নাগৰিকত্ব সংশোধনী বিধেয়ক অনাৰ বাবে বিজেপি নেতৃত্বাধীন কেন্দ্ৰীয় চৰকাৰখনৰ লগতে প্ৰধান মন্ত্ৰী মোদীক অসমৰ মানুহে কটু সমালোচনা কৰিলেও আৰু মোদী-বিৰোধী শ্ল’গান দিলেও অসমীয়াৰ সন্মানৰ চিন গামোচাখনক কান্ধৰ পৰা আঁতৰোৱা নাই তেওঁ। অসমীয়া মানুহে কৰা গালি-গঞ্জনাৰ বাবেই গামোচাখনৰ প্ৰতি বিতুষ্ট হোৱা নাই মোদী।
১৫ জানুৱাৰিত প্ৰধান মন্ত্ৰীজনে কেৰালাৰ থিৰুঅনন্থপুৰমত থকা পদ্মনাভস্বামী মন্দিৰ দৰ্শন কৰে। মন্দিৰ দৰ্শন কৰা আৰু পূজা-অৰ্চনা কৰা মোদীৰ বাবে নতুন কথা নহয়। কিন্তু অসমীয়াৰ বাবে ‘বিশেষ’ হৈ পৰিল প্ৰধান মন্ত্ৰী মোদীৰ এই মন্দিৰ দৰ্শনৰ মুহূৰ্তটো। কাৰণ মন্দিৰলৈ যোৱাৰ সময়ত তেওঁৰ কান্ধত দেখা গ’ল অসমীয়াৰ প্ৰিয় গামোচাখন। অসমলৈ আহোতে কৰাৰ কথাটো সুকীয়া, কিন্তু কেৰালাৰ মন্দিৰ দৰ্শনৰ সময়তো কান্ধত অসমীয়াৰ গামোচাখন লৈ মোদীয়ে তেওঁৰ অসম প্ৰীতিকে প্ৰদৰ্শন কৰিলে বুলিব পাৰি।
Prayed for the development of India and the peace and happiness of 130 crore Indians at the Sree Padmanabhaswamy Temple. pic.twitter.com/a9PvVY5sDQ
— Narendra Modi (@narendramodi) January 15, 2019
যুক্তিসংগত আৰু ন্যায়সংগত কাৰণতে নাগৰিকত্ব সংশোধনী বিধেয়কৰ বিৰোধিতা কৰিলেও ভোগালী বিহুৰ সময়ত অসমীয়া মানুহে নিশ্চয় মোদীক ধন্যবাদ দিবলৈ এইটো এটা ‘উপযুক্ত কাৰণ’ বুলি বিবেচনা কৰিব পাৰে।
মন কৰিব লগীয়া যে প্ৰধান মন্ত্ৰী মোদীয়ে গামোচাখনক সদায়ে বিশেষ স্থান দি আহিছে। যোৱা বছৰত আন্তঃৰাষ্ট্ৰীয় যোগ দিৱসতো প্ৰধান মন্ত্ৰীৰ কান্ধত জিলিকি থকা গামোচাখনে অসমীয়াক গৰ্বিত কৰি তুলিছিল।
অৱশ্যে মোদীৰ এনে গোমাচাপ্ৰীতিত গৰ্বিত আৰু কৃতজ্ঞ অনুভৱ কৰা একেখিনি অসমীয়া মানুহেই তেওঁলোকৰ জাতীয় সংকট নমাই অনা নাগৰিকত্ব সংশোধনী বিধেয়কখনৰ বিৰোধিতাত আপোচ কৰা নাই। বিগত সময়ছোৱাত অসমত মোদী বিৰোধী, বিজেপি বিৰোধী শ্ল’গানে তাকে ইংগিত কৰে।
