নলবাৰী জিলাত সংঘটিত নৃশংস আক্রমণৰ ঘটনাটোৱে ৰাজ্য কঁপাই তুলিছিল। এমাহতকৈও অধিক সময় গুৱাহাটী চিকিৎসা মহাবিদ্যালয় হাস্পাতালত মৃত্যুৰ সৈতে যুঁজি শুকুৰবাৰে (৩ জুলাই) ১৮ বছৰীয়া মৃদুমুদ্ৰা ডেকাই অৱশেষত নিয়তিৰ ওচৰত হাৰ মানিলে। এই ঘটনাত মৃত্যুৰ সংখ্যা দুজনলৈ বৃদ্ধি পালে।
যোৱা ৩০ মে’ৰ নিশা মুকালমুৱাৰ অন্তৰ্গত গংগাপুৰত সংঘটিত হোৱা নৃশংস আক্ৰমণত মৃদুমুদ্ৰা গুৰুতৰভাৱে আহত হোৱাৰ পিছৰে পৰা জি এম চি এইচত চিকিৎসাধীন হৈ আছিল। এমাহৰো অধিক সময়ৰ চিকিৎসাৰ পিছতো তেওঁ মৃত্যুৰ মুখৰ পৰা ৰক্ষা নপৰিল।
এই আক্ৰমণত ১৯ বছৰীয়া মাধুৰ্য বৰ্মনৰ থিতাতে মৃত্যু হৈছিল। চামতাৰ বালিপথাৰৰ বাসিন্দা মাধুৰ্য পশ্চিম নলবাৰী আঞ্চলিক ছাত্ৰ সন্থাৰ সহকাৰী সাধাৰণ সম্পাদক হিচাপে কাৰ্যনিৰ্বাহ কৰিছিল।
ঘটনা অনুসৰি, নলবাৰী চহৰৰ পৰা মৃদুমুদ্ৰা আৰু মাধুৰ্য স্কুটিৰে ঘৰলৈ উভতি আহি থকা অৱস্থাত ৰোজ আলীয়ে ৰখাই আক্ৰমণ কৰাৰ অভিযোগ উত্থাপন হৈছিল।
পিছত পথৰ দাঁতিত একাধিক আঘাতত তেজৰ ডোঙাত পৰি থকা অৱস্থাত উদ্ধাৰ হয়। ঘটনাস্থলীতে মাধুৰ্যৰ মৃত্যু হোৱাৰ বিপৰীতে মৃদুমুদ্ৰাক সংকটজনক অৱস্থাত স্থানীয় চিকিৎসালয়লৈ নিয়াৰ পিছত উন্নত চিকিৎসাৰ বাবে গুৱাহাটীৰ জিএমচিএইচলৈ প্ৰেৰণ কৰা হয়।
এই ঘটনাই সমগ্ৰ নলবাৰীত ব্যাপক ক্ষোভৰ সৃষ্টি কৰিছিল, স্থানীয় বাসিন্দা, ছাত্ৰ সংগঠনকে ধৰি স্থানীয় সংগঠনসমূহে দোষীৰ বিৰুদ্ধে ক্ষিপ্ৰ ব্যৱস্থা গ্ৰহণৰ দাবী জনাইছিল।
শুকুৰবাৰে মৃদুমুদ্ৰাৰ মৃত্যুৰ লগে লগে গোচৰটোৱে অধিক স্পৰ্শকাতৰ ৰূপ ধাৰণ কৰাৰ লগতে অভিযুক্তসকলৰ বিৰুদ্ধে ক্ষিপ্ৰ তদন্ত আৰু গোচৰ চলোৱাৰ দাবী তীব্ৰতৰ হৈ পৰিছে।
উল্লেখ্য যে মুকালমুৱাত অসম আৰক্ষীৰ এনকাউণ্টাৰত মূল অভিযুক্ত ৰোজ আলী নিহত হয়।
