আজি নিৰ্বাচনী প্ৰচাৰৰ বাবে শিলচৰলৈ অহা প্ৰধান মন্ত্ৰী নৰেন্দ্ৰ মোদীয়ে জনসভাত নাগৰিকত্ব সংশোধনী বিধেয়ক, ২০১৬ শীঘ্ৰেই গৃহীত হ’ব বুলি কোৱাৰ পিছত সংবাদমেল দি তীব্ৰ প্ৰতিক্ৰিয়া কৰিছে অসম প্ৰদেশ কংগ্ৰেছে। অসম প্ৰদেশ কংগ্ৰেছৰ সভাপতি ৰিপুণ বৰাই মোদীয়ে অসমত জুই জ্বলাই বৰাকৰ হিন্দু বাঙালীক মোদীৰ নিৰ্বাচনী টোপ দিয়া বুলি অভিযোগ কৰে।
“মোদীয়ে অসমত জুই জ্বলাবলৈ আহিল আৰু নিৰ্বাচনী টোপ দিলে হিন্দু বাংলাদেশী সকলক। ললিপপ খুৱালে তেওঁলোকক। ভোটবেংকৰ স্বাৰ্থতে এইবোৰ কথা কৈছে মোদীয়ে।” ৰিপুণ বৰাই কয়।
“বিধেয়ক গৃহীত হ’বলৈ বহু সময়ৰ প্ৰয়োজন। গতিকে ‘শীঘ্ৰেই বিলখন গৃহীত তথা অনুমোদন দিব’ বুলি কোৱাটো টোপ। সঁচা অৰ্থত জেপিচিয়ে ৭ জানুৱাৰিত সংসদত প্ৰতিবেদন দাখিল কৰিবহে। ইপিনে ৮ জানুৱাৰিত লোকসভাৰ অধিৱেশন শেষ হ’ব। কেনেকৈ এদিনতে বিলখনত অনুমোদন জনাব?” সভাপতি বৰাৰ প্ৰশ্ন।
আনহাতে মোদীয়ে ভাষণত অসমৰ কোনো ধৰণৰ উন্নয়নৰ কথা ন’কলে বুলি অভিযোগ কৰে ৰিপুণ বৰাই। কাছাৰ কাগজ কলৰ বিষয়েও একো ন’ কলে ভাষণত। কাগজ কলৰ কৰ্মচাৰীয়ে দৰমহাৰ বাবে আন্দোলন কৰিব লগীয়া হৈছে। “অসমত ইমান দাবী উঠি থকা সত্ত্বেও ৬ জনগোষ্ঠীৰ জনজাতিকৰণৰ প্ৰসংগও উত্থাপন নকৰিলে।” সভাপতি বৰাই সংবাদমেলত লগতে কয়।
“মুঠতে অসমৰ মূল ইচ্ছ্যু এটায়ো মোদীৰ ভাষণত স্থান নাপালে। পুনৰ মিছা কথাৰে প্ৰতিশ্ৰুতি দিহে গ’ ল মোদীয়ে।”
‘উদ্যোগ নীতিও বন্ধ কৰি দিলে’ বুলি কৈ তেওঁ মোদীক প্ৰশ্ন কৰে, “অসমৰ উন্নয়ন কিদৰে কৰিব?”
তাৰোপৰি ৰিপুণ বৰাই কয়, “মোদীয়ে আগৰটো নিৰ্বাচনৰ আগে আগে বৰাকতে ‘ডিটেইনশ্যন কেম্প ভাঙি দিম’ বুলি কৈছিল। কিন্তু নিৰ্বাচনৰ পাছত বিদেশী বুলি বহু লোকক তাত ভৰাই হাৰাশাস্তি কৰিলে।”
উল্লেখযোগ্য যে আজি মোদীৰ ভাষণৰ প্ৰত্যুত্তৰ দিবলৈ ৰাজীৱ ভৱনত আয়োজিত সংবাদমেলখনত ৰিপুন বৰাৰ উপৰি বিৰোধী দলপতি দেৱব্ৰত শইকীয়া, বিধায়ক ৰকিবুল হুছেইন, প্ৰাক্তন কেন্দ্ৰীয় মন্ত্ৰী পৱন সিং ঘাটোৱাৰ আৰু সাংসদ গৌৰৱ গগৈও উপস্থিত আছিল।
সংবাদমেলত পৱন সিং ঘাটোৱাৰে কয়, বৰাকৰ জ্বলন্ত সমস্যাৰ বিষয়ে একোৱেই ন’কলে। তৈলক্ষেত্ৰ আৰু কাছাৰ কাগজ কলৰ দৰে সমস্যাৰ কথা নুলিয়ালেই।
বিধায়ক ৰকিবুল হুছেইনে কয়, এপিনে নাগৰিকত্ব বিলৰ দ্বাৰা বিদেশীক সংস্থাপন দিব, আনপিনে অসম চুক্তিৰ ৬ নং দফা কাৰ্য্যকৰী কৰিব, য’ত অসমীয়াৰ সাংবিধানিক সুৰক্ষা কৱচ দিব বিচাৰিছে। দুয়োটা স্ববিৰোধ কথা। তেওঁলোকে নিজে নাজানে কি কৰিব বিচাৰিছে। তেওঁলোকে ভয় খাইছে গতিকে তেওঁলোক এতিয়া কনফিউজড।”
