমিটেডৰ অধীনত থকা এই ৭খন তৈলক্ষেত্ৰ হ’ল- মৰাণ-ডিব্ৰুগড় সম্প্ৰসাৰণৰ হালধিবাৰী, মাধকালী, মৰাণ সম্প্ৰসাৰণৰ দক্ষিণ ৰাজগড়, উমাতৰা আৰু বাঘজান তৈলক্ষেত্ৰৰ দিচৈজান।
ইতিপূৰ্বে ইয়াৰ বাবে নিবিদা আহ্বান কৰা হৈ গৈছে। নিবিদা দাখিলৰ অন্তিম সময়সীমা ২০১৯ চনৰ ১৮ জানুৱাৰি।
আনহাতে এই ৫খন তৈল ক্ষেত্ৰৰ উপৰি অইল ইণ্ডিয়া লিমিটেডেও সুকীয়াকৈ ইয়াৰ অধীনৰ ২খন তৈলক্ষেত্ৰ ব্যক্তিগত খণ্ডক গতোৱাৰ আন এটা ষড়যন্ত্ৰৰ কথা পোহৰলৈ আহিছে। ৰাজহুৱা খণ্ডৰ কোম্পানিটোৱে ইয়াৰ নিবিদা নং CDG9977L19 –ৰ যোগে যোৰাজান আৰু টেঙাখান ইষ্টাৰ্ন এছেট তৈলক্ষেত্ৰ দুখন অধিক উৎপাদনৰ অজুহাতত ব্যক্তিগত খণ্ডক দিবলৈ বিচাৰিছে। ইতিপূৰ্বে ইয়াৰ বাবে নিবিদা আহ্বান কৰা হৈছে।
ইণ্ডিয়ান অইল ৱৰ্কাৰ্ছ য়ুনিয়নৰ প্ৰতিবাদ
কেন্দ্ৰীয় চৰকাৰ আৰু অইল ইণ্ডিয়াৰ এনে অসমবিৰোধী তথা ৰাজহুৱা খণ্ডৰ প্ৰতিকূল সিদ্ধান্তৰ বিৰুদ্ধে সৰৱ হৈ পৰিছে অইলৰ অন্যতম শ্ৰমিক সংগঠন ইণ্ডিয়ান অইল ৱৰ্কাৰ্ছ য়ুনিয়ন চমুকৈ আই অ’ ডব্লিউ।
ব্যক্তিগত খণ্ডৰ হাতত তৈলক্ষেত্ৰ গতাই দিলে ইয়াৰ কৰ্মচাৰীসকলে সন্মুখীন হ’ব পৰা জটিল পৰিস্থিতিৰ বিষয়ে উদ্বেগ প্ৰকাশ কৰিছে সংগঠনটোৱে। কেন্দ্ৰীয় চৰকাৰ আৰু অইলৰ এই ষড়যন্ত্ৰক সংগঠনটোৱে তীব্ৰ ভাষাৰে ধিক্কাৰ দিয়াৰ লগতে ইয়াৰ বিৰুদ্ধে এক বৃহৎ গণ আন্দোলনৰ সিদ্ধান্ত লৈছে।
অইল শ্ৰমিক য়ুনিয়নৰ সভাপতি ৰাজীৱ দিহিঙীয়া আৰু ভাৰপ্ৰাপ্ত সম্পাদক ভাস্কৰজ্যোতি বড়োই তৈলক্ষেত্ৰ ব্যক্তিগত খণ্ডৰ হাতত গতাবলৈ দিয়া ন’হব বুলি সকীয়াই দিয়ে। এই সংকটৰ সময়ত অইল ইণ্ডিয়া লিমিটেডৰ সকলো শ্ৰমিক সংগঠনকে ঐক্যবদ্ধ হ’বলৈ আহ্বান জনাইছে নেতা দুজনে।