গত ৮ অক্টোবৰত অষ্ট্ৰেলিয়াৰ বিপক্ষে মেচেৰে বিশ্বকাপ অভিযানৰ আৰম্ভণি ঘটাইছিল ঘৰুৱা দল ভাৰতে। জয়েৰে প্ৰত্যাশিত আৰম্ভণিৰ পাছতে ক্ৰমে চাৰিখন মেচত অপৰাজিত হৈ ৰৈছিল ভাৰতীয় দল।
লীগৰ এই প্ৰথম চাৰিওখন মেচত মূল একাদশত নাছিল অভিজ্ঞ পেচাৰ মহম্মদ ছামি। বেঞ্চতে সুযোগৰ সন্ধানত অপেক্ষাত আছিল দুখনকৈ বিশ্বকাপৰ অভিজ্ঞতাৰে পুষ্ট তাৰকাগৰাকী।
অৱশেষত কালি আহিল সেই আকাংক্ষিত সুযোগ। শাৰ্দুল ঠাকুৰৰ স্থানত মূল একাদশত অন্তৰ্ভুক্ত হ’ল ছামি। এই সুযোগৰ সদব্যৱহাৰ কৰি ছামিয়ে কৰিলে চলিত বিশ্বকাপ অভিযানৰ সপোনৰ আৰম্ভণি।
নিজ স্পেলৰ প্ৰথমটো বলতে কিৱি অপেনাৰ উইল ইয়ঙৰ উইকেট দখল কৰি ছামিয়ে দিয়ে ৰাজকীয় প্ৰত্যাৱৰ্তনৰ ইংগিত। তাৰ পিছত আৰু থমকি নৰ’ল ছামিৰ নিখুঁত চমৎকাৰিতা।
৫৪ ৰাণত পাঁচ উইকেট দখলেৰে ছামিয়ে খহনীয়া তোলে কিৱি ইনিংছত। অভিজ্ঞ পেচাৰগৰাকীৰ এই চমকপ্ৰদ প্ৰদৰ্শনৰ সুবাদতে কিৱি বাহিনীক ২৭৩ ৰাণত বান্ধি ৰাখিবলৈ সক্ষম হয় মেন ইন ব্লু।
এই প্ৰদৰ্শনেৰে যেন ছামিয়ে নতুনকৈ সংজ্ঞায়িত কৰিলে প্ৰত্যাৱৰ্তনৰ অৰ্থক! লগতে গঢ়িলে ২০ বছৰীয়া ব্যৰ্থতাৰ অৱসান ঘটাই ICC ৰ কোনো বৃহৎ টুৰ্ণামেণ্টত কিৱি বাহিনীৰ বিপক্ষে জয়ৰ ভেটি।
ৰাজকীয় প্ৰত্যাৱৰ্তনেৰে তাৰকা পেচাৰগৰাকীয়ে লগতে অৰ্জন কৰে দুটাকৈ ঈৰ্ষণীয় কৃতিত্ব। মেচখনত ইয়ঙৰ ৰূপত নিজৰ প্ৰথমটো উইকেট দখলৰ লগে লগে ছামিয়ে বিশ্বকাপৰ ইতিহাসত সৰ্বাধিক উইকেট দখলকাৰী ভাৰতীয়ৰ তালিকাত কিংবদন্তি স্পিনাৰ অনিল কুম্বলেক অতিক্ৰম কৰে।
চলিত বিশ্বকাপত সুযোগ পোৱাৰ পূৰ্বলৈকে ৩১ টা উইকেট দখলেৰে কুম্বলেৰ সৈতে যুটীয়াভাৱে এই তালিকাৰ দ্বিতীয় স্থানত আছিল ছামি। এতিয়া কালিৰ মেচত পাঁচ উইকেট দখলেৰে ছামিয়ে বিশ্বকাপ উইকেটৰ সংখ্যা ৩৬ টালৈ বৃদ্ধি কৰে।
এই ক্ষেত্ৰত ছামিৰ আগত আছে প্রাক্তন পেচাৰ জাহিৰ খান আৰু জৱাগল শ্রীনাথ। দুয়ো ৪৪টাকৈ উইকেট দখলেৰে বিশ্বকাপত সর্বাধিক উইকেট দখল কৰা ভাৰতীয় বলাৰৰ তালিকাত যুটীয়াভাৱে শীৰ্ষত আছে।
ইয়াৰ লগতে এদিনীয়া বিশ্বকাপত একাধিক পাঁচ উইকেট দখল কৰা প্ৰথমজন ভাৰতীয় বলাৰ হিচাপেও পৰিগণিত হয় ছামি। ইয়াৰ পূৰ্বে ২০১৯ চনৰ বিশ্বকাপত ইংলেণ্ডৰ বিৰুদ্ধে প্ৰথমটো পাঁচ উইকেট দখল কৰিছিল পেচাৰগৰাকীয়ে।
ছামিৰ এই কৃতিত্বৰ বিপৰীতে ভাৰতীয় বলাৰ হিচাপে কপিল দেৱ, ভেংকটেশ প্ৰসাদ, ৰবিন সিং, আশীষ নেহৰা আৰু যুৱৰাজ সিঙে বিশ্বকাপত এবাৰকৈ পাঁচ উইকেট দখল কৰিবলৈ সক্ষম হৈছিল।
অষ্ট্ৰেলিয়াৰ মিচেল ষ্টাৰ্কে তিনিবাৰকৈ পাঁচ উইকেট দখলেৰে এই তালিকাৰ শীৰ্ষত আছে। ষ্টাৰ্কৰ বাদে আন কোনো বলাৰে প্ৰতিযোগিতাখনৰ ইতিহাসত দুবাৰতকৈ অধিক পাঁচ উইকেট দখলৰ কৃতিত্ব অৰ্জন কৰিবলৈ সক্ষম হোৱা নাই।
