গোলাঘাট জিলাত সোমবাৰে নতুনকৈ ৬৭ জন লোকৰ দেহত কোভিড-১৯ৰ সংক্ৰমণ ধৰা পৰিছে। ইয়াকে লৈ জিলাখনত বৰ্তমান সক্ৰিয় কোভিড ৰোগীৰ সংখ্যা ৩৭০ লৈ বৃদ্ধি পাইছে।
ইয়াৰে ৩১৬ জন ঘৰতে আছুটীয়াকৈ থকাৰ বিপৰীতে ৪৭ জন লোক গোলাঘাট কোভিড চিকিৎসালয়, দুজন যোৰহাট চিকিৎসা মহাবিদ্যালয় হস্পিতাল, ৩ জন বোকাখাতৰ শ্বহীদ কমলা মিৰি অসামৰিক চিকিৎসালয় আৰু দুজন গুৱাহাটীত চিকিৎসাধীন হৈ আছে।
আজি ২,৭৪১ জন লোকৰ ৰেপিড এন্টিজেন টেষ্ট আৰু ১৪৬ জনৰ আৰটিপিচিআৰ পৰীক্ষা কৰা হয়। ৰেপিড টেষ্টতে ৬৭ জন লোকৰ দেহত সংক্ৰমণ ধৰা পৰে।
উল্লেখযোগ্য যে গোলাঘাট জিলাত পহিলা এপ্ৰিলৰ পৰা আজিলৈকে ৩৩,৬১০ টা ৰেপিড এন্টিজেন টেষ্ট কৰা হৈছে। এই সময়ছোৱাত জিলাখনত ৪৭৪ জন লোক এই ভাইৰাছৰ দ্বাৰা সংক্ৰমিত হয়।
অৱশ্যে বৰ্তমান ইয়াৰে ৩৭০ জনহে সক্ৰিয় কোভিড ৰোগী আছে বুলি জানিব পৰা গৈছে। জিলাখনত এই সময়ছোৱাত দুজন লোকৰ কোভিডত মৃত্যু হৈছে।
আজি চিনাক্ত হোৱাসকলৰ ভিতৰত কে বি আলিত ৮ জন, বোকাখাতত ১২ জন, সৰুপথাৰত ২৫ জন, শ্বহীদ কুশল কোঁৱৰ অসামৰিক চিকিৎসালয়ত ৮ জন, মিছামৰাত ১১ জন আৰু চাৰিঙিয়াত ৩ জন ৰোগী চিনাক্ত কৰা হয়। ইয়াৰ ভিতৰত দুটি শিশুও আছে।
আজি ঘৰতে আছুতীয়াকৈ থকা ১০ জন লোক আৰোগ্য হোৱাৰ বিপৰীতে চিকিৎসালয়ৰ পৰা ৪ জন ৰোগীক ঘৰলৈ যাবলৈ দিয়া হয়।
আনহাতে ১৮ জন লোকক চিকিৎসালয়ৰ পৰা হোম আইছ’লেচনলৈ প্ৰেৰণ কৰা হয়। গোলাঘাট জিলাত ক’ভিড-১৯ৰ প্ৰতিষেধক প্ৰদান কার্যসূচীও অব্যাহত আছে।
